6 އަހަރު ދުވަހުގެ ތެރޭގައި ފުރަތަމަ ފަހަރަށް ކުންފުނިތަކުން އެކްސްޕޯޓްކުރާ ހަކުރުގެ މިންވަރު 10 މިލިއަން ޓަނަށް ދަށްކުރުމަށް އިންޑިއާގެ ސަރުކާރުން ވިސްނަމުންދާކަމަށް މީޑިއާ ރިޕޯޓުތައް ބުނެފިއެވެ.
ރޮއިޓަރސްގައި ރިޕޯޓުކޮށްފައިވާގޮތުން، އެގައުމުން އެކްސްޕޯޓްކުރާ ހަކުރުގެ އަދަދު މަދުކުރަން ނުވަތަ އެ އަދަދު ކޮންޓްރޯލްކުރަން ސަރުކާރުން ޕްލޭން ކުރަމުން ދަނީ ގައުމުގެ އެތެރޭގައި ހަކުރު އަގު އުފުލުނަ ނުދީ ހިފެހެއްޓުމަށެވެ. މިކަން ކުރުމަށް މި ސީޒަންގައި އެގައުމުން އެކްސްޕޯޓުކުރާ ހަކުރުގެ އަދަދު 10 މިލިއަން ޓަނަށްވުރެ އިތުރު ނުކުރުމަށް ސަރުކާރުން ނިންމާފައިވާ ކަމަށް އިންޑިއާ ސަރުކާރުގެ އޮފިޝަލަކާ ހަވާލާދީ ރޮއިޓަރސްއިން ރިޕޯޓުކޮށްފައިވެއެވެ.
އިންޑިއާއަކީ ދުނިޔޭގައި އެންމެ ގިނައިން ހަކުރު އުފައްދާ އެއް ގައުމެވެ. އަދި އިންޑިއާއަކީ ބްރެޒިލްއަށްފަހު ދެވަނައަށް އެންމެ ގިނަ އަދަދަކަށް ހަކުރު އެކްސްޕޯޓްކުރާ ގައުމެވެ.
މީގެ ކުރިން މާޗު މަހުވެސް އިންޑިއާއިން ހަކުރު އެކްސްޕޯޓްކުރާ މިންވަރު ކޮންޓްރޯލްކުރަން އުޅޭކަމަށް ރޮއިޓަރސްއިން ވަނީ ރިޕޯޓުކޮށްފައެވެ. އޭރު ރިޕޯޓުކޮށްފައި ވަނީ މިސީޒަންގައި އެކްސްޕޯޓްކުރާ ހަކުރުގެ އެންމެ ގިނަ މިންވަރަކީ 8 މިލިއަން ޓަނު ކަމަށް ހެދުމަށް ނިންމާފައިވާކަމަށެވެ.
ބްރެޒިލުން އުފައްދާ ހަކުރުގެ އަދަދު މަދުވުމާ ތެލުގެ އަގުތައް އުފުލުމުގެ ސަބަބުން ދުނިޔޭގެ ބާޒާރުގައި ހަކުރުގެ އަގު އުފުލެމުންދާކަމަށް ރިޕޯޓުތައް ބުނެއެވެ. އިންޑިއާއިން އެންމެ ފުރަތަމަ 8 މިލިއަން ޓަނަށް ވުރެ އިތުރަށް އެކްސްޕޯޓްނުކުރެވޭނެ ގޮތް ހެދުމަށް ނިންމުމަށްފަހު މިއަދަދު 10 މިލިއަށް އިތުރުކޮށްފައި ވަނީ، މިހާރު އިންޑިއާގެ ހަކުރު އުފައްދާ ކުންފުނިތަކަށް ކުރިން އަންދާޒާކުރިވަރަށްވުރެ އިތުރަށް ހަކުރު އުފެއްދޭނެކަމަށް ލަފާކުރެވުމުންނެވެ.
އިންޑިއާގެ ޝުގަރ މިލްސް އެސޯސިއޭޝަނުން އަންދާޒާކުރާ ގޮތުގައި މިއަހަރު 35.5 މިލިއަން ޓަނުގެ ހަކުރު އުފެއްދޭނެއެވެ. ނަމަވެސް މީގެ ކުރިން މި އެސޯސިއޭޝަނުން އަންދާޒާކޮށްފައި ވަނީ 31 މިލިއަން ޓަނުގެ ހަކުރު އުފެއްދޭނެކަމަށެވެ. އިންޑިއާގެ އެކި ކުންފުނިތަކުން މިހާތަނަށް 8.5 މިލިއަން ޓަނުގެ ހަކުރު މިއަހަރުގެ ތެރޭގައި އެކްސްޕޯޓްކުރަން ވަނީ ބޭރުގެ ކުންފުނިތަކާއެކު އެއްބަސްވެފައެވެ. މި 8.5 މިލިއަން ޓަނުގެ ހަކުރުގެ ތެރެއިން މިހާތަނަށް 7.1 މިލިއަން ޓަނުގެ ހަކުރު އެކްސްޕޯޓްކޮށްފައިވާ ކަމަށް ރިޕޯޓުތައް ބުނެއެވެ.
ހަކުރު އެކްސްޕޯޓްކުރާ މިންވަރު ކޮންޓްރޯލްކުރުމަށް ނިންމާފައިވާކަމަށް އަންގާރަ ދުވަހު ރިޕޯޓުކުރުމާއެކު އިންޑިއާގެ ހަކުރު އުފައްދައި، އެކްސްޕޯޓްކުރާ ކުންފުނިތަކުގެ ހިއްސާގެ އަގު ވަނީ ދަށަށްދާން ފަށާފައެވެ. ބައެއް ކުންފުނިތަކުގެ ހިއްސާގެ އަގު އަންގާރަ ދުވަހު 8 އިންސައްތަ ދަށަށް ގޮސްފައިވާކަމަށް ރިޕޯޓުތައް ބުނެއެވެ.
ބައެއް މާހިރުން ބުނާ ގޮތުގައި ކުންފުނިތަކަށް 10 މިލިއަން ޓަނުގެ ހަކުރު އެކްސްޕޯޓްކުރުމުގެ ފުރުސަތު ދިނުމަކީ، ރަނގަޅު މިންވަރެއްގެ ހަކުރު ބައިނަލްއަގުވާމީ މާކެޓުގައި ވިއްކުމުގެ ފުރުސަތު އިންޑިއާއަށް ލިބޭނެ ކަމެއް ކަމަށެވެ. 10 މިލިއަން ޓަނަކީ ރަނގަޅު އަދަދެއްކަމަށާއި މިއަދަދުގެ ސަބަބުން ކުންފުނިތަކާއި ސަރުކާރަށްވެސް ހިތްހަމަޖެހުން ލިބޭނެ ކަމަށް ބައެއް މާހިރުން ފާހަގަކުރާކަމަށް ރޮއިޓަރސްއިން ރިޕޯޓުކޮށްފައިވެއެވެ.
