އޭސީ މިލާނަށް ކުޅެމުން އަންނަ ސްވެޑެންގެ ޒްލަޓަން އިބްރަހިމޮވިޗް ކަކުލުގެ ސާޖަރީއެއް ހަދަން ޖެހޭކަން ހާމަކޮށްފިއެވެ.
މިކަން ހާމަކޮށް އޭސީ މިލާނުން ބުނީ ކަކުލުގެ ސާޖަރީއެއް ހަދަން ޖެހުމުގެ ސަބަބުން މަދުވެގެން ހަތް މަހާއި އަށް މަހުގެ މުއްދަތަކަށް އިބްރަހިމޮވިޗް ކުޅުމާ ދުރުގައި ހުންނަން ޖެހޭނެކަމަށެވެ. އެހެންކަމުން އޭނާ ދެން ފުޓުބޯޅަ ކުޅުމާއި ނުކުޅުމާމެދު ވަރަށް އަވަހަށް ގޮތެއް ނިންމާނެއެވެ. އިބްރަހިމޮވިޗް އޭސީ މިލާނާއެކު ހަދާފައިވާ އެއްބަސްވުމުގެ މުއްދަތު މި ސީޒަނުގެ ނިޔަލަށް ހަމަވާނެއެވެ.
ދާދި ފަހުން އޭސީ މިލާނާއެކު މިއަަހަރުގެ ސެރީއާގެ ޗެމްޕިއަންކަން ހޯދުމަށްފަހު އޭނާ ބުނީ ފިޒިކަލް ގިނަ މައްސަލަތަކެއް މިވަގުތު ހުރި ކަމަށެވެ. ނަމަވެސް އޭނާގެ ކުރިމަގާ މެދު ވަރަށް އަވަހަށް ގޮތެއް ނިންމާނެކަމަށެވެ.
އޭސީ މިލާނަށް އިބްރަހިމޮވިޗް ބަދަލުވީ 2019 ވަނަ އަހަރުގެ ޑިސެމްބަރު މަހުއެވެ. އެއަހަރު އޭނާ އެ ޓީމާ ގުޅުނީ އެއް އަހަރުގެ އެއްބަސްވުމެއްގެ ދަށުންނެވެ. އޭގެ ފަހުން އޭނާ ވަނީ އެ ކުލަބާއެކު ހަދާފައިވާ އެއްބަސްވުން ދެ ފަހަރެއްގެ މަތިން އައުކޮށްފައެވެ. އެންމެ ފަހުން އޭނާ އެ ކުލަބާއެކު ހެދި އެއްބަސްވުން މި ސީޒަނުގެ ނިޔަލަށް ހަމަވާނެއެވެ.
އެންމެ ފަހުން އޭސީ މިލާނަށް ބަދަލުވުމަށްފަހު އިބްރަހިމޮވިޗް ވަނީ އެ ކުލަބާއެކު މޮޅު ކުޅުމެއް ދައްކާފައެވެ. އުމުރުން 40 އަހަރުގެ އިބްރަހިމޮވިޗް ވަނީ އޭގެ ފަހުން އޭސީ މިލާނަށް ކުޅެދިން 59 މެޗުން 33 ލަނޑު ޖަހާފައެވެ. އޭނާ އެންމެ ފުރަތަަމަ އޭސީ މިލާނަށް ކުޅުނީ ލޯނު އެއްބަސްވުމެއްގެ ދަށުން 2010 ވަނަ އަހަރުއެވެ. އޭގެ ފަހުން 2011 ވަނަ އަހަރު އޭނާ ވަނީ އެ ކުލަބާއެކު ދާއިމީ އެއްބަސްވުމެއް ހަދާފައެވެ.
