ޖިންސީ ގޯނާގެ ތުހުމަތުވާ އަންހެން މީހާ ޝަރީއަތް ނިމެންދެން ބަންދުކުރީ ރަނގަޅަށް: ސުޕްރީމް ކޯޓު
31 މެއި 2022 | އަންގާރަ 09:55އޭނާ ބަންދު ކުރީ އެކަށީގެންވާ ގޮތެއްގައި ހެކިތަކަށް ރިއާޔަތްކޮށްގެން
ސުޕްރީމް ކޯޓް- ސުޕްރީމް ކޯޓުން ކުރި ޙުކުމުގައި ބުނެފައިވަނީ އޭނާ ބަންދު ކުރީ އެކަށީގެންވާ ގޮތެއްގައި ހެކިތަކަށް ރިއާޔަތްކޮށްގެން ކަމަށް
ކުޑަ ކުއްޖަކަށް ޖިންސީ ގޯނާ ކުރި މައްސަލައިގައި އައްޑޫ ސިޓީން ހައްޔަރުކުރި އަންހެންމީހާ ޝަރީޢަތް ނިމެންދެން ބަންދުކޮށްފައި ބެހެއްޓުމަށް ހިތަދޫ ކޯޓުން ކުރި ޙުކުމް ހައިކޯޓުންވެސް ދަމަހައްޓާފައިވާއިރު، އެ ޙުކުމަށް ސުޕްރީމް ކޯޓުންވެސް ތާއީދުކޮށްފިއެވެ.
2022 މާރޗް މަހުގެ 25 ގައި ފުލުހުން އެ އަންހެން މީހާ ހައްޔަރުކުރިއެވެ. ނަމަވެސް އޭނާގެ މައްޗަށް ދައުވާ ނުކުރަން ނިންމާފައިވުމާއެކު، އޭނާ މިހާރު ހުރީ ދޫކޮށްލާފައެވެ.
އޭރު އޭނާ ޝަރީއަތް ނިމެންދެން ބަންދުކޮށްފައި ބެހެއްޓުމަށް ހިތަދޫ މެޖިސްޓްރޭޓް ކޯޓުންވަނީ އަމުރު ނެރެފައެވެ. އުމުރުން 59 އަހަރުގެ އެ އަންހެންމީހާ ބަންދުގައި ބަހައްޓަން ނެރުނު އަމުރު އޭނާގެ ފަރާތުން ހައިކޯޓުގައި އިސްތިއުނާފު ކުރުމުން 20 އޭޕްރީލްގައި ބޭއްވި އަޑުއެހުމުގައި އެ އަމުރު ދަމަހައްޓާފައިވަނީ ހިތަދޫ ކޯޓުގެ އަމުރުގައި ގޯހެއް ނެތްކަމަށް ނިންމުމަށްފަހުއެވެ.
ސުޕްރީމް ކޯޓުން ކުރި ޙުކުމުގައި ބުނެފައިވަނީ އޭނާ ބަންދު ކުރީ އެކަށީގެންވާ ގޮތެއްގައި ހެކިތަކަށް ރިއާޔަތްކޮށްގެން ކަމަށެވެ. އެގޮތުން އެ ކުއްޖާގެ މަންމަގެ ބަޔާނާއި މެޑިކޯ ލީގަލް ރިޕޯޓް ހުށައަޅާފައިވާކަން ޙުކުމުގައި ފާހަގަކޮށްފައިވެއެވެ.
އުމުރުން ހަ އަހަރުގެ އަންހެން ކުއްޖަކަށް ޖިންސީ ގޯނާކުރުމުގެ ތުހުމަތުގައި ހައްޔަރުކޮށްފައިވާ އަންހެން މީހާއާއި ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) ގެ ޓީމަކުންވެސް ވަނީ ބައްދަލުކޮށްފައެވެ. އަދި އެއަންހެން މީހާގެ ފަރާތުން ކޮމިޝަނަށް ހުށަހަޅާފައިވާ މައްސަލައެއް އެ ކޮމިޝަނުން ތަހުގީގު ކުރަމުންދާ ކަމަށްވެސް އެޗްއާރްސީއެމުން ބުނެފައިވެއެވެ.
އޭރު އޭނާ ބަންދުކުރުމާއި ދެކޮޅަށް އައްޑޫގައި ސިލްސިލާ މުޒާހަރާތައްވެސް ކޮށްފައިވެއެވެ. އެމީހާއަށް އިންސާފު ހޯދައި ދިނުމަށް ގޮވާލައި އައްޑޫގެ ގިނަ ބަޔަކު ސޮއިކޮށްފައިވާ ޕެޓިޝަންތަކެއް ކަމާގުޅޭ އިދާރާތަކަށް ވެސް ވަނީ ހުށަހަޅާފައެވެ.
