ރޯމިއޯ ލަވިއާ ޗެލްސީއަށް ސޮއިކޮށްފި

ސައުތެމްޓަންއަށް ކުޅެމުން އައި ބެލްޖިއަމްގެ މިޑްފީލްޑަރު ރޯމިއޯ ލަވިއާ، 53 މިލިއަން ޕައުންޑަށް ޗެލްސީއަށް ސޮއިކޮށްފިއެވެ.

އުމުރުން 19 އަހަރުގެ ކުޅުންތެރިޔާ ޗެލްސީއާއެކު ސޮއިކުރީ ހަތް އަހަރު ދުވަހުގެ އެއްބަސްވުމެއްގައެވެ. މި އެއްބަސްވުމުގެ ދަށުން އެޑް-އޮންގެ ގޮތުގައި އިތުރު ފަސް މިލިއަން ޕައުންޑް ލިބޭނެއެވެ. އޭނާ ވަނީ މިދިޔަ ސީޒަނުގައި ސައުތެމްޓަންއަށް 34 މެޗު ކުޅެދީފައެވެ.

ލަވިއާ ބުނީ ޗެލްސީއަށް ކުޅުމުގެ ފުރުސަތު ލިބުމުން ވަރަށް އުފާވާ ކަމަށާއި، ޗެލްސީއަކީ ދިގު ތާރީހެއް އޮތް، ކާމިޔާބު ޓީމެއް ކަމަށެވެ. އޭނާ ހޯދުމުގެ މަސައްކަތް ވާދަވެރި ލިވަޕޯލް އިންވެސް ވަނީ ކޮށްފައެވެ. ރިޕޯޓުތައް ބުނާގޮތުން ސައުތެމްޓަން އިންވަނީ ލިވަޕޫލްގެ 46 މިލިއަން ޕައުންޑުގެ ތިންވަނަ ބިޑް ވެސް ރިޖެކްޓް ކޮށްފައެވެ.

ލަވިއާގެ އިތުރުން ދާދިފަހުން ޗެލްސީއާ ގުޅުނު މޮއިސެސް ކައިސޭޑޯ ހޯދުމަށްވެސް ލިވަޕޫލް އިންވަނީ މަސައްކަތް ކޮށްފައެވެ. އޭނާ ޗެލްސީއާ ގުޅުނީ ބްރިޓިޝް ރެކޯޑް އަދަދެއް ކަމަށްވާ 115 މިލިއަން ޕައުންޑަށެވެ.

އެންޑަލެކްޓްގެ ޔޫތު ޓީމުން ކުޅެން ފެށި ލަވިއާ ވަނީ 2020 ވަނަ އަހަރު މެންޗެސްޓަރ ސިޓީއަށް ބަދަލުވެފައެވެ. ނަމަވެސް އޭނާ ސިޓީގެ ސީނިއާ ޓީމަށް ކުޅެފައިވަނީ އެންމެ ދެ މެޗެވެ. އޭގެ ފަހުން 2022 ވަނަ އަހަރު އޭނާ ސައުތެމްޓަންއަށް ބަދަލުވީ 10.5 މިލިއަން ޕައުންޑަށެވެ.

މިއަހަރުގެ ކުރީކޮޅު ލަވިއާ ވަބީ ބެލްޖިއަމްގެ ގައުމީ ޓީމަށްވެސް ފުރަތަމަ މެޗު ކުޅެފައެވެ. ޖަރުމަނާ ދެކޮޅަށް ކުޅުނު މެޗުގައި އޭނާ ކުޅެން ނިކުމެފައިވަނީ ބަދަލު ކުޅުންތެރިއެއްގެ ގޮތުގައެވެ.

ޕްރިމިއަރ ލީގުގެ އައު ސީޒަނުގެ ފުރަތަމަ މެޗުން ޗެލްސީ ވަނީ ލިވަޕޫލް ކައިރިން އެއްވަރު ވެފައެވެ. ދެވަނަ މެޗުގައި އާދިއްތަ ދުވަހު ނިކުންނާނީ ވެސްޓް ހޭމް އާ ދެކޮޅަށެވެ.