ޓެކަރސް މުބާރާތުގެ ފައިނަލް ޖޫން 10ގައި
30 މެއި 2022 | ހޯމަ 16:44މުބާރާތުގެ ފައިނަލުގައި ބައްދަލުކުރާނީ ގދ. ވާދޫއާއި ހދ. ކުޅުދުއްފުށި
ޓެކަރސް މައިލޯ ޗެމްޕިއަންޝިޕް މޯލްޑިވްސް ކަޕް
ޓެކަރސް މައިލޯ ޗެމްޕިއަންޝިޕް މޯލްޑިވްސް ކަޕްގެ ފައިނަލް މެޗު މިއަންނަ ޖޫން މަހުގެ 10 ވަނަ ދުވަހަށް ތާވަލުކޮށްފިއެވެ.
މުބާރާތުގެ ފައިނަލްގައި ބައްދަލުކުރާނީ އުތުރު ޒޯނުގެ ޗެމްޕިއަން ހދ. ކުޅުދުއްފުއްޓާއި ދެކުނު ޒޯނުގެ ޗެމްޕިއަން ގދ. ވާދޫއެވެ. ފައިނަލް މެޗު އޮންނާނީ ޖޫން 10 ވަނަ ދުވަހު ކުޑަހެންވޭރު ފުޓްސަލް ދަނޑުގައެވެ.
ކުޅުދުއްފުށީ ޓީމުން މުބާރާތުގައި އަތޮޅުގެ ޗެމްޕިއަންކަން ހޯދީ، ފައިނަލުގައި 4-2ން ހަނިމާދޫ ބަލިކޮށްގެންނެވެ. އޭގެ ފަހުން އުތުރު ޒޯނުގެ ޗެމްޕިއަންކަން އެޓީމުން ހޯދީ ފޯރިގަދަ ފައިނަލްގައި ޕެނަލްޓީ ޖަހައިގެން 11-10ން ރ. ދުވާފަރު ބަލިކޮށްގެންނެވެ.
ގދ އަތޮޅުން އިތުރު ޓީމެއް ބައިވެރިނުވާތީ، ވާދޫ ޓީމު ވަނީ ޒޯން 4 ބްލޮކް 1ގެ ފައިނަލަށް ދަތުރުކޮށްފައެވެ. މި ފައިނަލުގައި ވާދޫ އަތުން ގއ. ކޮނޑޭ ބަލިވީ 2-0ންނެވެ. ޒޯން 4ގެ ޗެމްޕިއަންކަން ވާދޫން ކާމިޔާބުކުރީ ފުވަމުލަކާ ވާދަކޮށް 2-1ންނެވެ. ދެކުނުގެ ޗެމްޕިއަންކަން ވާދޫއަށް ލިބުނީ، ފައިނަލުގައި އެޓީމާ ވާދަކުރަން އޮތް މ. މުލަކު ޓީމު މުބާރާތް ދޫކޮށްލުމުންނެވެ.
