ބައެއް ފަހަރު ބޭކާރުކަމަށް ހީކޮށް އުކާލާ އެއްޗެއްސަކީ އެއިން ތަފާތު ބޭނުންތައް ކުރެވިދާނެ އެއްޗެއްސެވެ. ޖޯޑަންގެ އުމުރުން 50 އަހަރުގެ ހަނާން އައްބާދީ އޭނާގެ ވިޔަފާރި ބިނާކުރީވެސް މިގޮތަށް އުކާލާ ސާމާނުތައް ބޭނުން ކޮށްގެންނެވެ. އައްބާދީ އޭނާގެ ފިހާރައިގެ ބޭރުގައި އިނދެ ވިޔަމުންދާ ޖޯޑަންގެ ސަގާފީ ޓްރޭތަކަކީ "އިލެކްޓްރިކް ކޭބަލް" ނުވަތަ ވަޔަރު ބޭނުންކޮށްގެން ވިޔެފައި ހުންނަ ޓްރޭތަކެކެވެ.
ޖޯޑަންގައި ޒަމާނުއްސުރެ ކާއެއްޗެހި އަޅަން ބޭނުންކުރާ މި ޓްރޭތައް އާއްމުކޮށް ހަދާފައި ހުންނަނީ ހޮޅި ބޭނުން ކޮށްގެންނެވެ. ނަމަވެސް ވަޔަރަކީ ފަސޭހައިން ލިބެން ހުންނަ އެއްޗަކަށްވާތީއާއި ކުނީގެ ގޮތުގައި އެތަކެތި އުކާލާ މިންވަރު މަދު ކުރުމަށް އައްބާދީ ވިސްނީ ހޮޅީގެ ބަދަލުގައި ވަޔަރުތައް ބޭނުންކުރުމަށެވެ. ކަރަންޓު ވަޔަރުތަކަކީ އެކި ކުލަކުލައިގައި ހުންނަ އެއްޗަކަށްވުމުން އޭނާ ހަދާ ޓްރޭތަކުގެ ރީތިކަން އިތުރަށް ފުރިހަމަކޮށްދެއެވެ.
އަހަރެން ކަރަންޓް ވަޔަރު ބޭނުންކޮށްގެން ޓްރޭ ހަދަން ފެށީ އެ ފަސޭހައިން ލިބެން ހުންނާތީ. އަސްލު އެތަކެތި ހަދަން ބޭނުންކުރާ ހޮޅި ލިބޭނީ ވަކި ޚާއްސަ ދުވަސްވަރެއްގަ. މިގޮތަށް ކަރަންޓް ވަޔަރު ބޭނުން ކުރީމަ އުކާލަން ޖެހޭ ކުނިވެސް މަދުވާނެ.ހަނާން އައްބާދީ
އައްބާދީ އޭނާގެ ވިޔަފާރި ފެށުމުގެކުރިން މަސައްކަތްކުރަމުން އައީ ޓީޗަރެއްގެ ގޮތުގައެވެ. އޭނާ އެ ވަޒީފާ ދޫކޮށްލައި ޓްރޭތައް ހަދަން ދަސްކުރަން ފެށީ އެ ޓްރޭތައް ރީތިވުމުންނެވެ. އޭނާއަކީ ގެ ޒީނަތްތެރިކުރުމަށް ވެސް ލޯބިކުރާ މީހެއް ކަމުން ގޭގައި ބަހައްޓާފައި ހުންނަ މިފަދަ ޓްރޭތައް އޭނާއަށް ވަރަށް ކަމުދެއެވެ.
އައްބާދީ އޭނާގެ ފިހާރަ ހުޅުވާފައިވަނީ މީގެ ދޮޅު އަހަރު ކުރިން، ޖޯޑަންގެ ސިޓީއެއް ކަމަށްވާ ސޯލްޓްގައެވެ. އެ ފިހާރައިގައި އޭނާ ހަދާ ޓްރޭތައް 14 ޑޮލަރާ 140 ޑޮލަރާ ދެމެދުގެ އަގެއްގައި ވިއްކައެވެ. އަގުތައް ކަނޑައަޅަނީ ޓްރޭތަކުގެ ސައިޒުތަކަށް ބަލާފައެވެ.
ވިޔަފާރީގެ އިތުރުން އައްބާދީ އަންނަނީ އޭނާގެ ފިހާރައިގައި އެހެން އަންހެނުންނަށް ވެސް ޓްރޭ ވިއުމުގެ ހުނަރު ދަސްކޮށްދެމުންނެވެ.
މި ވިޔަފާރި އަހަރެންގެ ދިރިއުޅުމަށް ވަރަށް ބޮޑު ބަދަލެއް ގެނެސްފި. ބައިވަރު މީހުންނާ ބައްދަލުވެ އަހަރެންގެ މަސައްކަތް، ފަތުރުވެރިންގެ ޒަރީއާއިން ބައިވަރު ގައުމުތަކަށް ވެސް ފޯރުކޮށްދެވިއްޖެ. މި މަސައްކަތުން އަހަންނަ އާމްދަނީއެއް މި ލިބެނީ.ހަނާން އައްބާދީ
