ސެކިއުރިޓީ ދާއިރާގައި މަސައްކަތްކުރާ ސެކިއުރިޓީ އޮފިސަރުން ތަމްރީނުކުރުމާއި ގުޅޭގޮތުން ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓާއި މިނިސްޓްރީ އޮފް އިކޮނޮމިކް ޑިވެލޮޕްމަންޓާއެކު ފަހުމުނާމާއެއްގައި ސޮއިކޮށްފިއެވެ.
މިނިސްޓްރީ އޮފް އިކޮނޮމިކް ޑިވެލޮޕްމަންޓްގައި ބޭއްވި ރަސްމިއްޔާތެއްގައި ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓްގެ ފަރާތުން ސޮއިކުރެއްވީ ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓްގެ ރެކްޓަރ އެސިސްޓަންޓް ކޮމިޝަނަރ އޮފް ޕޮލިސް އިސްމާޢީލް ނަވީންއެވެ. އަދި އިކޮނޮމިކް ޑިވެލޮޕްމަންޓްގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް އިކޮނޮމިކް ޑިވެލޮޕްމަންޓް ނީޒާ އިމާދުއެވެ.
ސޮއިކުރި މި ފަހުމުނާމާގެ ދަށުން، ސެކިއުރިޓީ ދާއިރާގައި މިިހާރުވެސް ހަރަކާތްތެރިވާ ސެކިއުރިޓީ އޮފިސަރުންނާއި އެ ދާއިރާއިން ޒުވާނުންނަށް ވަޒީފާގެ ފުރުސަތުތައް ފަހިކޮށްދީ، ސެކިއުރިޓީ ދާއިރާއަށް ހާއްސަކޮށްގެން ސެކިއުރިޓީ އޮފިސަރސް ޓްރެއިނިންގ ޕްރޮގްރާމެއް ހިންގުމަށް ވަނީ ހަމަޖެހިފައެވެ. އަދި އެ ދާއިރާއާ ގުޅުންހުރި އިތުރު ތަމްރީނު ޕްރޮގްރާމުތައް ހިންގުމާއި ސެކިއުރިޓީ ދާއިރާ އިތުރަށް ހަރުދަނާކޮށް، ޕްރޮފެޝަނަލް ކުރުމަށް ދެފަރާތް ގުޅިގެން މަސައްކަތްކުރުމަށް ހަމަޖެހިފައިވެއެވެ.
