ވޯލްޑް ކަޕަށްފަހު ޑި މާރިއާ ޤައުމީ ޓީމުން ރިޓަޔާވަނީ

މިއަހަރު ޤަތަރުގައި އޮންނަ ވޯލްޑް ކަޕަށްފަހު ޤައުމީ ޓީމުން ރިޓަޔާ ވާނެކަމަށް އާޖެންޓީނާގެ ވިންގަރ އެންހެލް ޑި މާރިއާ ބުނެފިއެވެ.

އުމުރުން 34 އަހަރުގެ ޑި މާރިއާ ހޯމަ ދުވަހު ދިން އިންޓަވިޔުއެއްގައި ބުނީ މިފަހަރުގެ ވޯލްޑް ކަޕަށް ފަހު އެއީ ޤައުމީ ޓީމުން ރިޓަޔާ ވާންވީ ވަގުތު ކަމަށެވެ. އަދި މިހާރު ޤައުމީ ޓީމާއެކު ބައިނަލްއަގުވާމީ ލެވެލްގައި ކުޅޭނެ މޮޅެތި ޒުވާން ކުޅުންތެރިން އެބަ ތިބި ކަމަށެވެ. އަދި އެމީހުން އަންނަނީ ދުވަހުން ދުވަހަކަށް ކުރި އަރަމުންކަމަށާއި، އެމީހުންނަށް ހައި ސްޓޭންޑާޑްގައި ކުޅެވޭނެކަން އަންނަނީ ސާބިތުކޮށްދެމުން ކަމަށް ޑި މާރިއާ ބުންޏެވެ.

ޑި މާރިއާ ވަނީ އާޖެންޓީނާގެ ޤައުމީ ޓީމަށް 121 މެޗު ކުޅެދީފައެވެ. އަދި އޭނާ ވަނީ ޤައުމީ ޓީމަށް 22 ލަނޑު ޖަހައިދީފައެވެ. ޑި މާރިއާ ވަނީ އާޖެންޓީނާއާއެކު މިދިޔަ އަހަރު އޮތް ކޮޕާ އެމެރިކާ މުބާރާތް ކާމިޔާބުކޮށްފައެވެ. މުބާރާތުގެ ފައިނަލްގައި ބްރެޒިލްގެ ކޮޅަށް އާޖެންޓީނާ ޖެހި ހަމައެކަނި ލަނޑު ޖެހީ ޑި މާރިއާއެވެ. އެ މުބާރާތުގެ ތައްޓަކީ 28 އަހަރު ދުވަހަށްފަހު އާޖެންޓީނާއަށް ކާމިޔާބުކުރެވުނު ފުރަތަަމަ ތައްޓެވެ. ޑި މާރިއާ ވަނީ އާޖެންޓީނާއާއެކު 2014 ވަނަ އަހަރުގެ ވޯލްޑް ކަޕްގެ ފައިނަލް ކުޅެފައެވެ. މިއަހަރުގެ ވޯލްޑް ކަޕްގައި ވެސް ޑި މާރިއާ އާޖެންޓީނާއާއެކު ކުޅޭނެއެވެ.

ޑި މާރިއާ ވަނީ މި ސީޒަނަށްފަހު ޕެރިސް ސެއިންޓް ޖާމަން (ޕީއެސްޖީ) ދޫކޮށްލަން ނިންމާފައެވެ. އޭނާ ދާނެ ވަކި ކުލަބެއް މިހާތަނަށް ހާމަކޮށްފައެއް ނުވެއެވެ. ނަމަވެސް އޭނާ ހޯދުމުގެ މަސައްކަތް އިޓަލީގެ ޔުވެންޓަސް އިން ކުރަމުން އަންނަ ކަމަށް މީޑިއާ ރިޕޯޓުތައް ބުނެއެވެ.