ޔުއެފާ ޗެމްޕިއަންސް ލީގުގެ ފައިނަލްގައިި ލިވަޕޫލާ ދެކޮޅަށް އެންމެ މޮޅު ކުޅުން ދައްކާނެ ކަމަށާއި، ނަމަވެސް މިއީ ފައިނަލަކަށް ވުމުން ތިބެން ޖެހޭނީ ހުރިހާ ކަމަކަށް ތައްޔާރުވެގެން ކަމަށް ރެއާލް މެޑްރިޑްގެ ކޯޗު ކާލޯ އަންޗެލޮޓީ ބުނެފިއެވެ.

އޭނާ މިހެން ބުނީ ޗެމްޕިއަންސް ލީގުގެ ފައިނަލްގެ ކުރިން އޮތް ނޫސްވެރިންގެ ބައްދަލުވުމުގައެވެ. އަންޗެލޮޓީ ބުނީ މިއީ ކޮންމެ މީހަކުވެސް އުންމީދު ކުރާނެ ކަމެއް ކަމަށާއި، ނަމަވެސް މިކަން އެކަކަށް ވެސް ކޮންޓްރޯލް ނުކުރެވޭނެ ކަމަށެވެ. މިއީ އޭނާގެ ފަސް ވަނަ ފައިނަލް ކަމަށާއި، މި ފައިނަލް ތަކުގައި ރަނގަޅު ހަނދާންތަކެއް ހުންނާނެކަމަށެވެ.

އޭނާ ބުނީ އެންމެ ރަނގަޅު ޕަރފޯމަންސްއެއް ދެއްކުނު ފައިނަލަކީ 2005 ވަނަ އަހަރު ލިވަޕޫލާ ދެކޮޅަށް ކުޅުނު ފައިނަލް ކަމަށެވެ. ނަމަވެސް، ޕެނަލްޓީގައި ލިވަޕޫލް އަތުން ބަލިވީ ކަމަށެވެ. އޭނާ ބުނީ މިރޭގެ ފައިނަލްގައި ގޯސް ގޮތަކަށް ކުޅެން ކުޅުންތެރިން ގާތު ނުބުނާނެކަމަށެވެ. އަދި ފައިނަލްގައި ރެއާލްގެ އެންމެ މޮޅު ކުޅުން ދައްކަން ބޭނުންވާ ކަމަށާއި، އެކަމަކު ވެސް ފައިނަލެއް ގައި ކޮންމެ ގޮތެއް ވެސް ވެދާނެކަމަށެވެ. އެހެންކަމުން ހުރިހާ ހާލަތަކަށް ތައްޔާރަށް ތިބެން ޖެހޭނެ ކަމަށް އޭނާ ބުންޏެވެ.

އަންޗެލޮޓީ ބުނީ ފައިނަލަށް ތައްޔާރުވުމަށް އެކަށީގެންވާ ވަގުތު ލިބުނުކަމަށެވެ. އަދި ފައިނަލަށް އައީ ރަނގަޅަށް ފަރިތަކުރެވިގެން ކަމަށެވެ. އެންމެ ރަނގަޅު ކުޅުން ދައްކާނެ ކަމަށް ބުނުމަކުން އަދި ފައިނަލަކުން މޮޅު ނުވާނެ ކަމަށް އޭނާ ބުންޏެވެ. ނަމަވެސް އޭގެ ސަބަބުން ރަނގަޅަށް ކުޅެފިނަމަ، ރަނގަޅު ފުރުސަތު ތަކެއް ލިބޭނެ ކަމަށް އަންޗެލޮޓީ ބުންޏެވެ. ރެފްރީގެ އެންމެ ފަހު ކަށިގަނޑާ ޖެހެންދެން މަސައްކަތް ކުރަން ޖެހޭނެ ކަމަށާއި، އެއަށްފަހު އައު ވާހަކައެއް ލިޔެވިގެންދާނެ ކަމަށް އޭނާ ބުންޏެވެ.

އަންޗެލޮޓީ ވަނީ ރެއާލް މެޑްރިޑާއެކު މީގެ ކުރިން ވެސް ޗެމްޕިއަންސް ލީގު އެއް ފަހަރު ކާމިޔާބުކޮށްފައެވެ. އެހެންކަމުން މިރޭ މޮޅުވެއްޖެ ނަމަ، މިއީ އޭނާއަށް ރެއާލާއެކު މި ތަށި އުފުލާލެވޭނެ ދެ ވަނަ ފަހަރެވެ.

ލިވަޕޫލްއާއި ރެއާލް ބައްދަލުކުރާ މި މެޗު ފަށާނީ މިރޭ ރާއްޖެ ގަޑިން 00:00 ގައެެވެ.