ސީޒަންގެ ފަހުބަޔަށް އީގަލްސް ނުކުންނާނީ ބިދޭސީ އިތުރު ދެ ކުޅުންތެރިންނާއެކު!
29 މެއި 2022 | އާދީއްތަ 13:44އަލަށް ގުޅުނީ ފޯވާޑަކާއި މިސްރު ޑިފެންޑަރެއް
އީގަލްސްއާ އަލަށް ގުޅޭ ޑިފެންޑަރ ސޯބީ، ސަލާހުއާއެކު
ދިރާގު ދިވެހި ޕްރިމިއަރ ލީގު ތާވަލްގެ ދެވަނާގައި އޮތް ކްލަބް އީގަލްސްއިން ސީޒަންގެ ފަހު ބަޔަށް ޓީމް ވަރުގަދަކުރަން ބިދޭސީ އިތުރު ދެ ކުޅުންތެރިންގެ ސޮއި ހޯދައިފިއެވެ.
އީގަލްސްއިން ޓީމް ވަރުގަދަ ކުރަން ޓީމަށް އިތުރުކުރީ ޑިފެންޑަރަކާއި, ފޯވާޑެކެވެ. މީގެތެރެއިން ފޯވާޑަކީ ރާއްޖޭގެ ގިނަ ކްލަބްތަކަކަށް ކުޅެފައިވާ ސްޕެއިންގެ އެންހެލް މުނޯޒްއެވެ. ވެލެންސިޔާއާއި, މާޅޮހާއި, ގްރީން ސްޓްރީޓްސްއަށްވެސް ކުޅެފައިވާ މުނޯޒް މިސީޒަން ފެށީވެސް ގްރީންއާއެކުއެވެ. އެކަމަކު އަންނަ މަހުގެ 21 ވަނަ ދުވަހު ލީގު އަލުން ފަށާއިރު، މުނޯޒް ފެންނާނީ އީގަލްސްއިންކަން އެކްލަބުން ވަނީ ޔަގީންކޮށްދީފައެވެ.
އީގަލްސްއާ ދެން ގުޅުނީ މިސްރުގެ ޑިފެންޑަރެކެވެ. މިސްރުގެ ގައުމީ ޓީމާއި އުމުރުފުރާ ޓީމްތަކަށްވެސް ކުޅެފައިވާ އަހުމަދު ސޯބީގެ ސޮއި ލިބިފައިވާކަންވެސް އީގަލްސްއިން ވަނީ ޔަގީންކޮށްދީފައެވެ. އެކަމަކު އޭނާ އަދި ރާއްޖެއެއް ނާދެއެވެ. އޭނާއަކީ ކަނާތު ފަޅިން ފަަހަތަށް، އަދި ސެންޓްރަލް ޑިފެންޑަރަކަށްވެސް ކުޅެވޭ ކުޅުންތެރިއެކެވެ. އީގަލްސް ދޫކޮށްދިޔަ ކުޅުންތެރިއަކީ ކީޕަރު ތޯހާއެވެ. އޭނާ ކްލަބް ދޫކޮށްލުމުން އެންމެފަހުން ލީގުގެ މެޗުތަކުގައިވެސް ގޯލް ބެލެހެއްޓީ ޒުވާން ކީޕަރު ހަސަން އަލީފް އިބްރާހީމްއެވެ. އަލަށް ގުޅުނު ދެ ކުޅުންތެރިންނާއެކު އީގަލްސްއިން އަލުން ލީގު ފަށާނީ ބިދޭސީ ތިން ކުޅުންތެރިންނާއެކުއެވެ. އިތުރު ކުޅުންތެރިއެއްގެ ސޮއި މިރޭ ހޯދޭތޯ ކްލަބުން ދަނީ މަސައްކަތްކުރަމުންނެވެ.
އީގަލްސް ލީގު ތާވަލްގެ ދެވަނާގައި އޮތީ 28 ޕޮއިންޓާއެކުއެވެ. އެއްވަނާގައި މާޒިޔާ އޮތީ 33 ޕޮއިންޓާއެކުއެވެ.
