130 ކިލޯ ޑްރަގް މައްސަލައިގައި އިސްކޮށް އުޅުނުކަމުގެ ތުހުމަތުވާ ފަރާތްތަކުގެ ބަންދު މުރާޖައާ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި އިސްކޮށް އުޅުނުކަމުގެ ތުހުމަތުކޮށް، އެކަމާއި ގުޅޭ ދައުވާ އުފުލާފައިވަނީ ގއ. ވިލިނގިލި، ލައިޓްހައުސް، ޝަހީބް އިބްރާހިމްއާއި، ހއ. ހޯރަފުށި، ވައިލެޓްވިލާ އަހުމަދު މޫސާގެ މައްޗަށެވެ. ކްރިމިނަލް ކޯޓުގައި މި މައްސަލަ ބައްލަވަނީ އެކޯޓުގެ އިސްގާޒީ އަހުމަދު ޝަކީލެވެ.

މި އަޑުއެހުމުގައި ދައުލަތުގެ ވަކީލު ވަނީ އެ ދެމީހުން ބަންދު ކުރުމަށް ނިންމާފައިވާ ނިންމުން ދެމެހެއްޓުމަށް އެދިލައްވާފައެވެ.

ޝަހީބުގެ ފަރާތުން މައިގަނޑު ގޮތެއްގައި ފާހަގަކޮށްފައިވަނީ އެމީހުންގެ ސިއްޙީ މައްސަލަތަކަށް ޙައްލެއް ލިބޭނެ އިރުޝާދެއް ޝަރީއަތުން ދެއްވުމަށެވެ. އަހުމަދު މޫސާގެ ފަރާތުން އެދުނީ އޭނާ ބަންދުން ދޫކޮށްދިނުމަށެވެ.

އެ ދެ މީހުން ބޭސްފަރުވާއަށް ދޫކޮށްލުމަށް ކްރިމިނަލް ކޯޓުން މީގެ ކުރިން ނިންމިއެވެ. އެހެންނަމަވެސް، 24 އޭޕްރީލްގައި ހައިކޯޓުން ވަނީ ކްރިމިނަލް ކޯޓުގެ ނިންމުން ބާތިލުކޮށްފައެވެ.

ހައިކޯޓުގައި ކުރިއަށްދިޔަ އަޑުއެހުމަށް ބަލާއިރު، ބަންދު މުރާޖައާ މަޖިލީހަކީ ކަރެކްޝަންސްގެ މަދަނީ ޒިންމާ އަދާކުރާ މިންވަރު ބަލައި، އެކަމަށް ފަނޑިޔާރު ގޮތް ނިންމަވަންޖެހޭ ފަދަ މަޖިލީހެއް ނޫންކަމަށާއި، އެފަދަ މައްސަލަތަކުގައި އެކި ގާޒީން އެކި ގޮތަށް ނިންމެވުމުގެ ސަބަބުން ތަފާތު ނުކުރުމުގެ ޙައްޤަށްވެސް އުނިކަން އަންނަކަމަށް ފަނޑިޔާރު ހުސައިން ޝަހީދު ވިދާޅުވެފައިވެއެވެ.

ހައިކޯޓުގައި ކުރިއަށް ދިޔަ އަޑުއެހުމުގައި ފަނޑިޔާރު ހަސަން ޝަފީއު ވިދާޅުވި ގޮތުގައި ސިއްޙީ ޙާލަތެއްގެ ސަބަބުންވެސް ބަންދުގައި ހުރި ޙާލަތަށް ބަދަލެއް އައުމުގެ އިހްތިމާލު އެބަ އޮތެވެ. އެފަދަ ސިއްޙީ ޙާލަތެއް ކުރިމަތިވެފައިވާނަމަ ބަންދުގައި ހުރި ޙާލަތަށް ބަދަލު ގެނެވިދާނެކަމަށް ދެކިވަޑައިގަންނަވާކަމަށް އޭނާ ވިދާޅުވިއެވެ. ނަމަވެސް އެ މައްސަލައިގައި ވަގުތުން އެމީހުން ދޫކޮށްލަންޖެހޭ ފަދަ އިސްތިސްނާ ސަބަބެއް ފެންނަން ނެތްކަމަށް ފަނޑިޔާރު ވަނީ ވިދާޅުވެފައެވެ.

މި މައްސަލައިގައި ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ އަހުމަދު ޝަކީލް ވަނީ، މަތީ މަރުޙަލާގެ ކޯޓުތަކުގެ ނިންމުންތަކަށް ދަށު ކޯޓުތަކުން އިޙްތިރާމު ކުރާނެކަމަށް ވިދާޅުވެފައެވެ.

އެހެންނަމަވެސް، ބަންުދުގައި ތިބޭ ފަރާތްތަކުގެ ބަންދު މުރާޖައާ ކޮންމެ 30 ދުވަހަކުން ކުރަން މަޖިލީހުން ފާސްކޮށް ޤާނޫނުގައި އެކަން ބަޔާންކުރީ ވަކި ސަބަބުތަކާހުރެކަން ފާހަގަ ކުރައްވައި ގާޒީ ވިދާޅުވީ، ޝަރީއަތުން ބަންދު ކޮށްފައި ތިބޭ ފަރާތްތަކުގެ ޙާލަތު ބެލިފައިވާ މިންވަރު ދައުލަތުގެ ފަރާތުން އެނގުން މުހިއްމު ކަމަށެވެ.

އިސްގާޒީ އަހުމަދު ޝަކީލު ވަނީ އެ ދެމީހުންގެ ބަންދު ދަމަހައްޓަވާފައެވެ.

ދެން މި މައްސަލައިގެ އަޑުއެހުމެއް އޮންނާނީ 29 ޖޫންގައެވެ.