ޖާބިރުގެ އަންދާޒާ: އެމްޑީޕީ ޕްރައިމަރީއެއް ބާއްވައިފިނަމަ ރައީސް ސާލިޙު ކާމިޔާބު ކުރައްވާނެ
ރައީސް ސާލިޙު ވާދަ ނުކުރައްވަންވީ އެއްވެސް ސަބަބެއް ނެތްކަމަށް ޖާބިރު ވިދާޅުވި
ކާށިދޫ ދާއިރާގެ މެމްބަރު އަބްދުﷲ ޖާބިރު ރާއްޖެޓީވީގެ ފަށާއިރު ޕްރޮގްރާމްގައި ވާހަކަފުޅުދައްކަވަނީ
އެމްޑީޕީން ކުރިއަށް އޮތް ރިޔާސީ އިންތިޚާބުގެ ޓިކެޓު ދިނުމަށް ޕްރައިމަރީއެއް ބާއްވައިފިނަމަ ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު ބޮޑުތަނުން ކާމިޔާބު ކުރައްވާނެކަމަށް އަންދާޒާ ކުރެވޭކަމަށް ޑީއާރްޕީގެ ލީޑަރު، ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.
ހުކުރު ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވާހަކަފުޅުދައްކަވަމުން ޖާބިރު ވިދާޅުވީ، ރައީސް އިބްރާހިމް މުޙައްމަދު ސާލިޙު ވެރިކަމުގެ ދެވަނަ ދައުރަކަށް ކުރިމަތިލައްވާނެކަމަށް ލަފާ ކުރެވޭ ކަމަށެވެ.
ރައީސް ސާލިޙު ވާދަ ނުކުރައްވަންވީ އެއްވެސް ސަބަބެއް ނެތްކަމަށް ޖާބިރު ވިދާޅުވިއެވެ.
ޖާބިރު ވިދާޅުވީ، އެމްޑީޕީގެ ރިޔާސީ ޓިކެޓު ދިނުމަށް ޕްރައިމަރީއެއް ބާއްވައިފިނަމަ، ބޮޑު އަޢުލަބިއްޔަތަކުން ރައީސް ސާލިޙު ކާމިޔާބު ކުރައްވާނެކަމަށް ލަފާ ކުރެވޭ ކަމަށެވެ. އެގޮތުން ރައީސް ސާލިޙަކީ އެންމެ އުނދަގޫ ދަނޑިވަޅުގައި ސިޔާސީ ގޮތުން މެނޭޖް ކުރެއްވި ބޭފުޅެއްކަމަށް ޖާބިރު ވިދާޅުވިއެވެ.
ވަކިން ޚާއްސަކޮށް ކޮވިޑުގެ މި ދަތި ޙާލަތުގައިވެސް 80 އިންސައްތަ ކަންކަން ދިޔައީ ރަނގަޅަށްކަމަށް ޖާބިރު ވިދާޅުވިއެވެ.
ޖާބިރު ވިދާޅުވާ ގޮތުގައި ރައީސް އިބްރާހިމް މުޙައްމަދު ސާލިޙާއެކު ކޯލިޝަނެއް ނުހެދިއްޖެނަމަ، ޑީއާރްޕީން އޭނާ އަމިއްލަފުޅަށް ވާދަ ކުރައްވާނެއެވެ. ނަމަވެސް ބޭނުންފުޅު ވަނީ ރައީސް ސާލިޙު ހޮއްވަވަން ކޯލިޝަނެއް ހެއްދެވުމަށްކަމަށް ޖާބިރު ވިދާޅުވިއެވެ.
ޖާބިރު ލަފާ ކުރައްވާ ގޮތުގައި ޖުމްހޫރީ ޕާޓީން ޤާސިމް އިބްރާހިމްވެސް ވާދަ ކުރައްވާނެއެވެ.
ދާދި ފަހުން އުފެއްދި ސިޔާސީ ޕާޓީ އެމްއެންޕީއާ ގުޅޭގޮތުން ޖާބިރު އަންދާޒާ ކުރައްވާ ގޮތުގައި، އެމްއެންޕީގެ ވިސްނުން ބޮޑަށް ފެންނަނީ ކޯލިޝަނެއް ޤާއިމުކުރުމާ ދިމާއަށެވެ.
އޭގެ އިތުރުން، ރައީސް އަބްދުﷲ ޔާމީނަށް ދައުވާ ކުރާ މައްސަލަތަކުން އެމަނިކުފާނުގެ މައްޗަށް ކުށް ސާބިތުވެ، ވާދަ ނުކުރެއްވޭ ޙާލަތެއް އައިސްފިނަމަ، ޕީޕީއެމްއިން ކުރިމަތިލައްވާނީ ޑރ މުޙައްމަދު ޖަމީލް އަހުމަދު ކަމަށް ޖާބިރު އަންދާޒާ ކުރައްވައެވެ.
އެހެންނަމަވެސް، ރައީސް ޔާމީނުގެ މައްޗަށް ތުހުމަތު ކުރެވޭ މައްސަލަތަކަކީ އެކަށީގެންވާ ގޮތެއްގައި ބެލެންޖެހޭނެ މައްސަލަތަކެއްކަމަށް ޖާބިރު ވިދާޅުވިއެވެ. އެގޮތުން އެކަމުގައި އަދުލު އިންސާފު ޤާއިމު ކުރެވެން ޖެހޭކަމަށް އޭނާ ފާހަގަ ކުރެއްވިއެވެ.
