ޓެކްސީ ޑްރައިވަރު، 59 އަހަރުގެ ޤާސިމް ޙަސަން މަރާލި މައްސަލައިގައި، ގަސްދުގައި މީހަކު މެރުމުގެ ކުށުގެ ދައުވާ އުފުލާފައިވާ، ޅ. ހިންނަވަރު، ބޮޑުހިޔާގެ، އަދުހަމު މުހައްމަދުގެ މައްޗަށް އުފުލާފައިވާ ދައުވާގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި މިހާރު ކުރިއަށްދަނީ ދައުލަތުން ހުށައަޅާފައިވާ ހެކިންގެ ހެކިބަސް ނެގުމުގެ މަރުޙަލާއެވެ. 

އެންމެ ފުރަތަމަ ހާޒިރުކޮށްފައިވަނީ ޑރ އާއިޝަތު އުލިޔާ މުސްތަފާއެވެ. އޭނާއަކީ ހުޅުމާލޭ ހޮސްޕިޓަލުގެ މެޑިކަލް އޮފިސަރެކެވެ. އޭނާ ވަނީ މި މައްސަލައިގެ މެޑިކޯ ލީގަލް ރިޕޯޓާއި ޑެތް ސަމަރީއާ ގުޅޭގޮތުން ހެކިބަސް ދެއްވާފައެވެ.

މި ރިޕޯޓުގައި ވަނީ ޤާސިމް ގެނެވުނުއިރުވެސް ކަރުގެ ވާތް ފަޅީގަޔާއި ކަނާތު އަތުގައި ޒަޚަމްތައް ހުރިކަން ބަޔާންކޮށްފައެވެ. ގެނައިރުވެސް އޭނާގެ އެއްވެސް ވަރަކަށް ވިންދެއް، ލޭގެ ޕްރެޝަރެއް ނުވަތަ ނޭވާއެއް ނެތްކަމަށް މެޑިކޯ ލީގަލް ރިޕޯޓުގައި ވަނީ ބަޔާންކޮށްފައެވެ.

މެޑިކޯ ލީގަލް ރިޕޯޓުގައި ވަނީ ޤާސިމްގެ ހަށިގަނޑުގައި ހުރި ޒަޚަމްތައްވެސް ތަފްސީލުކޮށްފައެވެ.

ކަރަށް ލިބިފައިވާ ޒަޚަމް އިތުރަށް ތަފްސީލު ކޮށްދެމުން އޭނާ ވިދާޅުވީ، ޒަޚަމްގެ ދިގުމިނުގައި (ހުރަހަށް) 6 ސެންޓިމީޓަރު ހުންނަ ކަމަށާއި، ކަރުގެ އެތެރެއަށް 2 ސެންޓި މީޓަރު ފުނަށް ޒަޚަމްވެފައިވާ ކަމަށެވެ. އެގޮތުން އެއީ ކަރުގެ ލޭނާރުތަކަށް އަސަރުކުރާ މިންވަރުގެ ފުން ޒަޚަމެއްކަމަށް އޭނާ ވިދާޅުވިއެވެ.

ޑެތު ސަމަރީއާ ގުޅޭގޮތުންވެސް އޭނާ ވަނީ ހެކިބަސް ދެއްވާފައެވެ. އެގޮތުން މަރުވި ސަބަބު ޑެތު ސަމަރީން ސާފުވާނެކަމަށް އޭނާ ވިދާޅުވިއެވެ.

އޭނާ ވިދާޅުވީ، ޤާސިމް މަރުވީ ލިބިފައިވާ އަނިޔާތަކުގެ ސަބަބުން ހަށިގަނޑުން ލޭ ބޭރުވުމުގެ ސަބަބުން "ހިމޮރެޖިކް ޝޮކް" އަކަށް ގޮސްގެން ކަމަށެވެ. އެއީ މައިގަނޑު ގޮތެއްގައި ކަރަށް ލިބިފައިވާ އަނިޔާގެ ސަބަބުންކަމަށް އޭނާ ވިދާޅުވިއެވެ.

ހިމޮރެޖިކް ޝޮކްއަކީ ހަށިގަނޑުން ބޭރަށް ލޭ އޮހޮރިގެން ހަށިގަނޑުގެ އާންމު ލޭގެ ނިޒާމު މަސައްކަތް ކުރެވޭ މިންވަރަށް ލޭ ދައުރު ނުކުރެވުމުން، ވިންދާއި ޕްރެޝަރ ކޮންޓްރޯލް ނުކުރެވި ޖެހޭ ޝޮކެއްކަމަށް އޭނާ ވިދާޅުވިއެވެ.

ދައުލަތާއި ދިފާއުގެ އިތުރުން ޝަރީއަތުންވެސް ވަނީ ބައެއް ކަންކަން އެ ހެކިވެރިޔާގެ ކިބައިން ސާފު ކުރައްވާފައެވެ.

ދައުލަތުގެ އިތުރު ދެ ހެއްކެއް އަދި އެބަތިއްބެވެ. އެއީ ފުލުހުންގެ އޮފިސަރަކާއި އާންމު މީހެކެވެ.

ދައުލަތުން ބުނާ ގޮތުގައި އާންމު މީހާއަށް މިހާރު ގުޅޭނެ ގޮތެއް ނެތެވެ. އަދި ފުލުސް އޮފިސަރުވެސް މިވަގުތު ހާޒިރުކުރުމަށް ދަތިތަކެއް ހުރުމުން، އެ ދެ ހެކިން ހާޒިރުނުކޮށް ކުރިއަށް ގެންދިއުމާމެދު ދައުލަތުން އިއުތިރާޒެއް ނުކުރެއެވެ.

މި މައްސަލައިގައި އަދުހަމްގެ ފަރާތުން އެއްވެސް ހެއްކެއް ހުށައަޅާފައެއް ނުވެއެވެ. ވުމާއެކު ދެން މި މައްސަލައިގައި އޮންނާނީ ހެއްކާއި ގުޅޭގޮތުން ވާހަކަ ދެއްކުމާއި، ޚުލާސާ ބަޔާން އިއްވުމެވެ.

އެ އަޑުއެހުން އޮންނާނީ 23 ޖޫންގައެވެ.