މާލޭގައި 44 ގްރޫޕް، ނުރައްކާތެރިކަން ބޮޑު 9 ގްރޫޕެއް ހަރަކާތްތެރިވޭ: ފުލުހުން
އަތޮޅުތަކުގައި ގޭންގުތައް ފެތުރުމުގެ ބިރު އެބައޮތްކަމަށް ފުލުހުން ބުނޭ
ފުލުހުންގެ އިސް ބޭފުޅުން
މާލޭގައި އެކަނިވެސް 44 ގްރޫޕެއް ހަރަކާތްތެރިވާ ކަމަށާއި, މީގެ ތެރެއިން ނުރައްކާތެރިކަން ބޮޑު 9 ގްރޫޕަކުން ހަރަކާތްތެރިވާކަމަށް ފުލުހުން ބުނެފިއެވެ.
އއ. އުކުޅަހުގައި ކުރިއަށްދާ "ވިއަވަތި ރާއްޖެ" ކޮންފަރެންސްގައި ފުލުހުން ހުށަހެޅި ޕްރެޒެންޓޭޝަނުގައި، ގޭންގުތަކާއި އެ ގޭންގުތައް އޮޕަރޭޓްކުރަމުން އަންނަ ގޮތްތައް ބައިވެރިންނާ ހިއްސާ ކުރިއެވެ. އެގޮތުން، މާލޭގައި ގިނަ އަދަދެއްގެ ގޭންގުތައް ހަރަކާތްތެރިވަމުން އަންނައިރު، ގޭންގުތައް އަތޮޅު ތެރެއަށް ފެތުރިދާނެކަމުގެ ބިރު އެބައޮތްކަމަށް ވެސް ފުލުހުން ބުންޏެވެ.
ފުލުހުން މައުލޫމާތުދޭ ގޮތުގައި، މާލެ ފިޔަވައި ރާއްޖޭގެ އެހެން އަތޮޅުތަކުގެ ތެރެއިން އެންމެ ގިނައިން ގޭންގުތައް ހަރަކާތްތެރިވާކަން ފާހަގަ ކުރެވިފައިވަނީ ދެކުނުގެ އަތޮޅުތަކުގައެވެ. މެދުރާއްޖެތެރެއާއި އުތުރުގެ އަތޮޅުތަކުގައި ގޭންގުގެ ހަރަކާތްތައް މިހާތަނަށް ފާހަގަކުރެވިފައި ނުވާކަމަށްވެސް ފުލުހުން ވަނީ ބުނެފައެވެ.
މާލޭގައި ހަރަކާތްތެރިވާ ގޭންގުތަކަށް ބަލާއިރު، މިހާތަނަށް 2800 މީހުން އެ ގޭންގުތަކުގައި އުޅޭކަމަށާއި، އޭގެ ތެރޭގައި 60 ކުޑަކުދިން ހިމެނޭކަމަށް ވެސް ފުލުހުން ބުންޏެވެ. މި ގޭންގުތަކުގެ އިސްސަފުގައި އުތުރާއި މެދުރާއްޖެތެރޭގެ މީހުން ވެސް އިސްކޮށް ހަރަކާތްތެރިވާކަން ފުލުހުން ފާހަގަކުރެއްވިއެވެ.
ފުލުހުން ބުނީ މާލޭގައި އުޅޭ ގޭންގުތަކުގައި އެކި ރަށްރަށުގެ މީޙުން އިސްކޮށް ހަރަކާތްތެރިވާތީ އެ ރަށްތަކުގައި ވެސް ގޭންގު ހަރަކާތްތަށް ފެތުރުމަކީ އޮތް ބިރެއް ކަމަށެވެ.
ކުރިއާ އަޅައިބަލާއިރު ގޭންގުތަކުގެ މީހުން ހަމަލާ ދިނުމަށް ގެންގުޅޭ ހަތިޔާރުތައް ތަފާތުވެފައިވާ ކަމަށްވެސް ފުލުހުން ބުންޏެވެ. އެގޮތުން، ކުރިން ދަގަނޑާއި ކަނޑި ފަދަ ތަކެތި ހިފައިގެން މާރާމާރީ ހިންގިއިރު، މިހާރު ގިނަ ގޭންގުތަކުން ބޭނުން ކުރަނީ ފޮރުވައިގެން ގެންގުޅެވޭފަދަ ހަތިޔާރުކަމަށް ފުލުހުން ބުންޏެވެ.
ގޭންގުތަކުން އެންމެ ފުޅާ ދާއިރާއެއްގައި ކުރާ ވިޔަފާރިއަކީ މަސްތުވާތަކެތީގެ ވިޔަފާރިކަން ފާހަގަކޮށް ފުލުހުން ބުނީ، މަސްތުވާތަކެތި ވިއްކާ ބޮޑުން ތަފާތު އެހެން ވިޔަފާރިތައް ކުރަމުންގެންދާ ކަމަށެވެ. އަދި އެކި ގޮތްގޮތުން ނުފޫޒު ފޯރުވުމަށް ސިޔާސީ ފަރާތްތަކާ ގުޅުން ބަދަހިކުރަމުންދާކަމާއި، އަދި ޝަރުއީ ދާއިރާއަށް ނުފޫޒު ފޯރުވުމަށް ވަކީލުންނަށް ގިނަ އަދަދެއްގެ ފައިސާ ހުށަހަޅާކަން ފާހަގަ ކުރެވިފައިވާ ކަމަށް ވެސް ފުލުހުން ބުންޏެވެ.
ފުލުހުންގެ ތަފާސްހިސާބުތައް ދައްކާގޮތުގައި، ގޭންގު މާރާމާރީތަކުގައި 31 މީހަކު މަރާލާފައިވާއިރު މީގެ ތެރެއިން 9 މީހުންނަކީ ގޭންގުތަކާ ގުޅުން ނެތް ބައެއް ކަމަށާއި، އެ މީހުން މަރާލާފައިވަނީ "އޮޅިގެން"ކަމަށް ފުލުހުން ބުންޏެވެ.
