ޒިޔަދަމްގެ މަރު: ޚުލާސާ ބަޔާން ލަސްވަމުންދާތީ ދައުލަތާއި ޝަރީއަތުގެ ކަންބޮޑުވުން
ކްރިމިނަލް ކޯޓުގައި މި މައްސަލަ މިހާރު ބައްލަވަނީ ގާޒީ އިސްމާއިލް ޝަފީއު
މި މައްސަލާގައި ދައުލަތުން ދައުވާ އުފުލާފައިވަނީ ހީނާވިލާ، މުހައްމަދު ޝަނޫނާއި، ބީޗްވިލާ އަލީ ސިފާމްގެ މައްޗަށް
ލ. މުންޑޫ، ނޫވިލު، އަލީ ޒިޔަދަމް މަރާލި މައްސަލައިގެ ޝަރީއަތުގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލާގައި ދައުލަތުން ދައުވާ އުފުލާފައިވަނީ އެރަށު ހީނާވިލާ، މުހައްމަދު ޝަނޫނާއި، ބީޗްވިލާ އަލީ ސިފާމްގެ މައްޗަށެވެ.
ޒިޔަދަމްގެ މަރަށް 7 އަހަރުވެފައިވާއިރު، މި މައްސަލައިގެ ޚުލާސާ ބަޔާން އަދިވެސް އިއްވިފައެއް ނުވެއެވެ. އެގޮތުން 25 އޭޕްރީލް 2022 ގައި ބޭއްވިއަޑުއެހުމުގައިދައުލަތުން ޚުލާސާ ބަޔާނުގެ އެއްބައި ހުށައަޅާފައިވާއިރު، ޝަރީއަތުގެ ވަގުތު ހަމަވިއިރުވެސް ދައުލަތުގެ ޚުލާސާ ބަޔާން ނުނިމޭތީ ހޯމަ ދުވަހު އޮތީ ޚުލާސާ ބަޔާނުގެ ބާކީ ބައި ކުރިއަށް ގެންދިއުމެވެ.
އެހެންނަމަވެސް، މި އަޑުއެހުން ފެށުމާއެކު، ދައުވާލިބޭ މުޙައްމަދު ޝަނޫން ވަނީ އޭނާގެ ބަލި ހާލަތު ހުރި ގޮތުގެ ސަބަބުން ޝަރީއަތުގައި އިންނަން ދަތިިކަމަށް ބުނެފައެވެ. އެގޮތުން ބޭރަށް ހިންގުމާއި، ބޮލުގައި އާދަޔާ ޚިލާފަށް ރިއްސާތީ އޭނާއަށް ޝަރީއަތުގައި އިނުން ދަތިކަމަށް ގާޒީ އަރިހުގައި އޭނާ ބުންޏެވެ.
ކްރިމިނަލް ކޯޓުގައި މިހާރު މި މައްސަލަ ބައްލަވަނީ ގާޒީ އިސްމާއިލް ޝަފީއުއެވެ. ގާޒީ ވިދާޅުވީ، މިއީ ޖިނާއީ ބޮޑު މައްސަލައެއް ކަމަށާއި، މައްސަލަ ކެންސަލް ކޮށްފިނަމަ ގިނަ ވަގުތުތަކެއް ބޭކާރުވެގެންދާ ކަމަށެވެ. ބަލި ހާލަތެއް މެދުވެރިވެއްޖެނަމަ އަމަލުކުރަންޖެހޭ އުސޫލުތަކެއްވެސް އޮންނަކަން ގާޒީ ފާހަގަ ކުރެއްވިއެވެ. މި މައްސަލައަކީ ގާޒީ ބައްލަވަމުން ގެންދަވާ މައްސަލަތަކުގެ ތެރެއިން އެންމެ ގިނަ ދުވަސްވީ އެއް މައްސަލަކަންވެސް ފާހަގަކުރެއްވިއެވެ.
އެކަމާ ގުޅޭގޮތުން ވާހަކަ ދެއްކުމަށް ދައުލަތަށް ދެއްވި ފުރުސަތުގައި ދައުލަތުގެ ވަކީލު ވިދާޅުވީ، މި މައްސަލައިގައި ފެބްރުއަރީން ފެށިގެން ޚުލާސާ ބަޔާން އިއްވުމަށް މަސައްކަތް ކުރެވެމުންދާއިރު، މައްސަލަ މިހާ ދިގުލައިގެން ދިއުމަކީ ދައުލަތުގެ ނުހަނު ބޮޑު ކަންބޮޑުވުމެއް އޮތް ކަމެއް ކަމަށެވެ.
މި އަޑުއެހުމުގައި އަލީ ސިފާމްގެ ވަކީލު އަހުމަދު ޔާމީން ވަނީ ދައުލަތުގެ ޚުލާސާ ބަޔާނުގެ ބާކީ ބަޔާއި، ސިފާމްގެ ބައި ކުރިއަށް ގެންދެވުމަށް އެދިލައްވާފައެވެ. ނަމަވެސް، މި މައްސަލައިގައި ދެފަރާތަށް ހަމަހަމަ ފުރުސަތުތައް ދެއްވުމަށްޓަކައި ޤާނޫނީ ނުކުތާތައް ދެފަރާތުން އެކުގައި ކުރިއަށް ގެންދަވަން ބޭނުންފުޅުވާކަމަށް ގާޒީ ވިދާޅުވިއެވެ.
ދައުލަތުން ބުނާ ގޮތުގައި ދެމީހުންގެ މައްޗަށްވެސް ޚުލާސާ ބަޔާން އިއްވަނީ އެކުއެކީގައެވެ. ވުމާއެކު، ގާޒީވެސް ބޭނުންފުޅުވަނީ އެ ދެމީހުންގެ ބައި އެކުގައި ކުރިއަށް ގެންދެވުމަށެވެ.
މައްސަލަ ބައްލަވާ ގާޒީ އިސްމާއިލް ޝަފީއު ވަނީ 4 ޖޫން ވާ ހޮނިހިރު ދުވަހު މައްސަލަ އަލުން ތާވަލު ކުރެއްވުމަށް ނިންމަވާފައެވެ. އެއީ ވީހާވެސް އަވަހަށް މައްސަލަ ކުރިއަށް ގެންދެވުމަށްޓަކައެވެ. އެ އަޑުއެހުމުގައި ޚުލާސާ ބަޔާން އެއްކޮށް ނިންމަވާނެކަމަށް ގާޒީ ވިދާޅުވިއެވެ.
ގާޒީ ވަނީ ބަލި ޙާލަތު ގޯސްނަމަ އޮންނަ އުސޫލުގެ މަތިން ކުރީބައިގައި އެންގެވުމަށް ދަންނަވާފައެވެ.
ތޫނު އެއްޗަކުން ހަމަލާދީ ޒިޔަދަމް މަރާލާފައިވަނީ 2015 ވަނަ އަހަރުގެ މާރޗު މަހުގެ 20 ވަނަ ދުވަހުގެ ރޭ 10:30ހާއިރުއެވެ.
