ސްޓޭޓް ޝިޕިންގއިން، އައްޑޫއާ ޓުޓިކޮރިންއާ ދެމެދު ބާއްވަމުންދިޔަ ކާގޯ ދަތުރުތައް މެދުކަނޑާލައިފި
މި ނިންމުން ނިންމާފައިވަނީ އެސްޓީއޯގެ ޕްރޮކިއަރމެންޓް އުސޫލަށް ގެނައި ބަދަލާއެކު
އެމްއެސްއެސް ގެލީނާ
މޯލްޑިވްސް ސްޓޭޓް ޝިޕިންގ (އެމްއެސްއެސް)އިން އައްޑޫއާ ޓުޓިކޮރިންއާ ދެމެދު ބާއްވަމުންދިޔަ ކާގޯ ޚިދުމަތް މެދުކަނޑާލައިފިއެވެ.
މިކަން އިއުލާނުކޮށް އެމްއެސްއެސްއިން ނެރުނު ބަޔާނެއްގައި ބުނީ, އެންމެ ފުރަތަމަ މި ޚިދުމަތް ފެށިއިރު މި ރޫޓުން އުފުލި މައިގަނޑު މުދަލަކީ އެސްޓީއޯގެ މުދާ ކަމަށެވެ. އަދި ބައެއް އެހެން ވިޔަފާރިވެރިންގެ މުދާ ކަމަށެވެ.
އެހެންނަމަވެސް އެސްޓީއޯގެ ޕްރޮކިއަރމެންޓް އުސޫލަށް ގެނައި ބަދަލާއެކު، މި ދެމެދުގައި މެދުނުކެނޑި ދަތުރުތައް ބޭއްވުމަށް ބޭނުންވާ މިންވަރަށް މުދާ ބަރުކުރުމަށް ދަތިތަކެއް ކުރިމަތިވީކަމަށް އެމްއެސްއެސްއިން ބުނެފައިވެއެވެ. އެހެންކަމުން މި ދެމެދުގައި ބާއްވަމުން އައި ދަތުރުތައް ވަގުތީގޮތުން މެދުކަނޑާލަން ނިންމީ ކަމަށްވެސް އެމްއެސްއެސްއިން ބުނެފައިވެއެވެ.
މޯލްޑިވްސް ސްޓޭޓް ޝިޕިންގ ކޮމްޕެނީ ޕްރައިވެޓް ލިމިޓެޑަކީ ސްޓޭޓް ޓްރޭޑިންގ އޯގަނައިޒޭޝަން ޕލކ.ގެ 99.99 އިންސައްތަ، އަދި ފިއުލް ސަޕްލައިސް މޯލްޑިވްސް ޕްރައިވެޓް ލިމިޓެޑުގެ 0.01 އިންސައްތަ ހިއްސާ ހިމެނޭ ކުންފުންޏެކެވެ.
