ގއ. މާމެންދޫގައި ހިންގި ގްރޫޕް މާރާމާރީއެއްގައި ވަޅިން ހަމަލާދީ އެރަށު ލިލީ އޮފްދަ ވެލީ، އަހްމަދު އުދައްޔު، 17، މަރާލި މައްސަލައިގައި ދައުވާ އުފުލާފައިވާ ފަރާތްތަކުގެ ޝަރީއަތުގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގައި ބައިވެރިވުމުގެ ކުށުގެ ދައުވާ އުފުލާފައިވަނީ ގއ. މާމެންދޫ، ރިހިފަރުދާގެ، އަޙުމަދު ޝަމީމްއާއި، ގއ. މާމެންދޫ، ބިލަތްމާގެ، ޝަރަފު ރަޝީދުއާއި، ގއ. މާމެންދޫ، ގުލްފާމުގެ، މުޙައްމަދު މާޒިންގެ މައްޗަށެވެ. އެމީހުންގެ މައްޗަށް ވަނީ މީހަކަށް ނުރައްކާތެރި ހާނިއްކައެއްވާ ގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވުމުގެ ކުށުގެ ދައުވާވެސް އުފުލާފައެވެ.

ޝަމީމްގެ މައްޗަށް ކުރާ ދައުވާއާ ގުޅިގެން ދައުލަތުގެ ފަރާތުން 2 ހުށައެޅުމެއް ހުށައެޅިއެވެ. އެއް ކަމަކީ ދައުލަތުން ހުށައެޅި 25 ސިއްރު ހެއްކެއްގެ ހެކިބަސް ދައުވާލިބޭ ފަރާތްތަކާ ވަކި ހާޒިރެއްގައި ނެގުމަށް އެދި ހުށައެޅި ހުށައެޅުމެވެ. އެ ހުށައެޅުން ދެން ތިބި ދައުވާލިބޭ ފަރާތްތަކާ ގުޅިގެންވެސް ދައުލަތުން ހުށައެޅިއެވެ.

ގާޒީ ވަނީ އެ ހުށައެޅުން ބަލައިގަތުމަށް ނިންމަވާފައެވެ. އެގޮތުން އެ 25 ހެކިންވެސް ދައުވާލިބޭ ފަރާތްތަކާ ވަކިން، އަޑު ބަދަލުކޮށްގެން ކާކުކަން ނޭނގޭ ގޮތަށް ހެކިބަސް ނެގުމަށް ވަނީ ނިންމަވާފައެވެ.

ދެވަނަ ކަމެއްގެ ގޮތުން އޭނާގެ ފަރާތުން ޙާދިސާ ހިނގި ތަނުގައި ނެތްކަމުގެ ދިފާއުގައި ހެކި ހުށައަޅާފައިވީ ނަމަވެސް، އެއީ ތަހުގީގީ މަރުޙަލާގައި ފޯރުކޮށްދޭންޖެހޭ މައުލޫމާތުކަމަށްވާތީ، ދައުލަތުން އެދުނު ގޮތަށް، އެ ހެކިތައް ބަލައިނުގަތުމަށްވެސް ގާޒީ ނިންމެވިއެވެ.

މާޒިންގެ ފަރާތުން 4 ހުށައެޅުމެއް ހުށައެޅިއެވެ. އޭގެ ތެރޭގައި ދައުވާ ބާތިލު ކުރުމަށްވެސް އެދިފައިވާއިރު، އެކަށީގެންވާ މުއްދަތުގައި ދައުވާ އުފުލާފައިވާތީ އެ ހުށައެޅުން ބަލައިނުގަތުމަށް ގާޒީ ނިންމެވިއެވެ. އަދި ދައުލަތުގެ ހެކިންގެ ހެކިބަސްތަކެއް ބަލައިނުގަތުމަށް އޭނާގެ ފަރާތުން އެދިފައިވާއިރު، ގާޒީ ނިންމެވީ އެ ހުށައެޅުމުގައި ފާހަގަކޮށްފައިވާ ކަންކަމަކީ ހެކިބަސް ނެގުމުގެ މަރުޙަލާގައި ކަށަވަރު ކުރެވޭނެ ކަންކަން ކަމަށެވެ. ވުމާއެކު އެ ހުށައެޅުންތައްވެސް ބަލައިނުގަތުމަށް ގާޒީ ނިންމެވިއެވެ.

އޭނާގެ ފަރާތުން ހުށައެޅި 4 ހުށައެޅުންވެސް ބަލައިނުގަތުމަށް ގާޒީ ވަނީ ނިންމަވާފައެވެ.

އަޙުމަދު ޝަމީމްގެ ފަރާތުންވެސް 4 ހުށައެޅުމެއް ހުށައަޅާފައިވާއިރު، މައިގަނޑު ގޮތެއްގައި ހިމެނެނީ އެއް ކަންތައްތަކެވެ. އެ ހުށައެޅުންތައް ބަލައިނުގަތުމަށް ގާޒީ ނިންމެވިއެވެ.

އެހެންނަމަވެސް، ޝަރަފް ރަޝީދުގެ ފަރާތުން ހުށައެޅުމެއް ހުށައަޅާފައެއް ނުވެއެވެ.

އެއާއެކު، މި މައްސަލައިގެ ޝަރީއަތުގެ ކުރީގެ މަރުޙަލާ މިވަނީ ނިމިފައެވެ. ދެން އޮންނަ އަޑުއެހުމެއްގައި އޮންނާނީ މި މައްސަލައިގެ ޝަރީއަތް ފެށުމެވެ. އެގޮތުން ޖޫން މަހުގެ 12 ވަނަ ދުވަހުން ފެށިގެން 30 ވަނަ ދުވަހުގެ ނިޔަލަށް މި މައްސަލައިގެ ޝަރީއަތް ފަށައި، ހެކިބަސް ނެގުން ކުރިއަށް ގެންދިއުމަށް ގާޒީ ވަނީ ނިންމަވާފައެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.