ސިޔާސީ ޕާޓީތަކުގެ ދަފްތަރުގައި ރަޖިސްޓްރީކުރުމުގެ ކުރިން، ނަންތައް އިއުލާންކުރަން ފަށައިފި
ނަންތައް އާއްމުކުރަނީ ޝަކުވާ ހުށަހެޅުމުގެ ފުރުސަތު ދިނުމަށް
އިލެކްޝަންސް ކޮމިޝަނުގެ މެމްބަރުންތަކެއް
ސިޔާސީ ޕާޓީތަކުން އެ ޕާޓީއެއްގެ ދަފްތަރުގައި ޖައްސަން ހުށަހަޅާ ނަންތައް ދަފްތަރުގައި ހިމެނުމުގެ ކުރިން، އިއުލާންކުރާ ގޮތަށް އިލެކްޝަންސް ކޮމިޝަނުން ނިންމައިފިއެވެ.
އިލެކްޝަންސް ކޮމިޝަނުން އާދީއްތަ ދުވަހު ނެރުނު ބަޔާނެއްގައި ބުނީ އެގޮތަށް ނިންމީ ސިޔާސީ ޕާޓީތަކުން ހުށަހަޅާ ފޯމުތައް ދަފްތަރުކުރުމުގެ ކުރިން، އެ ފޯމުތަކަކީ ސައްހަ ފޯމުކަން ކަށަވަރުކުރުމަށްޓަކައި ކަނޑައަޅާފައިވާ އުސޫލުގެ ދަށުން ކަމަށެވެ. އެގޮތުން، ފޯމުގައިވާ މައުލޫމާތުގެ ތެރެއިން، ރަޖިސްޓްރީކުރާ މީހާގެ ފުރިހަމަ ނަމާއި ދިވެހި ރައްޔިތެއްކަން އަންގައިދޭ ކާޑުގެ ފަހު ތިން އަދަދާއި، ދަފްތަރުކޮށްދިނުމަށް އެދި ހުށަހަޅާފައިވާ ޕާޓީގެ ނަން ހިމެނޭގޮތަށް އިލެކްޝަންސް ކޮމިޝަނުގެ ވެބްސައިޓުގައި އާއްމުކޮށް އިއުލާންކުރާނެ ކަމަށް އެ އިދާރާއިން ބުނެއެވެ.
މީގެ އިތުރުން އެ މީހެއްގެ ފޯނަށް އެކަން އަންގައި ދިނުމުގެ ގޮތުން މެސެޖެއް ވެސް ފޮނުވާނެ ކަމަށް އިލެކްޝަންސް ކޮމިޝަނުން ބުނެއެވެ.
ސިޔާސީ ޕާޓީތަކުގެ ދަފްތަރުގައި ރަޖިސްޓްރީކޮށްދޭން ހުށަހަޅާ ނަންތައް އާއްމު ކުރަނީ، ޝަކުވާއެއް އޮތްނަމަ އެކަން ކޮމިޝަނަށް އެންގުމުގެ ފުރުސަތު ފަހިިކޮށްދިނުމަށެވެ. އާދީއްތަ ދުވަހު އާއްމު ކޮށްފައިވާ ލިސްޓަށް ޝަކުވާ ހުށަހެޅުމުގެ ފުރުސަތު 29 މެއި 2022 ވާ އާދީއްތަ ދުވަހުގެ މެންދުރު 3:00އާ ހަމައަށް ވަނީ ހުޅުވާލާފައެވެ.
އާދީއްތަ ދުވަހު އާއްމު ކޮށްފައިވާ ލިސްޓުގައި، ޖުމްހޫރީ ޕާޓީއަށް ރަޖިސްޓްރީކުރަން ހުށަހަޅާފައިވާ 23 މީހުންގެ ނަމާއި، މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)އިން ހުށަހަޅާފައިވާ 105 މީހުންގެ ނަމާއި، މޯލްޑިވްސް ނޭޝަނަލް ޕާޓީ (އެމްއެންޕީ)ން ހުށަހަޅާފައިވާ 245 މީހުންގެ ނަން ވަނީ ހިމަނާފައެވެ.
