ބަހެއް ބުނެފިނަމަ އެބަހެއް ބުނިމީހާ ވެގެން ދަނީ އެބަހުގެ އަޅަކަށެވެ. އެބަހަކުން ނުނެއްޓެވޭނެ މީހަކަށެވެ. އިސާހިތަކު އެބަހަކާ ގުޅިގެން ތަފާތު ވާހަކަތައް މީހުން ދައްކާން ފަށައެވެ. ނޫސްވެރިންނާއި ލިޔުންތެރިންވެސް ލިޔެއުޅެއެވެ. އަދި ޚާއްޞަކޮށް ޓެކްނޮލޮޖީގެ ގޮތުން ކުރިއަރާފައި މިއަދު މިއޮތްވަރުން މީސް މީޑިއާގައި ރަނގަޅަށް އެކަމާ ބަހުސް ފެށެއެވެ.
މި ބީދައިން ކުރީގެ ރައީސް އަބްދުﷲ ޔާމީން ދެއްކެވި ވާހަކަފުޅެއް އަނެއްކާވެސް އެވަނީ ފަތުއަޑުކިޔާފައި އެނބުރެން ފަށާފައެވެ. ވިދާޅުވެވުނު ބަސްފުޅަކުން "ސޯޝަލް މީޑިޔާ ފްލަޑް" ވެއްޖެއެވެ. ބައެއް ފަހަރަށް އެމަނިކުފާނު ސާފުސީދާ ދިވެހި ބަހުން ވިދާޅުވާ ވާހަކަފުޅުތައްވެސް އެޕާޓީގެ ކޮންމެވެސް އެހެން މީހަކު ތަރުޖަމާ ކުރައްވައެވެ. އަސްލު ވިދާޅުވާން އުޅުއްވި އެއްޗެއް ފަހުން ހާމަކޮށްދެވޭތޯ އެ ތަރުޖަމާނު ބަލައެވެ.
ނަމަވެސް މިފަހަރު ފަހުން އެތަރުޖަމާ އަޔަސް ނަޔަސް މިހާރު އެވަނީ އެމަނިކުފާނު އެވިދާޅުވި އެއްޗަކަށް ގިނަ ބައެއްގެ ފާޑުކިއުންތައް އޮއްސާލާފައެވެ. ޓްވިޓަރ އާއި ފޭސްބުކް އަދި އޮންލައިން ނޫސްތަކުގެ ކޮމެންޓްތަކުން ފިސާރި ރައްދު ދީފައެވެ.
މިފަހަރު މޮޅުވާހަކައެއް ދައްކަވަން އެމަނިކުފާނު ވިދާޅުވީ "އިންޓެލް ރިޕޯޓް ހޯދައިގެން ތަޙުޤީޤަށް މީހުން ހައްޔަރުކޮށްގެން ނުވާނެ" ކަމަށެވެ. އަމިއްލަފުޅު ޕާޓީގެ އެތެރޭގެ ޖަލްސާއެއްގައި ވިދާޅުވި މި ބަސްފުޅާއެކު ރައްޔިތުންގެ ތެރެއިން ގިނަބަޔަކު އެރީ ރަތަށެވެ. ކެކިއަރައިގަތެވެ. ދެނެކާ ދެނެއް ނެތެވެ. ބައެއް މީހުން ފެށީ "ހަނދާން ނެތުނީ ހާދަ އަވަހަކަށޭ. ތިޔައީ ބޮޑުވަރޭ. އަހަރެމެން މިތިބީ ހަމަހޭގައޭ" ބުނަމުންނެވެ. އަދި ގުދޯގުދޯ ގޮވުމަކީ ވަރަށް ހަޑިކަމެއް ކަމަށްވެސް ހަނދާންކޮށްދޭން ފެށިއެވެ.
އެފަދަ މީހަކަށް ނުހުރެވިގެން ކުރި ކޮމެންޓެއްގައި ބުނަނީ "މި ބޭފުޅާ ތިޔަ ބުނާ އެއްޗެއްގެ ބޭނުންކޮށްގެން މީހުން ހިފާ ހައްޔަރުކުރީ އިއްޔެ މެންދުރު! މިހާ އަވަހަށް ހަނދާން ނެތުމަކީ ނުވަތަ ހަނދާން ނެތްކަމަށް ހެދުމަކީ މިބޭފުޅާގެ ޖައްބާރުކަން ނުވަތަ ސިކުނޑީގެ އުނިކަމެއް ހުރިކަމުގެ އަލާމާތެއް" ކަމަށެވެ.
ވާހަކަފުޅު ދައްކަވަން ލަދުގަންނަން ޖެހޭނެ ކަމަށާއި ފަސް އަހަރުގެ ވެރިކަމުގެ ތެރޭގައި ނުހައްގުން ހައްޔަރުކޮށް ޖަލަށްލީ މީހުންގެ އަދަދު އަމިއްލަފުޅަށްވެސް އެނގިވަޑައިނުގަންނަވާ ކަމަށް އަދި އެއިން އެއްވެސް މީހަކަށް ބޭސްފަރުވާކޮށްދީ ބަދަލު ދިންތޯ އަމިއްލައަށް ވިސްނަވާލެއްވުމަށް މީހަކު ގޮވާލިއެވެ. އަދި ބައެއް މީހުންނަށް ހުކުމްކުރީވެސް ހޮސްޕިޓަލުގައި ތިއްބާ ކަމަށާއި އެއްބަޔަކު ހައްޔަރުކުރީ ކޯޓު އަމުރެއް ނެތި މިލިޓްރީ ފޮނުވައިގެން ފުރާޅުން ޓިނުނަގައިގެން ކަމަށްވެސް އެމީހާ ބުންޏެވެ.
"ﷲ އަކުބަރު. ބުނާނެ އެއްޗެއް ނެތް. މަނިކުފާނަށް ސާބަސް" މީހަކު ބުންނެވެ.
"އަޅެފަހެ މީނާ ދައްކާ ވާހަކައިން މީހަކު މޮޔަވެދާނެޔޭ" ބުނަމުން މީހަކު ސުވާލުކޮށްފައިވަނީ ރައީސް ޔާމީން "ހަމަ" ތޯއެވެ. އަދި ލަދުގެ ކަންފުޅެއް ނެތީތޯވެސް އޭނާ އެހިއެވެ.
ރައީސް ޔާމީންގެ އެވާހަކަފުޅަށް ކޮމެންޓްކުރި އެހެން މީހަކު ބުނީ "ކޮށްގެން ވާނެ ކަންކަމާ ނުކުރަންވާ ކަންކަމާ މީކީ ރައީސް ޔާމީނުމެން ކަހަލަ މީހުން ދިވެހި ރައްޔިތުންނަށް ކިޔައިދޭން މާ ތާހިރު ވާހަކައެއް ނޫން" ކަމަށެވެ.
މިއީ ރައީސް ޔާމީން ވިދާޅުވި އެވާހަކަފުޅާ ގުޅިގެން އޮންލައިން ބައެއް ނޫސްތަކުގައި ހުރި ބައެއް ކޮމެންޓްތަކެވެ. މިއީ އަދި ނަކަލު ކޮށްލެވުނު ކުޑަ މިންވަރެކެވެ.
ކޮންމެއަކަސް އަނެއްކާވެސް މިދިމާވީ މުޅިން އެހެން ގޮތެކެވެ. ދައްކަވަން އުޅުއްވި މޮޅު ވާހަކައަކުން މިފަހަރުވެސް މިގޮވީ އަތަށެވެ. ތަރުހީބު ލިބުމުގެ ބަދަލުގައި އިއްޔެ މެންދުރު ކަންކުރިގޮތް ރަނގަޅަށް އަނެއްކާވެސް ހަނދާންކޮށްދިނީއެވެ.
