ލޯންޗު އެކްސިޑެންޓުވި ހާދިސާގައި ދެ މީހަކު މަރުވެއްޖެ
އެއީ 5 މީހުންނާއެކު ދަތުރުކުރަމުންދިޔަ ލޯންޗެއް
އެކްސިޑެންޓުވި ލޯންޗު
ގއ. ވިލިނގިލި ފަޅަށް ލޯންޗެއް ވަންނަން އުޅުމުގެ ތެރޭގައި ނެރުގައި ޖެހި ހިނގި ހާދިސާގައި ދެ މީހަކު މަރުވެއްޖެއެވެ.
ފުލުހުން ބުނީ އެއީ 5 މީހުންނާއެކު ދަތުރުކުރަމުންދިޔަ ލޯންޗެއް ކަމަށެވެ. ނެރުގައި ޖެހި ލޯންޗުގައި ތިބި 2 މީހަކު ކަނޑަށް ވެއްޓި ގެއްލިފައިވާކަމަށް ފުލުހުން ބުނެފައިވެއެވެ.
އެކަން ފުލުހުންނަށް ރިޕޯޓުކޮށްފައިވާއިރު، ގެއްލުނު ދެ މީހުން ފެނުމާއެކު އެމީހުން ވިލިނގިލީ ހޮސްޕިޓަލަށް ގެންގޮސް ފަރުވާދޭން ފަށާފައިވާކަމަށް ފުލުހުން ބުނެއެވެ. ހޮސްޕިޓަލަށް ގެންދިޔަ އިރުވެސް އެ ދެމީހުން މަރުވެފައިވާކަމަށް ހޮސްޕިޓަލުން ފުލުހުންނަށް މައުލޫމާތުދީފައިވާކަމަށް ފުލުހުން ބުނެއެވެ.
ލޯންޗުގައި ބާކީ ތިބި 3 މީހުންނަށް ވެސް އަނިޔާވެފައިވާކަމަށާއި، އެމީހުންނަށްވެސް ހޮސްޕިޓަލުގައި ފަރުވާދެމުންދާކަމަށް ފުލުހުން ބުނެފައިވެއެވެ،
މިކަމާއި ގުޅިގެން އިތުރަށް ބަލަންޖެހޭ ކަންކަން ބަލަމުންދާކަމަށް ފުލުހުން ބުނެފައިވެއެވެ.
މި ހާދިސާފގެ ފޮޓޯތަކުން ފެންނަގޮތުގައި އެ ލޯންޗު އޮތީ ތޮށިމައްޗަށް އަރާފައެވެ. ލޯންޗަށްވެސް އެކި ވަރުގެ ގެއްލުން ވެފައިވާކަމަށް ބެލެވެއެވެ.
