ފައްޔާޒް ކުރި ހޯއްދެވީ 7،189 ވޯޓުގެ ތަފާތަކުން

މިމަހުގެ 14 ވަނަ ދުވަހު ބޭއްވުނު އެމްޑީޕީގެ އެތެރޭގެ އިންތިޚާބުގެ ޗެއަރޕަރސަންއިންތިޚާބާއި އަންހެނުންގެ ރޫހުގެ އިންތިޚާބުގެ ދާއިމީ ނަތީޖާ އިއުލާނުކޮށްފިއެވެ.

ވާދަވެރިކޮށް ކުރިއަށްދިޔަ އިންތިޚާބުގައި ޗެއަރޕަރސަން ހޮވުމަށް ޖުމްލަ 48،583 މެމްބަރުން ވޯޓު ލާފައިވެއެވެ. ގެ މަގާމު ކާމިޔާބުކުރައްވާފައިވާ އިކޮނޮމިކް މިނިސްޓަރ ފައްޔާޒް އިސްމާއިލްއަށް ލިބިވަޑައިގެންނެވި ވޯޓުގެ އަދަދު ވަނީ 27،406 އަށް އަރާފައެވެ. އެއީ ވޯޓު ލީ މީހުންގެ 58 އިންސައްތައެވެ. ވަގުތީ ނަތީޖާއިން ދެއްކި ގޮތުގައި ފައްޔާޒްއަށް 28،514 ވޯޓު ލިބިވަޑައިގެންފައިވެއެވެ. ދާއިމީ ނަތީޖާ އިއުލާނުކުރިއިރު މި އަދަދު މިވަނީ ދަށްވެފައެވެ.

Advertisement

ފައްޔާޒްއާއި ވާދަކުރެއްވި މާފަންނު އުތުރު ދާއިރާގެ މެމްބަރ އިމްތިޔާޒު ފަހުމީ (އިންތި)އަށް ލިބިވަޑައިގެންފައިވަނީ 20،217 ވޯޓެވެ. އެއީ ވޯޓުލީ މީހުންގެ 42 އިންސައްތައެވެ. ވަގުތީ ނަތީޖާއިން އިންތިއަށް 20،856 ވޯޓު ލިބިފައިވާކަމަށް ދައްކާފައިވީނަމަވެސް މިހާރު އިންތިއަށް ލިބުނު ވޯޓު ވެސް މިވަނީ ދަށްވެފައެވެ.

ވަގުތީ ނަތީޖާ އިއުލާނުކުރިއިރު ފައްޔާޒްއާއި އިންތިއަށް ލިބުނު ވޯޓުގެ މެދުގައި 7،658 ވޯޓުގެ ތަފާތެއް ވެއެވެ. ދާއިމީ ނަތީޖާގައި މި ތަފާތު ވަނީ 7،189 އަށް ދަށްވެފައެވެ. މި އިންތިޚާބުގައި ވޯޓުލީ 48،583 މެމްބަރުންގެ ތެރެއިން ސައްހަ ވޯޓުގެ ގޮތުގައި ގުނާފައިވަނީ 47،623 ވޯޓެވެ. ބާތިލް ވޯޓުގެ ގޮތުގައި 960 ވޯޓު ހިމެނެއެވެ.

ބޮޑެތި ސިޓީތަކުން ދެ ކެންޑިޑޭޓުންނަށް ލިބުނު ވޯޓުތަކަށް ބަލާއިރު، މާލެ ސިޓީން އެންމެ ގިނަ ވޯޓު ލިބިފައިވަނީ އިންތިއަށެވެ. މާލެ ސިޓީން އިންތިއަށް 2،327 ވޯޓު ލިބިފައިވާއިރު، ފައްޔާޒްއަށް މާލެއިން ލިބިފައިވަނީ 1،987 ވޯޓެވެ. އެހެންނަމަވެސް އައްޑޫ ސިޓީން ކުރީގައި އުޅެނީ ފައްޔާޒެެވެ. އައްޑޫސިޓީން ފައްޔާޒަށް ލިބިފައިވަނީ 2،919 ވޯޓެވެ. އައްޑޫއިން އިންތިއަށް ލިބިފައިވަނީ 2.518 ވޯޓެވެ.

މީގެއިތުރުން އަންހެނުންގެ ރޫހު އިންތިޚާބު ކާމިޔާބުކޮށްފައިވާ އައްޑޫ މީދޫ ދާއިރާގެ މެމްބަރ ރޮޒެއިނާ އާދަމްއަށް ލިބިވަޑައިގެންފައިވަނީ 11،754 ވޯޓު ކަމަށް ދާއިމީ ނަތީޖާއިން ދައްކާފައިވެއެވެ. އަދި ސަފާތު އަހުމަދަށް ލިބިފައިވަނީ 7،847 ވޯޓެވެ.

މި އިންތިޚާބުގައި 20،768 މެމްބަރުން ވޯޓުލާފައިވާއިރު، ސައްހަ ވޯޓުގެ ގޮތުގައި ގުނާފައިވަނީ 19،601 ވޯޓެވެ. ބާތިލު ވޯޓުގެ ގޮތުގައި 1،167 ވޯޓު ގުނާފައިވެއެވެ.

ކެމްޕެއިން ތެރޭގައި ބަހުގެ ހޫނު ހަމަލާތަކެއް ބަދަލުކޮށްފައިވާއިރު، އިންތިޚާބަށްފަހު އެމްޑީޕީގެ ރައީސް، ރައީސް މުހައްމަދު ނަޝީދު ފައްޔާޒަށް މަރުހަބާ ވިދާޅުވެ ކުރެެއްވި ޓްވީޓެއްގައި ވިދާޅުވެފައިވަނީ، ފައްޔާޒް އިސްމާއީލް އެމްޑީޕީގެ ޗެއަރޕަރސަންގެ މަގާމުގައި ހުންނަވައި އެމްޑީޕީއަށް އިތުރު ކާމިޔާބީތައް ހޯދައިދެއްވާނެކަމާއިމެދު ޝައްކުނުކުރައްވާކަމަށެވެ.

ކެމްޕެއިން ތެރޭގައި ހިނގައިދިޔަ ކަންތައްތަކަކަށްފަހުވެސް ދެގޮތެއް ނުވެ އެމްޑީޕީ ކުރިޔަށްދާނެކަމަށް ފައްޔާޒު ވަނީ ވިދާޅުވެފައެވެ. އަދި ރައީސް ނަޝީދުއާއި އިންތިއާއެކު މަސައްކަތްކުރެއްވުމަށް ތައްޔާރަށް ހުންނެވިކަމަށް ވަނީ ވިދާޅުވެފައެވެ.

މިއިންތިޚާބަށް ފައްޔާޒް ނިކުންނެވީ 2023 ވަނަ އަހަރު ރައީސް ސޯލިހަށް ކާމިޔާބުކޮށްސެއްވުމަށް އެމްޑީޕީ "ހިންގާލުމުގެ" ނަމުގައެވެ.