އިންޑިއަން ޕްރިމިއަރ ލީގު (އައިޕީއެލް)ގެ ޗެމްޕިއަންކަން ފުރަތަމަ ފަހަރަށް ގުޖުރާތު ޓައިޓަންސް އިން ހޯދައިފިއެވެ.

މުބާރާތުގައި އަލަށް ވާދަކުރި ގުޖުރާތުން ޗެމްޕިއަންކަން ހޯދީ ފައިނަލުގައި ރާޖަސްތާން ރޯޔަލް ބަލިކޮށްގެންނެވެ. ފައިނަލްގައި ރާޖަސްތާނުގެ މައްޗަށް ގުޖުރާތުން ކުރި ހޯދީ ހަތް ވިކެޓުންނެވެ.

ރޭ ކުޅުނު ފައިނަލް އޮތީ އަހުމަދުއާބާދުގެ ނަރެންދުރަ މޯދީ ސްޓޭޑިއަމްގައެވެ. މިއީ ދުނިޔޭގެ އެންމެ ބޮޑު ކްރިކެޓް ސެޓޭޑިއަމްއެވެ. ރޭގެ ފައިނަލް މެޗު ބަލަން ރެކޯޑު އަދަދަކަށް މީހުން ވަނީ ވަދެފައެވެ. 132،000 މީހުންގެ ޖާގައިގެ ސްޓޭޑިއަމަށް ރޭ ވަނީ 104،859 މީހުން ވަދެފައެވެ.

ފައިނަލްގައި ފުރަތަމަ ބެޓް ކުރީ ރާޖަސްތާނުންނެވެ. މުބާރާތުގައި އެންމެ ގިނަ ލަނޑު އެއްކުރި ކުޅުންތެރިޔާ ހުރީ އެ ޓީމުގައެވެ. އެއީ ޖޯޝް ބަޓްލާއެވެ. ފައިނަލްގައި އޭނާއަށް ހެދުނީ 35 ބޯޅައިން 39 ލަނޑެވެ. އެ ޓީމުގެ ޔަޝަޝްވީ ޖޭސްވާލަށް ހެދުނީ 16 ބޯޅައިން 22 ލަނޑެވެ. 20 އޯވަރަލްގެ ތެރޭގައި ރާޖަސްތާނަށް ނުބައިކުރެވުނީ ނުވަ ކުޅުންތެރިންނެވެ. އަދި އެ ޓީމަށް ހެދުނީ 130 ލަނޑެވެ.

ގުޖުރާތުން ފުރަތަމަ ކުޅެން އެރި ޕާޓްނާޝިޕްގައި ހިމެނެނީ ވިރިއްދިމަން ސާހާ އާއި ޝުބްމަން ގިލްއެވެ. މީގެ ތެރެއިން ފުރަތަމަ ކުޅެން އެރި ވިރިއްދިމަން ވަނީ ފަސް ލަނޑުން ނުބައިވެފައެވެ. ދެ ވަނަ އަށް ކުޅެން އަރައި ޝުބްމަން ވަނީ ނުބައިނުވެ 43 ބޯޅައިން 45 ލަނޑު ހަދާފައެވެ. ގުޖުރާތުން ފަހުން ކުޅެން އެރީ ހާޑިކް ޕާންޑްޔާ އާއި ޑޭވިޑް މިލާއެވެ. ހާޑިކް ވަނީ 34 ލަނޑު ހަދާފައެވެ. އަދި ޑޭވިޑް ވަނީ 32 ލަނޑު ހަދާފައެވެ. މުބާރާތުގެ ޗެމްޕިއަންކަން ގުޖުރާތުން ހޯދީ 18.1 އޯވަރުގެ ތެރޭގައި ތިން ކުޅުންތެރިން ނުބައިވެ 133 ލަނޑު ހަދައިގެންނެވެ.

ފައިނަލްގެ ކުރިން ގުޖުރާތުން ވަނީ ދެ ފަހަރެއްގެ މަތިން ރާޖަސްތާން ބަލިކޮށްފައެވެ. އެއީ ލީގު ބުރުގައި ކުޅުނު މެޗާއި އަދި ފުރަތަމަ ޕްލޭއޮފްގައި ކުޅުނު މެޗުގައެވެ.