22 މީހުންނާއެކު ދަތުރުކުރި ފްލައިޓެއް ގެއްލިގެން ހޯދަނީ
29 މެއި 2022 | އާދީއްތަ 09:28ފްލައިޓް ދަތުރުކުރީ ޕޮޚާރާއިން ޖޮމްސަންއަށް ދިއުމަށް
ތާރާ އެއަރގެ ފްލައިޓެއް: ފްލައިޓުން ދަތުރުކުރި މީހުންގެ ތެރޭގައި 7 އަންހެނުން ހިމެނޭ
ނޭޕާލްގެ ތާރާ އެއާރގެ ފްލައިޓެއް ވީނުވީ ނޭނގި ގެއްލިފައިވާ ކަމަށް ރިޕޯޓުކޮށްފިއެވެ.
ފްލައިޓްގަައި 22 މީހުން ތިބިކަމަށް އެ އެއަރލައިނާ ހަވާލާދީ ރިޕޯޓުކޮށްފައިވެއެވެ. ނޭޕާލްގެ ހުޅަނގުގައި އޮންނަ އަވަށެއް ކަމަށްވާ ޕޮޚާރާއިން ހެނދުނު 9:55ގައި ފްލައިޓް ނައްޓާލިތާ މާގިނައިރެއް ނުވެ އެއަރ ޓްރެފިކް ކޮންޓްރޯލާއި ގުޅުން ކެނޑިފައިވާކަމަށް އެ އެއަރލައިނުން ބުނެއެވެ.
ފްލައިޓް ދަތުރުކުރީ ޕޮޚާރާއިން ޖޮމްސަންއަށް ދިއުމަށް ކަމަށް އެއަރލައިންގެ ތަރުޖަމާނު ސުދާޝަންވަނީ އޭއެފްޕީއަށް މައުލޫމާތުދެއްވާފައެވެ. ފްލައިޓްގައި ތިބީ 19 ފަސިންޖަރުންނާ 3 ކްރޫއިންކަމަށް އޭނާ ވިދާޅުވިއެވެ. އޭގެތެރޭގައި އިންޑިއާގެ 4 މީހަކާއި ޖަރުމަނުގެ 2 މީހަކާއި ނޭޕާލްގެ 16 މީހުން ހިމެނެއެވެ. މީގެތެރޭގައި 7 އަންހެނުން ތިބިކަމަށްވެސް އެއަރލައިނުން ބުނެއެވެ.
ނޭޕާލްގެ މިނިސްޓްރީ އޮފް ހޯމް އެފެއާޒްގެ ތަރުޖަމާނު ވިދާޅުވީ ގެއްލުނު ފްލައިޓް ހޯދުމުގެ އޮޕަރޭޝަން މިހާރު ފަށާފައިވާ ކަމަށާއި، މިހާރު 2 ފްލައިޓް އެ އޮޕަރޭޝަންގައި ހަރަކާތްތެރިވަމުން އަންނަ ކަމަށެވެ. އެހެންނަަމަވެސް މޫސުން ގޯސްވުމުގެ ސަބަބުން ފެނުމުގެ ފުރުސަތު ކުޑަކަމަށެވެ.
އެ ސަރަހައްދުގައި ބޯ ވިލާގަނޑެއް އުފެދިފައިވާކަމަށް ނޭޕާލްގެ މޫސުމާ ބެހޭ އިދާރާއިން ވަނީ ބުނެފައެވެ.
