ވައިކަރަދޫގެ މެމްބަރު ޒިޔާދުއަށް ނޭނގި އޭނާގެ ނަން އެމްއެންޕީގައި
އެމްޑީޕީ ނޫން ޕާޓީއަކަށް ސޮއިކުރައްވަން ނިންމަވާފައިވެސް ނުވާނެކަމަށް ޒިޔާދު ވިދާޅުވި
ވައިކަރަދޫ ދާއިރާގެ މެމްބަރު ހުސައިން ޒިޔާދު
ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ހުސައިން ޒިޔާދުގެ ނަން އޭނާއަށް ނޭނގި މޯލްޑިވްސް ނޭޝަނަލް ޕާޓީ (އެމްއެންޕީ)ގައި ރަޖިސްޓްރީކޮށްފިއެވެ.
ޒިޔާދުއަކީ އެމްޑީޕީގެ ޓިކެޓުގައި މަޖިލީހަށް ހޮވިވަޑައިގެންނެވި މެމްބަރެކެވެ. އޭނާގެ ނަން އެހެން ޕާޓީއެއްގައި އޮތްކަން އެނގުނީ އާދީއްތަ ދުވަހުގެ ރޭ ބޭއްވި އެމްޑީޕީގެ ގައުމީ މަޖިލީހުގައި، ނަން ރަޖިސްޓްރީކޮށްފައި އޮތް ޕާޓީއެއް ބެލުމުންކަމަށް ޒިޔާދު ބުންޏެވެ.
"ރާއްޖެ އެމްވީ"އަށް މައުލޫމާތު ދެއްވަމުން ޒިޔާދު ވިދާޅުވީ، އިލެކްޝަންސް ކޮމިޝަނުގެ ދަފްތަރުގައި އޭނާގެ ނަން އެހެން ޕާޓީއެއްގައި އޮތްނަމަވެސް އެހެން ޕާޓީއަކަށް ސޮއިނުކުރައްވާކަމަށެވެ. އަދި އެފަދަ ވިސްނުންފުޅެއްވެސް ނުގެންގުޅުއްވާކަމަށް އޭނާ ވިދާޅުވިއެވެ.
މި މައްސަލަ ހައްލު ކޮށްދެއްވުންއެދި އަންގާރަ ދުވަހު އީސީގެ ބޭފުޅުންނާ ބައްދަލުކުރެއްވުމަށް ހަމަޖެހިފައިވާ ކަމަށާއި، އޭގައި އީސީގެ މައްސަލައެއް އުޅޭކަމަށްވެސް ޒިޔާދު ވިދާޅުވިއެވެ. އޭނާ ވިދާޅުވީ އެމްޑީޕީގެ މެމްބަރެއްގެ ގޮތުގައި މަޖިލީހުގައި ހުންނެވި މެމްބަރެއްގެ ރަޖިސްޓްރީ އެހެން ޕާޓީއަކަށް ބަދަލުވާއިރު އެކަން އީސީއަށް އެނގެންޖެހޭނެކަމަށެވެ.
މިކަމާ ގުޅޭގޮތުން އެމްއެންޕީއާ ވެސް ވާހަކަދެކެވިފައިވާކަމަށް ޒިޔާދު ވިދާޅުވިއެވެ.
އެމްޑީޕީގެ ދަފްތަރުގައި ތިބި މެމްބަރުންގެ ތެރެއިން އީސީގެ ދަފްތަރުގައި ނެތް މެމްބަރުން ޕާޓިގެ ލިސްޓުން އުނިކުރަން އެ ޕާޓީން ވަނީ އާދީއްްތަ ދުވަހުގެ ރޭ ބޭއްވި ގައުމީ މަޖިލީހުގައި ނިންމާފައެވެ.
