ހޯރަފުށީގައި ދަތުގެ ފަރުވާ ދިނުމަށް ކްލިނިކެއް
21 މެއި 2022 | ހޮނިހިރު 14:04ކްލިނިކް ހުޅުވާފައިވަނީ ދީދާރު ގޭގައި
ރިވައިވް މެޑިކަލް ސެންޓަރ
ހއ. ހޯރަފުށީގައި ދަތުގެ ފަރުވާ ދިނުމަށް އަމިއްލަ ފަރާތުން ރިވައިވް މެޑިކަލް ސެންޓަރގެ ނަމުގައި ކްލިނިކެއް ހުޅުވައިފިއެވެ.
މި ކްލިނިކް ހުކުރު ދުވަހުގެ ހަވީރު 04:30 ގައި ރަސްމީކޮށް ހުޅުއްވައިދެއްވީ ހޯރަފުށީ ކައުންސިލްގެ ރައީސް ވަހީދު އާއި ކުރީގެ މުދިމް އަބްދުއްސަލާމް އަލީއެވެ. ކްލިނިކް ހުޅުވާފައިވަނީ އެރަށު ދީދާރު ގޭގައެވެ.
ރާއްޖެއެމްވީއަށް މައުލޫމާތު ދެއްވަމުން ކްލިނިކްގެ ފައުންޑަރ މުހައްމަދު މާހިރު ވިދާޅުވީ މި ތަނަކީ ހޯރަފުށީ ރަންކޮކާގޭ އަލީ މުހައްމަދު ނަޖީބާއި އދ. މަހިބަދޫ އަހްމަދު ޝާއިހް މިދެމީހުން ބައިވެރިވެގެން ހުޅުވި ކްލިނިކެއް ކަމަށެވެ. އެތަން ހެދުމަށް ގާތްގަނޑަކަށް 6 މަސްދުވަސް ހޭދަވިކަން ފާހަގަކުރައްވާ މާހިރު ވިދާޅުވީ އެތަނުން ރޫޓްކެނަލް ހެދުމާއި ޑެންޓަލް އިމްޕްލާންޓާއި ޑިޖިޓަލް ޑެންޓަލް އެކްސްރޭ ނެގުން ފަދަ ގިނަ ޚިދުމަތްތަކެއް ލިބިގެންދާނެ ކަމަށެވެ.
ހޯރަފުށީގައި މިފަދަ ކްލިނިކެއް ޤާއިމުކުރުމުގެ އެންމެ ބޮޑު ބޭނުމަކީ ދަތުރުފަތުރު ކުރުމުގެ ވަސީލަތްތައް ޤާއިމުވެ، އިންވެސްޓް ކުރުމުގެ ފުރުސަތު ހުޅުވިގެންދިޔުމާއިގުޅިގެން ރަށަށް ޚިދުމަތް ކުރުމުގެ ބޭނުމުގައި ކަމަށް ވެސް އޭނާ ވިދާޅުވިއެވެ. ދަތުގެ ފަރުވާގެ ޚިދުމަތް މިވަގުތު ފޯރުކޮށްދިން ނަމަވެސް ކުރިއަތް އޮތްތާނގައި ޚިދުމަތްތައް ފުޅާވެގެންދާނެ ކަމަށާއި އޭރުން ސްކޭން ކުރުމާއި ޑޮކްޓަރަށް ދެއްކުން ފަދަ ޙިދުމަތްތައް ލިބިގެންދާނެއެވެ.
މާހިރު އިތުރަށް ވިދާޅުވީ ހޮނިހިރު ދުވަހު ކްލިނިކުން ޙިދުމަތްދޭން ފަށާފައިވާއިރު އާންމުންގެ ބޮޑު ތަރުހީބެއް ލިބެމުން އަންނަ ކަމަށެވެ. އަދި ރަށުގައި މިފަދަ ކްލިނިކެއް ހުޅުވުމުން އާންމުން އެކަން ބަލައިގަންނަ ކަމަށާއި އެކަމަށް ޝުކުރުވެރިވާ ކަމަށް ވެސް އޭނާ ވިދާޅުވިއެވެ.
އާންމުންނަށް އަގުހެޔޮ ފަސޭހަ ޚިދުމަތެއް ފޯރުކޮށްދިނުމުގެ ބޭނުމުގައި އިންޝުއަރެންސް އާއި އާސަންދަ ހޯދުމުގެ މަސައްކަތް ކުރަމުންދާ ކަމަށް ވެސް މާހިރު ވިދާޅުވިއެވެ.
މި ކްލިނިކް ހުޅުވުމަށްޓަކައި ހޯރަފުށީ ދާއިރާގެ ރައްޔިތުންގެ މަޖިލިސް މެމްބަރު އަހްމަދު ސަލީމްއާއި ކައުންސިލްގެ ފުރިހަމަ އެއްބާރުލުން ލިބުނުކަން ފާހަގަކުރައްވާ މާހިރު ވަނީ އެފަރާތްތަކަށް ޝުކުރު އަދާ ކުރައްވާފައެވެ.
