ކައުންސިލްތަކަށް ޕީއޯއެސް މެޝިންތަކުން ފައިސާ ދެއްކޭގޮތް ހަމަޖައްސައިފި
މިއިންތިޒާމު ހަމަޖެއްސުމަށްޓަކައި ކައުންސިލްތަކުން ބޭންކު އޮފް މޯލްޑިވްސް އަށް ހުށަހަޅައިގެން ފިނޭންސް މިނިސްޓްރީގެ އިތުރު ހުއްދައަކާ ނުލައި ޖޫން 1ން ފެށިގެން ކުރިޔަށްގެންދެވޭނެ
ބޭންކް އޮފް މޯލްޑިވްސް (ބީއެމްއެލް) ޕީއޯއެސް މެޝިން
ބޭންކް އޮފް މޯލްޑިވްސްގެ މޯބައިލް ޕޮއިންޓް އޮފް ސޭލް (ޕީއޯއެސް) މެދުވެރިކޮށް ކައުންސިލްތަކަށް ފައިސާ ދެއްކޭނެ ގޮތް ފިނޭންސް މިނިސްޓްރީން ހަމަޖައްސައިފިއެވެ.
ފިނޭންސް މިނިސްޓްރީން ބުނީ ޑިޖިޓަލް ވަސީލަތްތައް މެދުވެރިކޮށް ދެވޭ މާލީ ޚިދުމަތްތައް ކުރިއަރުވައި ރާއްޖޭގެ އިގްތިޞާދުގައި ޗެކާއި ނަގުދު ފައިސާއަށް ބަރޯސާވާ މިންވަރު ކުޑަކުރުމުގެ ގޮތުން ލޯކަލް ކައުންސިލްތަކުން ބަލައިގަންނަ ފައިސާ ޕީއޯއެސް މެދުވެރިކޮށް ބަލައިގަނެވޭ އިންތިޒާމު ތަޢާރަފްކޮށްފައިވާކަމަށެވެ. ކައުންސިލްތަކުން ބަލައިގަންނަ ފައިސާ ޕީއޯއެސް މެދުވެރިކޮށް ބަނޑޭރި ޕޭއިން ބަލައިގަނެ ދުވަހުން ދުވަހަށް ކައުންސިލްތަކުގެ ބޭންކު އެކައުންޓްތަކަށް ޖަމާކުރެވޭނެ އިންތިޒާމު ހަމަޖެއްސުމަށްޓަކައި ކައުންސިލްތަކުން ބޭންކު އޮފް މޯލްޑިވްސް އަށް ހުށަހަޅައިގެން ފިނޭންސް މިނިސްޓްރީގެ އިތުރު ހުއްދައަކާ ނުލައި ޖޫން 1ން ފެށިގެން ކުރިޔަށްގެންދެވޭނެކަމަށް މިނިސްޓްރީން ބުނެއެވެ.
މިއިންތިޒާމު ހަމަޖެއްސުމަށް ކައުންސިލްތަކުގެ އެޑްމިން އެކްސެސް ދޭނެ ފަރާތްތަކުގެ މައުލޫމާތު ބޭންކު އޮފް މޯލްޑިވްސް އަށް ހުށަހަޅަންޖެހޭނެއެވެ. ކައުންސިލްތަކަށް ހުއްދަދެވޭނީ ކައުންސިލު ސެކެރެޓަރީ ޖެނެރަލް އަށް ނުވަތަ ސެކެރެޓަރީ ޖެނެރަލް ނެތް ހާލަތެއްގައި އޭނާގެ މަސްއޫލިއްޔަތު ހަވާލުވެފައިވާ ފަރާތަކަށްވާތީ ކައުންސިލްތަކުން ކައުންސިލުގެ ސެކެރެޓަރީ ޖެނެރަލްގެ ޞައްހަ މައުލޫމާތު އަންގައިދޭ ލިޔުމެއް ބޭންކަށް ހުށަހަޅަންޖެހޭނެއެވެ.
މީގެއިތުރުން "އެޕްލިކޭޝަން ފޯމް" އާއެކު ކައުންސިލްތަކުގެ "ޔޫސަރ ރަޖިސްޓްރީ ސިޓީ" ކައުންސިލްތަކުން ބޭންކަށް ހުށަހެޅުމުން އިންތިޒާމު ހަމަޖެހިގެންދާނެއެވެ.
މިލިޔެކިޔުންތަކުގެ ޞައްހަކަން ކަށަވަރުކުރުމަށްފަހު ބޭންކުން ކައުންސިލުތަކުގެ އެކައުންޓް ހަދައިދޭނެއެވެ.
