ތުރުކީއަކީ ނޭޓޯއަށް މުހިންމު ގައުމެއްކަމަށް އެޖަމްއިއްޔާގެ ސެކްރެޓަރީ ޖެނެރަލް ޖެންސް ސްޓޮލްޓެންބަރގް ވިދާޅުވެއްޖެއެވެ.

ސްޓޮލްޓެންބަރގް މިހެން ވިދާޅުވެފައިވަނީ އަންގާރަ ދުވަހު ކުރިއަށްދިޔަ ވޯލްޑް އިކޮނޮމިކް ފޯރަމްގެ ޕެނަލް ޑިސްކަޝަނެއްގައި ވާހަކަދައްކަވަމުންނެވެ. އޭނާ މިހެން ވިދާޅުވެފައި މިވަނީ ފިންލޭންޑާއި ސްވިޑްން ނޭޓޯގެ މެމްބަރު ގައުމަކަށް ވުމަށް ހުށަހަޅާފައިވަނިކޮށް އެކަމަށް ތުރުކީން އެއްބާރުލުން ނުދޭނެކަމަށް ބުނެފައިވަނިކޮށެވެ.

މިކަމާގުޅޭ މަޝްވަރާތައް ކުރުމަށް ފިންލޭންޑާއި ސްވިޑްންގެ މަންދޫބުން ވަނީ ބުދަ ދުވަހު ތުރުކީއަށް ވަޑައިގެންފައެވެ.

ސްޓޮލްޓެންބަރގް ވަނީ ތުރުކީގެ ބައެއް ސިޔާސަތުތަކުގެ ސަބަބުން ނޭޓޯއާއި މެމްބަރު ބައެއް ގައުމުތަކުގެ މެދުގައި ދެބަސްވުންތަކެއް ހުރިނަމަވެސް، ތުރުކީއަކީ އެޖަމްއިއްޔާއަށް މުހިންމު ބައިވެރިއެއްކަމަށް ވިދާޅުވެފައެވެ. ޚާއްސަކޮށް ޖިއޮގްރަފީގެ ގޮތުން ތުރުކީ އޮންނަ ސަރަހައްދުގެ ސަބަބުންވެސް އެގައުމަކީ މުހިންމު ބައިވެރިއެއް ކަމަށް ސްޓޮލްޓެންބަރގް ވިދާޅުވިއެވެ. އެގޮތުން ތުރުކީއަކީ އިރާގާއި ސީރިޔާއާ ކައިރީގައި އޮންނަ ގައުމަކަށްވެފައި، އައިސިސްއާ ދެކޮޅަށް އެޖަމްއިއްޔާއިން ކުރަމުގެންދާ މަސައްކަތްތަކުގައި ބޭނުންކުރަނީ ތުރުކީގެ ވަސީލަތްތައް ކަމަށާއި، މިހާރު ކުރިއަށްދާ ޔޫކްރެއިން-ރަޝިއާ ހަނގުރާމައާ ގުޅުވައި، ބްލެކްސީގެ މުހިންމުކަމާއެކު ތުރުކީއަކީ މުހިންމު ބައިވެރިއެއްކަން ސްޓޮލްޓެންބަރގް ފާހަގަކުރެއްވިއެވެ.

ތުރުކީއަކީ މުޅި ޖަމްއިއްޔާއަށްވެސް މުހިންމު ގައުމެއް ކަމަށް ވުމުން، މިހާރު ކުރިމަތިވެފައިވާ ދެބަސްވުންތަކަށް ހައްލެއް ހޯދުމަށް މަސައްކަތްކުރަމުންދާކަމަށް ސްޓޮލްޓެންބަރގް ވިދާޅުވިއެވެ.

ސްވިޑްންއާއި ފިންލޭންޑުން ނޭޓޯއާ ގުޅުމަކީ ފަސޭހައިން ކޮށްލެވޭނެކަމެއް ކަމަށް ކުރިން ވާހަކަ ދެކެވުނު ނަމަވެސް، މިކަމަށް ތުރުކީގެ ފަރާތުން އެއްބާރުލުން ލިބެމުން ނުދާތީ އެކަމަށް ވަނީ ބުރޫއަރާފައެވެ.

ތުރުކީން ވަނީ، މި ދެގައުމަކީ ތުރުކީން ޓެރަރިސްޓުންގެ ގޮތުގައި ލޭބަލްކޮށްފައިވާ މީހުންނަށް ހިމާޔަތްދީފައިވާ ގައުމުތަކެއް ކަމަށް ބުނެ، އެދެގައުމު ނޭޓޯގެ މެމްބަރުންނަށް ވުމަށް އެއްބާރުލުން ނުދެވޭނެކަމަށް ބުނެފައެވެ. އެގޮތުން ކުރްދިސްތާން ވޯކަރސް ޕާޓީއާއި ފަތުހުﷲ ގުލެންގެ މީހުންނަށް އެދެގައުމުން ހިމާޔަތްދީފައިވާކަމަށް ތުރުކީން ތުހުމަތުކުރެއެވެ.

ބުދަ ދުވަހު ސްވިޑްންއާއި ފިންލޭންޑްގެ މަންދޫބުން ތުރުކީއަށް ވަޑައިގަތުމާއެކު މަޝްވަރާތައް ފެށިގެންދާނެކަމަށް ތުރުކީގެ ފޮރިން މިނިސްޓަރު ވަނީ ވިދާޅުވެފައެވެ.

ހޯމަ ދުވަހު ތުރުކީން ވަނީ، އެގައުމުން ސްވިޑްން ނޭޓޯއާ ގުޅުމަށް އެއްބަސްވެވޭނީ އެގައުމުގެ 5 ޝަރުތެއް ފުރިހަމަކުރުން ކަމަށް ބުނެފައެވެ. އެގޮތުން ސްވިޑްންއިން ތުރުކީއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލުމަށާއި ހަތިޔާރުގެ އެކްސްޕޯޓަށް އިއުލާންކޮށްފައިވާ އެމްބާގޯވެސް އުވާލުމަށް ވަނީ ހުށަހަޅާފައެވެ. މީގެ އިތުރުން ޓެރިސްޓުންނަށް ސިޔާސީ ސަޕޯޓްފޯރުކޮށްދިނުން ހުއްޓާލުމަށާއި، ޓެރަރިސްޓުންނަށް މާލީ އެހީތެރިކަން ފޯރުކޮށްދިނުން ހުއްޓާލުމުގެ އިތުރުން، ޕީކޭކޭއާއި ސީރިއާގެ ވައިޕީޖީ ހަނގުރާމަވެރިންނަށް ހަތިޔާރު ފޯރުކޮށްދިނުން ހުއްޓާލުމަށް ވަނީ ހުށަހަޅާފައެވެ.

އަންގާރަ ދުވަހު ކުރިއަށްދިޔަ ފޯރަމްގައި ސްޓޮލްޓެންބަރގް ވަނީ، ޔޫކްރެއިނުން ގޮވާން ހިފައިގެން ދަތުކުރާ ބޯޓުތަކަށް ދަތުކުރުމުގެ ފުރުސަތު ދިނުމަށް ރަޝިއާގެ ރައީސް ލެޑްމިއަރ ޕުޓިންއަށް ގޮވާލައްވާފައެވެ. އޭނާ ވަނީ ޔޫކްރެއިން ރަޝިއާ ހަނގުރާމައާ ގުޅިގެން ދުނިޔޭގެ ބާޒާރުގައި ކާބޯތަކެތީގެ ސަޕްލައި ދަށްވަމުންދާކަމަށާއި، މިއީ ނޭޓޯއާއި ހުޅަނގުގެ ގައުމުތަކުން ރަޝިއާއާ ދެކޮޅަށް އަޅަމުންދާ ދަތިކުރުމުގެ ފިޔަވަޅުތަކުގެ ސަބަބުން ވާ ކަމެއް ނޫންކަމަށް ވިދާޅުވެ، މިއީ ސީދާ އެހަނގުރާމައިގެ ސަބަބުންނާއި ރަޝިއާއިން އަޅަމުންދާ ހުރަސްތަކުގެ ސަބަބުން ވާކަމެއް ކަމަށް ވިދާޅުވެފައެވެ.

އެހެންނަމަވެސް ހޯމަ ދުވަހު ރަޝިއާއިން ވަނީ، ދުނިޔޭގެ ބާޒާރުގައި ތަކެތީގެ އަގު އުފުލުމުގެ ޒިންމާ ހުޅަނގުގެ ގައުމުތަކުން ނަގަންޖެހޭނެކަމަށް ބުނެފައެވެ.