އިންޑިއާ ބޯޓަކަށް ރާއްޖޭގެ ސަރަހައްދުގައި ގަވާއިދާ ޚިލާފަށް މަސްވެރިކަންކުރުމުގެ ފުރުސަތު ދީފައެއްނުވާނެ - ފިޝަރީޒް މިނިސްޓަރ

އިންޑިއާ ބޯޓު ފަހަރަށް ރާއްޖޭގެ ގަވާއިދުގެ ބޭރުން މަސްވެރިކަންކުރުމުގެ އެއްވެސް ފުރުސަތެއް ދިވެހިރާއްޖެއިން ދީފައި ނޯންނާނެ ކަމަށް ފިޝަރީޒް މިނިސްޓަރ ޑރ. ހުސައިން ރަޝީދު ހަސަން ވިދާޅުވެއްޖެއެވެ.

ފިޝަރީޒް މިނިސްޓަރ މިހެން ވިދާޅުވީ، ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ވަޒީރުންނާ ސުވާލުކުރުމުގެ ބައިގައި، ހޯރަފުށީ ދާއިރާގެ މެންބަރު އަހުމަދު ސަލީމް ދެންނެވި ސުވާލަކާ ގުޅިގެންނެވެ.

Advertisement

ހޯރަފުށީ ދާއިރާގެ މެންބަރު އަހުމަދު ސަލީމް މިނިސްޓަރަށް ދެންނެވި ސުވާލަކީ، ކުރީގެ ރައީސް އަބްދުﷲ ޔާމީން މިދިޔަ ޑިސެމްބަރ މަހުގައި ކާނިވާ ސަރަހައްދުގައި ބޭއްވި ޖަލްސާއެއްގައި ދެއްކެވި ވާހަކަފުޅާ ގުޅިގެން ކުރެއްވި ސުވާލެކެވެ. އެއީ "މިތާ އުތުރުން އެއޮއް މަސްބާނައި ނަގަނީއޭ އިންޑިއާ ބޯޓުފަހަރުން" ވިދާޅުވެފައިވާތީ އެކަން ސާފުކޮށްދެއްވުމަށް އެދިއެވެ.

ސުވާލަށް ޖަވާބު ދެއްވަމުން މިނިސްޓަރ ހުސައިން ވިދާޅުވީ، އެ ސުވާލުގެ ކުރު ޖަވާބަކީ، ނޯންނާނެ ކަމަށެވެ. ދިވެހިރާއްޖޭގެ އުތުރުގައި އިންޑިއާ އޮންނަ އިރު، އިންޑިއާ ސަރަހައްދުގައި މަސްބާނާނަމަ އެއީ، ރާއްޖޭގެ އުތުރުން މަސްބާނައި ނަގަނީ ކަމަށް ވެދާނެ ކަމަށެވެ. އަދި ދިވެހިރާއްޖެއާއި އިންޑިއާއަކީ އުތުރުގައި އެއް ބޯޑަރެއް ހިއްސާކުރާ ބައެއް ކަމަށާއި، ރާއްޖެއާއި އިންޑިއާގެ ސަރަހައްދާ ދޭތެރޭގައި 200 މޭލެއް ނޯންނަ ކަމަށެވެ.

މިނިސްޓަރ ވިދާޅުވީ ގާނޫނު ހަމަޖެހިފައި އޮންނަ ގޮތުން އެމްއެންޑީއެފްގެ ކޯސްޓްގާޑުން ދިވެހިރާއްޖޭގެ އިގުތިސާދީ ސަރަހައްދު ބަލަހައްޓަމުން ދާނެކަމަށެވެ. އަދި ބަލަހައްޓައި ބޯޓު ފަހަރު ހައްޔަރުކުރުމަށްފަހު ބަނދަރަކަށް ގެނެސް، ޕޮލިހާ ހަވާލުކޮށް، އަދި ފިޝަރީޒް މިނިސްޓްރީއާ ހަވާލުކުރާކަމަށެވެ. އެހެންކަމުން، ކުރު ޖަވާބަކީ، ހަމަ އެއްގޮތަކަށްވެސް ވަކި ގައުމެއްގެ އުޅަނދެއްވީމައި ގާނޫނުން ތަންފީޒުކުރަންޖެހޭ ކަމެއް ނުކޮށް ދޫނުކުރައްވާ ކަމަށެވެ. އަދި ވަކި ގައުމެއްގެ ބޯޓެއް ވީމައި ދޫކޮށްލަން ގާނޫނު ތަންނުދޭކަމަށެވެ.

މިނިސްޓަރ ވިދާޅުވީ، މަސްވެރިކަމުގެ ގާނޫނު 2019 އޮގަސްޓުގައި އަމަލުކުރަންފެށިފަހުން 8 އުޅަނދު ހިފަހައްޓައި، އޭގެތެރެއިން 5 އުޅަނދަށް ފިޔަވަޅު އަޅާފައިވާ ކަމަށެވެ. އެހެންކަމުން ގާނޫނުން އަޅަންޖެހޭ ފިޔަވަޅުތައް، އެއީ ކޮން ގައުމެއްގެ ކާކުގެ ކޮން ދޯންޏެއްތޯ ނުބަލައި ފިޔަވަޅު އަޅަމުންދާނެ ކަމަށެވެ.