6 އެއާޕޯޓަށް 12 ޕްރޮޕޯސަލް، 25 މިލިއަން ޑޮލަރުގެ އިންވެސްޓްމަންޓެއް

ސަރުކާރުން އެއާޕޯޓް އަޅަން ހުޅުވާލި ހަ ރަށަށް 12 ޕްރޮޕޯސަލް ލިބިފައިވާ ކަމަށާއި އެ އިންވެސްޓްމަންޓުގެ އަގު 25 މިލިއަން ޑޮލަރަށް އަރާ ކަމަށް މިނިސްޓަރ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.

އަސްލަމް މިހެން ވިދާޅުވީ ބުދަ ދުވަހު ރައްޔިތުންގެ މަޖިލީހުގެ ޖަލްސާގައި މެމްބަރަކު ކުރެއްވި ސުވާލަކަށް ޖަވާބު ދެއްވައެވެ. އޭނާ ވިދާޅުވީ ޕްރޮޕޯސަލް ހުށަހަޅާ އުސޫލަށް ގެނައި ބަދަލުތަކާއެކު ގިނަ ބަޔަކު އެ ޕްރޮޖެކްޓުތަކަށް ޝައުގުވެރިކަން ފާޅު ކުރަމުން އަންނަ ކަމަށެވެ.

6 އެއާޕޯޓެއް އަޅާނެ ބަޔަކު ހޯދަން ޕްލޭނިން މިނިސްޓްރީން ފުރަތަމަ އިއުލާން ކުރީ މިދިޔަ އަހަރުގެ ޑިސެމްބަރު މަހުގައެވެ. އެގޮތުން، ފުރަތަމަ ހުށަހެޅި ފުރުސަތުގެ ދަށުން މުޅި އެއާޕޯޓް ތަރައްގީ ކުރުމަށް ނުވަތަ ފައިނޭންސް ކުރާ ގޮތަށް ވެސް ޕްރޮޕޯސަލް ހުށައެޅެއެވެ. އެ ފުރުސަތުގައި ޕްރޮޕޯސަލް ހުށައަޅާއިރު މަދުވެގެން 5 މިލިއަން ޑޮލަރު ހުށައެޅުމަށް އޮތީ ކަނޑައަޅާފައެވެ.

މި އުސޫލު ބަދަލުކޮށް ދެވަނަ ފަހަރަށް އިއުލާން ކުރިއިރު ސަރުކާރުން ވަނީ މުޅި އެއާޕޯޓް ތަރައްގީ ކުރުމަށް ނުވަތަ ބައެއް ތަރައްގީ ކުރުމަށް ފައިނޭންސް ކުރެވޭ ގޮތް ހަދަާފައެވެ. އަދި ޕްރޮޕޯސަލް ހުށަހަޅާއިރު އެންމެ ދަށް އަގަކަށް ކަނޑައެޅީ 3 މިލިއަން ޑޮލަރެވެ.

މި އެއާޕޯޓުތަކާ ގުޅޭ ގޮތުން އަސްލަމް ވިދާޅުވީ 6 އެއާޕޯޓަށް ޖުމްލަ 12 ޕްރޮޕޯސަލް މިހާރު ލިބިފައިވާ ކަމަށެވެ. އަދި އެއީ 25 މިލިއަން ޑޮލަރުގެ އިންވެސްޓްމަންޓެއް ކަމަށާއި ލިބުނު ޕްރޮޕޯސަލްތައް ބަލައި ގާބިލުކަން ހުރިކުންފުނިތައް ދެނެގަތުމުގެ މަސައްކަތް ފަށާފައިވާ ކަމަށް އޭނާ ވިދާޅުވިއެވެ.

ސަރުކާރުން އެއާޕޯޓް އަޅަން ހުޅުވާލީ ހދ. މަކުނުދޫ އާއި ށ. ބިލަތްފަހި އާއި ބ. ތުޅާދޫ އާއި ތ. ވިލުފުއްޓާއި ފ. މަގޫދޫ އާއި ރ. އަތޮޅު ދެކުނު ބިތުގެ ރަށެކެވެ. މީގެ ތެރެއިން މަކުނުދޫ އެއާޕޯޓަށް 23.3 މިލިއަން ޑޮލަރު ކަނޑައަޅާފައިވާއިރު ބިލަތްފަހި އެއާޕޯޓަށް 23.6 މިލިއަން ޑޮލަރު، ތުޅާދޫ އެއާޕޯޓަށް 21.9 މިލިއަން ޑޮލަރު، ވިލުފުށި އެއާޕޯޓަށް 33.3 މިލިއަން ޑޮލަރު، މަގޫދޫ އެއާޕޯޓަށް 8.2 މިލިއަން ޑޮލަރު އަދި ރ. އަތޮޅު ދެކުނު ބިތުގައި އަޅާ އެއާޕޯޓަށް 23.6 މިލިއަން ޑޮލަރުގެ ހަރަދެއް ވަނީ ކަނޑައަޅާފައެވެ.