ޔުނައިޓެޑަށް ޝައުގުވެރިވަން، ކުލަބުގެ ވެރިން ބަދަލުވާންޖެހޭ: ބެކަމް

މެންޗެސްޓާ ޔުނައިޓެޑްގެ މެނޭޖްމަންޓަށް ޝައުގުވެރިވާ ކަމަށާއި އެކުލަބުގެ މިހާރުގެ ވެރިން ބަދަލުވާން ޖެހޭ ކަމަށް އެކުލަބުގެ ކުރީގެ ތަރި ޑޭވިޑް ބެކަމް ބުނެފި އެވެ.

އިނގިރޭސި ކުރީގެ ގައުމީ ކެޕްޓަން މިހެން ބުނީ އިންޑިޔާ އަށް އޭނާ ކުރަމުންދާ ދަތުރުގައި ނޫސްވެރިން ސުވާލު ކުރުމުންނެވެ.

ބެކަމް ބުނީ އޭނާ އަކީ މެންޗެސްޓާ ޔުނައިޓެޑްގެ ހަގީގީ އަދި ކުލަބަށް އަބަދުވެސް ރަނގަޅުގޮތް ވާން އެދޭ ސަޕޯޓަރެއް ކަމަށެވެ.

އެމެރިކާގެ މޭޖަ ސޮކާ ލީގުގެ އިންޓަމިއާމީގެ އެއް ހިއްސާދާރު ބުނީ ކޯޗު ސާ އެލެކްސް ފާގަސަން 2013 ވަނަ އަހަރު ރިޓަޔާކުރުމާއެކު ޔުނައިޓެޑަށް ކާމިޔާބު ހޯދުމުގައި ދަތިތަކެއް ދިމާވި ކަމަށެވެ. އަދި އޭގެ ފަހުން އިނގިރޭސި ލީގު ކާމިޔާބުނުކުރެވި އެތައް އަހަރެއް ހޭދަވާއިރު އެކަންކަން ބަދަލުކުރަން އެހީތެރިވުމަށް އޭނާ ހުށަހެޅި ކަމަށެވެ.

ބެކަމް އަކީ ޔުނައިޓެޑްގެ ކުރީގެ ކުޅުންތެރިންގެ ތެރެއިން ފުޓްބޯޅަ ހިންގުމުގައި އެންމެ ބޮޑަށް އުޅޭ އަދި އެއް މުއްސަނދި އެއް ފުޓްބޯޅަ ކުޅުންތެރިޔާ އެވެ.