ނޭޕާލް ތާރާ އެއަރގެ ފްލައިޓް، މުސްޓަންގްއިން ފެނުނު

ނޭޕާލްގެ ތާރާ އެއަރގެ ފްލައިޓް, ނޭޕާލްގެ ގަންދަކި ޕްރޮވިންސްގެ މުސްޓަންގުން ފެނުނުކަމަށް ރިޕޯޓުތައް ބުނެފިއެވެ.

ނޭޕާލްގެ ޗީފް ޑިސްޓްރިކްޓް އޮފިސަރެއް ކަމަށްވާ ނެތުރާ ޕްރަޝާދު ޝަރްމާއާ ހަވާލާދީ ޓައިމްސް އޮފް އިންޑިއާގައި ރިޕޯޓުކޮށްފައިވާ ގޮތުން، މުސްޓަންގް ޑިސްޓްރިކްޓުން އުދުހިފައި ގޮސް ދައުލަގިރި ފަރުބަދަ ކައިރިން ތާރާ އެއަރގެ ފްލައިޓް ދަތުރުކުރަމުން ދަނިކޮށް ވަނީ ފެނިފައެވެ.

ފްލައިޓް ދަތުރުކުރީ ޕޮޚާރާއިން ޖޮމްސަންއަށް ދިއުމަށް ކަމަށް، އެއަރލައިންގެ ތަރުޖަމާނު ސުދާޝަންވަނީ އޭއެފްޕީއަށް މައުލޫމާތުދެއްވާފައެވެ. ފްލައިޓްގައި ތިބީ 19 ފަސިންޖަރުންނާއި 3 ކްރޫއިންކަމަށް އޭނާ ވިދާޅުވިއެވެ. އޭގެތެރޭގައި އިންޑިއާގެ 4 މީހުންނާއި ޖަރުމަނުގެ 2 މީހުންނާއި ނޭޕާލްގެ 16 މީހުން ހިމެނެއެވެ. މީގެތެރޭގައި 7 އަންހެނުން ތިބިކަމަށްވެސް އެ އެއަރލައިނުން ބުނެއެވެ.

ނޭޕާލްގެ މިނިސްޓްރީ އޮފް ހޯމް އެފެއަރޒްގެ ތަރުޖަމާނު ވިދާޅުވީ ގެއްލުނު ފްލައިޓް ހޯދުމުގެ އޮޕަރޭޝަން މިހާރު ފަށާފައިވާ ކަމަށާއި، ދެ ފްލައިޓެއް އެ އޮޕަރޭޝަންގައި ހަރަކާތްތެރިވަމުންދާ ކަމަށެވެ. އެހެންނަަމަވެސް މޫސުން ގޯސްވުމުގެ ސަބަބުން ފްލައިޓް ފެނުމުގެ ފުރުސަތު ކުޑަކަމަށެވެ.

ރިޕޯޓުތައް ބުނާ ގޮތުން، ފްލައިޓްގެ ޕައިލެޓުގެ ފޯނު، ޖީޕީއެސް މެދުވެރިކޮށް ނޭޕާލް ޓެލެކޮމްއަށް ހޯދިއްޖެނަމަ ފްލައިޓް ހޯދުމުގެ ފުރުސަތު އެބައޮތެވެ.

ފްލައިޓްގަައި 22 މީހުން ތިބިކަމަށް އެ އެއަރލައިނާ ހަވާލާދީ ރިޕޯޓުކޮށްފައިވެއެވެ. ނޭޕާލްގެ ހުޅަނގުގައި އޮންނަ އަވަށެއް ކަމަށްވާ ޕޮޚާރާއިން ހެނދުނު 9:55ގައި ފްލައިޓް ނައްޓާލިތާ މާގިނައިރެއްނުވެ އެއަރ ޓްރެފިކް ކޮންޓްރޯލާ ގުޅުން ކެނޑިފައިވާކަމަށް އެ އެއަރލައިނުން ބުނެއެވެ.