ދުންފަތާ ދުންފަތުގެ އެކިއެކި ބާވަތްތަކުގެ ބޭނުން ކުރުމަކީ އަޅުގަނޑުމެންގެ ތެރޭގައި އާންމު ކަމެކެވެ. މުޖުތަމައުއަށް މިހާރު ބަލާލިޔަސް ދުންފަތުގެ އިސްތިއުމާލު ނުކުރާ މީހަކު މަދުވާނެއެވެ. އަދި މިކަމަށް ހުށައެޅޭ ޒުވާނުންގެ އަދަދު ވެސް މި އަންނަނީ އިތުރުވަމުންނެވެ. މި ކަމުގެ ސަބަބުން ހަށިގަނޑަށް ގުނާ އަދަދު ނުކުރެވޭހާ ގެއްލުން ވާއިރު މިކަމަކީ ހުއްޓާލުމަށްވެސް ގިނަ ބަޔަކަށް އުނދަގޫ ކަމެކެވެ. ދުންފަތުގެ އިސްތިއުމާލު ކުރުން ހުއްޓާލި ކަމުގައި ވިޔަސް މިކަމުގެ އަސަރުތައް ހަށިގަނޑުގައި ތާއަބަދަށް ދެމިހުރެއެވެ.

ކޮންމެ އަހަރެއްގެ ވެސް މެއި މަހުގެ 31 ވަނަ ދުވަހަކީ ދުންފަތުގެ އިސްތިޢުމާލު ނުކުރާ ދުވަހުގެ ގޮތުގައި ފާހަގަކުރާ ދުވަހެވެ. އެ ދުވަސް ފާހަގަކުރަން ފަށާފައި ވަނީ 1987 ވަނަ އަހަރުއެވެ. އެއީ ދުންފަތުގެ ސަބަބުން ޖެހޭ ބަލިތަކާއި މަރުތައް މަދުކުރުމަށާއި ދުންފަތުގެ ވަބާ ދުނިޔޭގެ ސަމާލުކަމަށް ގެނައުމުގެ މަގުސަދުގައި ޑަބްލިއުއެޗްއޯގެ މެންބަރު ދައުލަތްތަކުން ކަނޑައެޅި ދުވަހެކެވެ.

1987 އަހަރުގެ ވޯލްޑް ހެލްތު އެސެމްބްލީގައި ގަރާރެއް ފާސް ކުރެވުނެވެ. އެ ގަރާރުގައި ވަނީ 1988 ވަނަ އަހަރުގެ އޭޕްރީލް މަހުގެ 7 ވަނަ ދުވަސް 'ނޯ ސްމޯކިން ޑޭ' ގެ ގޮތުގައި ކަނޑައެޅުމަށެވެ. އެއަށްފަހު 1988 ވަނަ އަހަރު ކޮންމެ އަހަރެއްގެ ވެސް މެއި މަހުގެ 31 ވަނަ ދުވަސް "ނޯ ޓޮބޭކޯ ޑޭ' ގެ ގޮތުގައި ފާހަގަކުރުމަށް ގަރާރެއް ފާސްކުރިއެވެ.

ކޮންމެ އަހަރަކު ފާހަގަކުރާ ދުންފަތުގެ އިސްތިޢުމާލު ނުކުރުމުގެ ދުވަހުގެ މަގުސަދަކީ ހަމައެކަނި އޭގެ ނުރައްކާތެރި ކަމާމެދު ދުނިޔެ ހޭލުންތެރި ކުރުވުމެއް ނޫނެވެ. ދުންފަތުގެ ވިޔަފާރިއާއި ދުންފަތުގެ ވަބާއާ ދެކޮޅަށް ޑަބްލިއުއެޗްއޯ އިން ކުރާ މަސައްކަތްތަކާއި ދުޅަހެޔޮ ދިރިއުޅުމެއް ވޭތި ކުރުމަށް ކުރެވިދާނެ މަސައްކަތްތަކާއި މުސްތަގުބަލުގެ ޖީލުތައް ރައްކާތެރި ކުރުމަށް ކުރެވިދާނެ ކަންކަމާ ބެހޭގޮތުން އާންމުން ހޭލުންތެރި ކުރުވުމަކީ ވެސް މި ދުވަހުގެ މަގުސަދެކެވެ.

ކޮންމެ ގޮތަކަށް ދުންފަތުގެ އިސްތިއުމާލު ކުރިއަސް ދުންފަތަކީ ހަށިގަނޑަށް ގެއްލުން ހުރި އެއްޗެކެވެ. އެއްވެސް ބާވަތެއްގެ ދުންފަތެއްގައި ހަށިގަނޑަށް ރައްކާތެރި ފައިދާކުރަނިވި އެއްވެސް މާއްދާއެއް އެކުލެވިގެނެއް ނުވެއެވެ. އެގޮތުން އޭސްޓޯން، ޓާޔާ، ނިކޮޓިން އަދި ކާބަން މޮނޮކްސައިޑަކީ ހަށިގަނޑަށް އެތައްގޮތަކުން ގެއްލުންދޭ މާއްދާތަކެވެ. ތިމާ ބޯ ސިނގިރޭޓްގެ ސަބަބުން ހަމައެކަނި ގެއްލުން ވަނީ ފުއްޕާމެއަށް އެކަންޏެއް ނޫނެވެ. މުޅި ހަށިގަނޑަށެވެ.

ކޮންމެ ސިނގިރޭޓަކުން 1 މިލިގްރާމް ނިކޮޓިން ހަށިގަނޑަށް ވާސިލުވާއިރު، މީހަކު ސިނގިރޭޓެއް ބުއިމުން އެ ސިނގިރޭޓުގައި ހުންނަ މި ވިހަ މާއްދާ އެންމެ 10 ވަރަކަށް ސިކުންތު ތެރޭގައި އެމީހެއްގެ ސިކުނޑިއާ ހިސާބަށް ވާސިލުވެއެވެ. އަދި އެވަގުތު އެމީހަކަށް ވަގުތީ ހިތްހަމަޖެހުމެއް ލިބޭހެން ހީވި ނަމަވެސް އޭގެ ނުރައްކާ މާ ބޮޑެވެ. 

މިކަމުގެ އަވާގައި ޖެހެމުންދާ މީހުންނާއި ޖެހިފައިވާ މީހުން މިކަމުން ސަލާމަތްވާން ގަދައަޅާ މަސައްކަތް ކުރަން އެބަޖެހެއެވެ. ދުންފަތުގެ އިސްތިއުމާލު ކުރުމަކީ އޭގެ ޒާތުގައި ހަށިގަނޑަށް ތަފާތު އެކިއެކި ނޭދެވޭ އަސަރުތަށް ކުރާ ކަމަކަށްވާއިރު އެކަން ހުއްޓާލުމާއެކު އޭގެ އަސަރުތައް ފިލައިގެން ނުދާނެއެވެ. ދުންފަތުގެ އިސްތިއުމާލް ކުރުން ހުއްޓާލުމަށްފަހު ވޭތުވާ ކޮންމެ ގަޑިއަކާ ދުވަހަކާ މަހަކާ އަހަރަކީ ވެސް އެމީހެއްގެ ސިއްހަތު ކުރިން ހުރި ވަރަށް އިޔާދަވުމަށް ދެވޭ ވަގުތެކެވެ. މި އަމަލުން ދުރުވާން ކޮންމެ މީހަކު ވެސް ގަދަ އަޅާ މަސައްކަތް ކުރަން ޖެހެއެވެ.