އައިޔޫއެމްއެސްޔޫ ހޭންޑްބޯލް ފިއެސްޓާ: އަންހެން ޗެމްޕިއަންކަން އެމްއެންޔޫއަށް، ފިރިހެން ޗެމްޕިއަންކަން މެޕްސްއަށް

ދިވެހިރާއްޖޭގެ އިސްލާމީ ޔުނިވާސިޓީގެ ދަރިވަރުންގެ ޔޫނިއަން (އައިޔޫއެމްއެސްޔޫ) އިން ބޭއްވި އައިޔޫއެމްއެސްޔޫ ހޭންޑްބޯލް ފިއެސްޓާ 2022 ގެ އަންހެން ޑިވިޝަންގެ ޗެންޕިއަންކަން ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ) އަދި ފިރިހެން ޑިވިޝަންގެ ޗެމްޕިއަންކަން މެޕްސް ކޮލެޖު ހޯދައިފިއެވެ.

ގައުމީ ހޭންޑް ބޯލް ގްރައުންޑުގައި ރޭ ކުޅުނު އަންހެން ޑިވިޝަންގެ ފައިނަލްގައި އެމްއެންޔޫ ނިކުތީ ކްލިކް ކޮލެޖަ ދެކޮޅަށެވެ. ކްލިކް ކޮލެޖުގެ މައްޗަށް އެމްއެންޔޫއިން ކުރި ހޯދީ 10-14 ންނެވެ. ފައިނަލް މެޗުގެ މޮޅު ކުޅުންތެރިޔަކަށް ހޮވުނީ އެމްއެންޔޫގެ މަރިޔަމް ނާއިޝާ މަންސޫރެވެ. އެމްއެންޔޫއިން މުބާރާތުގެ ޗެމްޕިއަންކަން ހޯދީ އެ ޓީމު ކުޅުނު ހުރިހާ މެޗަކުން މޮޅުވެގެންނެވެ.

އަންހެން ޑިވިޝަންގެ އެންމެ މޮޅު ހަތް ކުޅުންތެރިންނަށް ހޮވުނީ އެމްއެންޔޫގެ ފިރުޝާނާ ނަސީރު، ރުނާ އިބްރާހީމް، ކްލިކް ކޮލެޖުގެ ޢާއިޝަތު ނަޝާޔާ، ފާތިމަތު ނިއުޝާ، ރައިޝާ ޝަރީފް، ސެންޓަރ ފޯ ހަޔަރ ސެކަންޑްރީ އެކިޔުކޭޝަންގެ ޢާއިޝަތު އިބާ އަޙުމަދު އަދި ކައުސަރު އަޙުމަދުއެވެ. އަންހެން ޑިވިޝަނުން މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ އެމްއެންޔޫގެ ފިރުޝާނާ ނަސީރުއެވެ.

ރޭ ކުޅުނު ފިރިހެން ޑިވިޝަަންގެ ފައިނަލްގައި މެޕްސް ކޮލެޖު ނިކުތީ އެމްއައި ކޮލެޖާ ދެކޮޅަށެވެ. މި މެޗު 09-12 އިން ކާމިޔާބުކުރީ މެޕްސް ކޮލެޖެވެ. ފައިނަލް މެޗުގެ މޮޅު ކުޅުންތެރިޔަކަށް ހޮވުނީ މެޕްސް ކޮލެޖުގެ އަޙުމަދު ފަޒީލްއެވެ.

ފިރިހެން ޑިވިޝަންގެ އެންމެ މޮޅު ހަތް ކުޅުންތެރިންނަށް ހޮވުނީ، ވިލާ ކޮލެޖުގެ އިބްރާހިމް އަލްޠަފް ހާފިޒް، މުޙައްމަދު ހާދިފް، އެމްއައި ކޮލެޖުގެ އައިމަން އާދަމް، އަޙުމަދު ނޫހް، އިބްރާހިމް މުސްފިރު، މެޕްސް ކޮލެޖުގެ އިބްރާހިމް ރަޝީދު އަދި ޢަބްދުﷲ ޙިޝާންއެވެ. ފިރިހެން ޑިވިޝަނުން މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ އެމްއައި ކޮލެޖުގެ އައިމަން އާދަމްއެވެ.

މި މުބާރާތަކީ އައިޔޫއެމްއެސްޔޫއިން އިންތިޒާމުކޮށްގެން ކޮލެޖު، ޔުނިވަރސިޓީ އަދި ހައި ސްކޫލްތަކުގެ މެދުގައި ބޭއްވި ފުރަތަަމަ މުބާރާތެވެ. އަދި މު މުބާރާތް ކޮންމެ އަހަރަކު ވެސް ކުރިއަށް ގެންދަން ނިންމާފައިވާކަމަށް އައިޔޫއެމްއެސްޔޫއިން މައުލޫމާތު ދެއެވެ.

މުބާރާތާ ގުޅޭ ގޮތުން އައިޔޫއެމްއެސްޔޫގެ ރައީސް އަޙުމަދު ސުހާން ވިދާޅުވީ މުބާރާތް ބޭއްވުމުގެ މަޤުސަދަކީ ޒުވާން ހޭންޑް ބޯލް ކުޅުންތެރިން އުފެއްދުން ކަމަށާއި އެކަން ހާސިލުކުރެވުނު ކަމަށް އުންމީދުކުރާ ކަމަށެވެ. އަދި މި މުބާރާތުގައި ވިދާލި ބައެއް ކުޅުންތެރިންނަށް ކުރިއަށް އޮތް އެސޯސިއޭޝަން ކަޕްގައި ކުޅުމަށް ފުރުސަތު ލިބިފައިވާކަން ޝުހާން ފާހަގަކުރެއްވިއެވެ. މީގެ އިތުރުން ސުހާން ވިދާޅުވީ ކޯވިޑް-19 އާއި ގުޅިގެން ކޮލެޖު ޔުނިވަރސިޓީތަކުގެ މެދުގައި މަޑު ޖެހިފައި އޮތް ކުޅިވަރު މުބާރާތްތައް ނަގާ ކޮޅަށް ޖެހުމަކީ ވެސް މުބާރާތުގެ މަގުސަދެއް ކަމަށެވެ. އަދި އުންމީދު ކުރި ވަރަށްވުރެ ގިނަ ޓީމުތަކުން ބައިވެރިވުމުން އެކަން ހާސިލްކުރެވިއްޖެ ކަމަށް ޤަބޫލުކުރައްވާ ކަމަށެވެ.

ސުހާން ވިދާޅުވީ ފޯރިގަދަ މި މުބާރާތް ކުރިއަށް ގެންދެވުނީ އެކި ފަރާތްތަކުގެ އެހީތެރިކަމާއެކު ކަމަށެވެ. އެހެންކަމުން މުބާރާތަށް އެކި ގޮތް ގޮތުން އެހީތެރިވި ފަރާތްތަކަށް އައިޔޫއެމްއެސްޔޫގެ ފަރާތުން ޝުކުރު އަދާ ކުރާ ކަމަށެވެ. އަަދި އުންމީދަކީ އަންނަ އަހަރު މިއަށްވުރެ ފޯރި ގަދަ އަދި ކާމިޔާބު މުބާރާތެއް ބޭއްވުން ކަމަށެވެ.