ސްޕެއިންގެ ރެއާލް މެޑްރިޑަށް ކުޅެމުން އަންނަ ބްރެޒިލްގެ ލެފްޓް ބެކް މާސެލޯ 15 އަހަރަށްފަހު އެ ޓީމު ދޫކޮށްލަން ނިންމައިފިއެވެ.

ރެއާލާއެކު މާސެލޯ ހާދާފައިވާ އެއްބަސްވުމުގެ މުއްދަތު ޖޫން މަހުގެ ނިޔަލަށް ހަމަވާނެއެވެ. އަދި އޭނާ ރެއާލާއެކު އިތުރު އެއްބަސްވުމެއް ނުހަދާނެއެވެ. އޭނާ ރެއާލް ދޫކޮށްލާނީ ފްރީ ޓްރާންސްފާއެއްގައެވެ.

އުމުރުން 34 އަހަރުގެ މާސެލޯ ރެއާލާ ގުޅުނީ 2007 ވަނަ އަހަރުއެވެ. އޭގެ ފަހުން އޭނާ ވަނީ އެ ޓީމަށް 386 މެޗު ކުޅެދީފައެވެ. އަދި އޭނާ ވަނީ އެ ޓީމަށް 26 ލަނޑު ޖަހައިދީފައެވެ. ކުލަބް ދޫކޮށްލުމާ ގުޅޭ ގޮތުން މީގެ ކުރިން މާސެލޯ ބުނީ އޭނާގެ ވިސްނުމަކީ އަދިވެސް ރެއާލްގައި މަޑުކުރުންކަމަށެވެ. އަދި އޭނާ ބޭނުންވަނީ ރެއާލާއެކު ކުރިއަށް ދާން ކަމަށާއި، އެއީ އޭނާ 50،000 ފަހަރު ބުނެފައިވާ ވާހަކައެއް ކަމަށެވެ. ކުރިމަގާ ގުޅޭ ގޮތުން ޔުއެފާ ޗެމްޕިއަންސް ލީގުގެ ފައިނަލަށްފަހު އޭނާ ރެއާލާ ވާހަކަ ދައްކާނެ ކަމަށް ވެސް މާސެލޯ ބުނެފައިވެއެވެ.

ޗެމްޕިއަންސް ލީގުގެ ފައިނަލަށްފަހު މާސެލޯ ބުނީ ރޭގެ މެޗަކީ އޭނާ ރެއާލާއެކު ކުޅުނު ފަހު މެޗު ކަމަށެވެ. މާސެލޯގެ ކެޕްޓަން ކަމުގެ ދަށުން ރެއާލުން ރޭ ވަނީ 14 ވަނަ ފަހަރަށް ޔުއެފާ ޗެމްޕިއަންސް ލީގުގެ ތަށި އުފުލާލާފައެވެ. އަދި އޭނާގެ ކެޕްޓަން ކަމުގެ ދަށުން އެ ޓީމު ވަނީ މި ސީޒަނުގެ ލަލީގާ ވެސް ހޯދާފައެވެ.

ތާރީޚީ ކާމިޔާބަށްފަހު މާސެލޯ ރެއާލް ދޫކޮށްލާއިރު، އޭނާ ވަނީ އެ ޓީމާއެކު 25 ތައްޓެއް ހޯދާފައެވެ. އޭގެ ތެރޭގައި ލަލީގާ ހަ ފަހަރު، ކޮޕަ ޑެލްރޭ ދެ ފަހަރު، ސްޕެނިޝް ސުޕަ ކަޕް ފަސް ފަހަރު، ޔުއެފާ ޗެމްޕިއަންސް ލީގު ފަސް ފަހަރު، ޔުއެފާ ސުޕަ ކަޕް ތިން ފަހަރު އަދި ފީފާ ކުލަބް ވޯލްޑް ކަޕް ހަތަރު ފަހަރު ހޯދިއެވެ.