ޕީއެސްޖީގެ ތަރި ކީލިއަން އެމްބާޕޭއަކީ ޖޯކެއްކަމަށް ބުނެ ކުރީގެ މަޝްހޫރު ފުޓްބޯޅަ ކުޅުންތެރިޔާ ޑޭވިޑް ބެކަމްގެ ދަރި ރޯމިއޯ ބެކަމް ފާޑުކިޔައިފިއެވެ.
އެމްބާޕޭ ޓްރޮފީތައް ހިފައިގެން ހުއްޓާ ނަގާފައިވާ ފޮޓޯއެއް ރޯމިއޯގެ އިންސްޓަގްރާމް ސްޓޯރީއަށް ލުމަށްފަހު އޭނާ ވަނީ "މި މީހާއަކީ ޖޯކެއް" ކަމަށް ލިޔެފައެވެ. ރެއާލްގެ ހުށަހެޅުން ގަބޫލުނުކޮށް ޕީއެސްޖީގައި މަޑުކުރަން އެމްބާޕޭ ނިންމުމާއެކު ގިނަ ބަޔަކު އަންނަނީ އޭނާއަށް ފާޑުކިޔަމުންނެވެ. އަދި މިއީ އޭނާގެ ކެރިއަރުގައި ހަދާނެ އެންމެ ބޮޑު މިސްޓޭކް ކަމަށްވެސް އެއްބައި މީހުން ބުނެއެވެ.
ޑޭވިޑް ބެކަމް ވަނީ ރެއާލް މެޑްރިޑް، ޕީއެސްޖީ އަދި މެންޗެސްޓަރ ޔުނައިޓެޑަށްވެސް ކުޅެފައެވެ. އެހެންކަމުން އޭނާގެ ދަރިން މި ހުރިހާ ކްލަބަކަށްވެސް ސަޕޯޓް ކުރެއެވެ. ނަމަވެސް މީގެ ތެރެއިންވެސް އެކުދިންގެ ހިތުގައި ޚާއްސަ ލޯތްބެއް ރެއާލް އާއި ޔުނައިޓެޑަށް އޮވެއެވެ. ބެކަމްގެ އެންމެ ރަނގަޅު ކުޅުން ފެނިފައިވަނީ މި ދެޓީމުގައެވެ.
ބެކަމް އާއި ކްރިސްޓިއާނޯ ރޮނާލްޑޯ ފަދަ މަޝްހޫރު ކުޅުންތެރިން ވަނީ ރެއާލްއަށް ކުޅުމަށްޓަކާ ޔުނައިޓެޑް ދޫކޮށްފައެވެ. އެހެންކަމުން އެމްބާޕޭ ޕީއެސްޖީގައި ހުރުމަށްފަހު ރެއާލްގެ ހުށަހެޅުމަށް ނޫނެކޭ ބުނުމުން ބެކަމްގެ ދަރިންނަށް އެކަން ބަލައެއް ނުގަނެވުނެވެ.
