40 ޓީމާއެކު، ނެސްލޭ ކިޑްސް ފުޓްބޯލް ފިއެސްޓާ ފަށައިފި

މާލެ ސިޓީގެ ސްކޫލްތަކުގެ ކުދިންނަށް އަމާޒުކޮށްގެން ކުރިއަށް ގެންދާ ނެސްލޭ ކިޑްސް ފުޓްބޯލް ފިއެސްޓާ ފަށައިފިއެވެ.

މުބާރާތް ފެށުމުގެ ރަސްމިއްޔާތު މިއަދު ހަވީރު ހެންވޭރު ދަނޑުގައި ވަނީ ބާއްވާފައެވެ. ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާގެ ނައިބު ފައިސަލް ނަސީމެވެ.

މިފަހަރުގެ މުބާރާތުގައި ހުޅުމާލެ، މާލެ އަދި ވިލިމާލެއިން 20 ސްކޫލަކުން 40 ޓީމު ބައިވެރިވިއެވެ. މުބާރާތް ކުރިއަށް ގެންދަނީ ގްރޭޑް އެކަކުން ފެށިގެން ހަތަރެއްގެ ދަރިވަރުންނަށެވެ. އެގޮތުން މިއަދު ފަށާފައިވަނީ ގްރޭޑް އެކެއް އަދި ގްރޭޑް ދޭއްގެ ކުދިންގެ ބައެވެ. މި ދެ ގްރޭޑް ނިންމުމަށްފަހު ދެން މުބާރާތުގައި އޮންނާނީ ގްރޭޑް ތިނެއް އަދި ހަތަރެއްގެ ދަރިވަރުންގެ ކުޅުމެވެ.

މީގެ ކުރިން މި މުބާރާތް ބާއްވާފައިވަނީ ޕްރީ ސްކޫލް ދަރިވަރުން ހިމެނޭ ގޮތަށް ގްރޭޑް ފަހަކާ ހަމައަށެވެ. މުބާރާތުގެ އޮނިގަނޑު ރާވާލާފައި ވަނީ ހުރިހާ ކުޅުންތެރިންނަށްވެސް ކުޅެން ފުރުސަތު ލިބޭނެ ގޮތަށެވެ.