ހަނގުރާމައިގެ ޖަރީމާ ހިންގިކަމަށް ސާބިތުވެ، ރަޝިއާ ސިފައިންގެ އޮފިސަރަކު އުމުރަށް ޖަލަށް
23 މެއި 2022 | ހޯމަ 14:06މިއީ ހަނގުރާމައިގެ ޖަރީމާ ހިންގިކަމުގެ ތުހުމަތުގައި ޔޫކްރެއިންގައި ރަޝިއާ ސިފައިންގެ މީހަކާ ދެކޮޅަށް ހިންގި ފުރަތަމަ ޝަރީއަތް
ހަނގުރާމައިގެ ޖަރީމާ ހިންގިކަމަށް ތުހުމަތުކުރި ރަޝިއާ އަސްކަރިއްޔާގެ އޮފިސަރު ވެޑިމް ޝިޝިމަރިންގެ މައްޗަށް ކުށް ސާބިތުވެ އުމުރަށް ޖަލަށް ލުމަށް ހުކުމުކޮށްފި
ހަނގުރާމައިގެ ޖަރީމާ ހިންގިކަމަށް ތުހުމަތުކުރި ރަޝިއާ އަސްކަރިއްޔާގެ އޮފިސަރުގެ މައްޗަށް ކުށް ސާބިތުވެ އުމުރަށް ޖަލަށްލުމަށް ހުކުމުކޮށްފިއެވެ.
ޔޫކްރެއިންގެ ކޯޓަކުން މެއި 23 ވަނަ ދުވަހު އުމުރަށް ޖަލަށްލުމަށް ހުކުމުކޮށްފައި ވަނީ އުމުރުން 21 އަހަރުގެ ވެޑިމް ޝިޝިމަރިންގެ މައްޗަށެވެ. އޭނާގެ މައްޗަށް ކުށް ސާބިތުވެފައި ވަނީ ޔޫކްރެއިން-ރަޝިއާ ހަނގުރާމައިގައި ޔޫކްރެއިންގެ އާންމު މީހަކު ގަސްތުގައި މެރިކަމުގެ ކުށެވެ.
މައްސަލައިގެ އަޑުއެހުމުގައި ޝިޝިމަރިން ވަނީ، ފެބްރުއަރީ 28 ވަނަ ދުވަހު އޭނާއަށް އައި އަމުރެއްގެ ދަށުން، ޔޫކްރެއިންގެ އިރުދެކުނު އަވަށެއް ކަމަށްވާ ޗުޕަޚިވްކާގައި އުމުރުން 62 އަހަރުގެ އޮލެކްސަންޑްރާ ޝެލިޕޮވްއަށް ހަމަލާދީ އޭނާ މަރާލާފައިވާކަމަށް އިއުތިރާފުވެފައެވެ.
މައްސަލަ ބެއްލެވި ގާޒީ ވަނީ، އިސް އޮފިސަރެއްގެ "ކްރިމިނަލް އޯޑަރ"އަކަށް ޝެލިޕޮވްއަށް އަމާޒުކޮށް އޮޓޮމެޓިކް ހަތިޔާރަކުން އެތައް ފަހަރަކު ޝިޝިމަރިން ހަމަލާދީފައިވާކަމަށް ވިދާޅުވެފައެވެ.
މިއީ ފެބްރުއަރީ މަހު ރަޝިއާގެ ސިފައިން ޔޫކްރެއިނަށް އަރައި ހަނގުރާމަ ފެށި ފަހުން، ހަނގުރާމައިގެ ޖަރީމާ ހިންގިކަމުގެ ތުހުމަތުގައި، ޔޫކްރެއިންގައި ރަޝިއާ ސިފައިންގެ މީހަކާ ދެކޮޅަށް ހިންގި ފުރަތަމަ ޝަރީއަތެވެ.
