އެނބުރި އަންނާނީ ޔުނައިޓެޑަށް ޕްރިމިއާ ލީގު ކާމިޔާބުކޮށްދޭން: އިބްރަހިމޮވިޗް

އަނިޔާއިން ސަލާމަތްވެ، އެނބުރި ކުޅުމުގެ ތެރެއަށް އަންނާނީ މެންޗެސްޓާ ޔުނައިޓެޑަށް އިނގިރޭސި ޕްރިމިއާ ލީގު ކާމިޔާބުކޮށްދޭން ކަމަށް އެޓީމުގެ ފޯވާޑް ލާޓަން އިބްރަހިމޮވިޗް ބުނެފިއެވެ.

ސްކައި ސްޕޯޓްސް އަށް ދިން އިންޓަވިއުއެއްގައި އިބްރަހިމޮވިޗް ބުނީ އޭނާ އެނބުރި އަންނާނީ ފެށި ކަމެއް ނިންމުމަށް ކަމަށާއި، އެގޮތުން ޓާގެޓަކީ ޔުނައިޓެޑަށް ޕްރިމިއާ ލީގު ކާމިޔާބުކޮށްދިނުން ކަމަށެވެ.

އިބްރަހިމޮވިޗް ބުނީ އޭނާ ޔުނައިޓެޑާއެކު ހޭދަކުރި ފުރަތަމަ ސީޒަން ނިމުނީ ބޭނުންވި ގޮތަށް ނޫން ކަމަށާއި، އެހެންނަމަވެސް މިދިޔަ ސީޒަނުގައި ހާސިލްނުވިކަންތައް މި ސީޒަނުގައި ހާސިލްކުރެވޭނެ ކަމަށެވެ.

ލިބުނު އަނިޔާއާ ގުޅިގެން އިބްރަހިމޮވިޗް ބުނީ އޭގެ ސަބަބުން ވަރަށް ގިނަ ފިލާވަޅުތަކެއް ލިބިފައިވާ ކަމަށާއި، އެނބުރި ވަރުގަދަކޮށް އަންނަން ހިތްވަރު ވެސް ލިބިފައިވާ ކަމަށެވެ.

މިދިޔަ ޓްރާންސްފާ ބާޒާރުގައި އިބްރަހިމޮވިޗް ހޯދުމަށް ގިނަ ކްލަބްތަކުން މަސައްކަތްކުރިއެވެ. އެހެންނަމަވެސް ޔުނައިޓެޑުން ވަނީ އިބްރާހިމޮވިޗް ދޫކޮށްލުމަށް ފަހު، އަލުން އަނބުރާ އޭނާއާއެކު އެއްބަސްވުމަކަށް އައިސް ސޮއިހޯދާފައެވެ.

މީގެ ކުރިން އޭސީ މިލާން އަދި ބާސެލޯނާއަށް ވެސް ކުޅެފައިވާ އިބްރަހިމޮވިޗް އެނބުރި ކުޅުމުގެ ތެރެއަށް އާދެވޭނީ ޑިސެމްބަރު މަހު ކަމަށް ވަނީ ބެލެވިފައެވެ. އޭނާ އަށް އަނިޔާވީ މިދިޔަ އެޕްރީލް މަހު ޔޫރޮޕާ ލީގުގައި އަންޑަލެކްޓްއާ ދެކޮޅަށް ކުޅުނު މެޗެއްގައެވެ. އެ މެޗުގައި އިބްރަހިމޮވިޗްގެ ކަކުލު ހުޅަށް ވަނީ އަނިޔާވެފައެވެ.

ޕެރިސް ސެއިންޓް ޖާމަން (ޕީއެސްޖީ) އިން މިދިޔަ އަހަރު ޔުނައިޓެޑަށް ބަދަލުވި އިބްރާހިމޮވިޗް ވަނީ އެ ކްލަބަށް މިހާތަނަށް ކުޅުނު 46 މެޗުގައި 28 ލަނޑު ކާމިޔާބުކޮށްފައެވެ. އޭނާ ވަނީ ޔުނައިޓެޑާއެކު އެފްއޭ ކޮމިއުނިޓީ ޝިލްޑް، ޔޫރޮޕާ ލީގު އަދި ލީގް ކަޕް ކާމިޔާބުކޮށްފައެވެ.