ކޯޓުތަކުގެ ޚަބަރުތައް ގެނެސް ދިނުމާ ގުޅޭ ޚާއްސަ ވޯކްޝޮޕެއް ކުރިއަށް ގެންގޮސްފި
ކޮންމެ ސެޝަނެއްވެސް ކުރިއަށްދިޔައީ ނޫސްވެރިންނަށް ސުވާލު ކުރުމުގެ ފުރުސަތު ހުޅުވާލައިގެން
"ކޯޓް ރިޕޯޓިންގ ވޯކްޝޮޕް" މޯލްޑިވްސް މީޑިއާ ކައުންސިލުން އިންތިޒާމު ކޮށްގެން ކުރިއަށް ގެންދިއުން
ކޯޓުތަކުގެ ޚަބަރުތައް ކަވަރު ކުރުން ނުވަތަ ގެނެސް ދިނުމުގެ ދާއިރާއަށް ޚާއްސަކޮށްގެން "ކޯޓް ރިޕޯޓިންގ ވޯކްޝޮޕް" މޯލްޑިވްސް މީޑިއާ ކައުންސިލުން އިންތިޒާމު ކޮށްގެން ކުރިއަށް ގެންގޮސްފިއެވެ.
ހޮނިހިރު ދުވަހު އިސްކަންދަރުކޮށީގައި މި ވޯކްޝޮޕް ކުރިއަށް ގެންގޮސްފައިވާއިރު، ތަފާތު އެކި ސެޝަންތަކަށް ބަހާލައިގެން މައުލޫމާތު ފޯރުކޮށްދިނުމުގެ ކަންކަން ވަނީ ކުރިއަށް ގެންގޮސްފައެވެ. މިގޮތުން މި ވޯކްޝޮޕްގައި ނޫސްވެރިންގެ އިތުރުން، ދައުލަތުގެ ބައެއް އިދާރާތަކުގެ ޕަބްލިކް ރިލޭޝަންސް ގައި މަސައްކަތް ކުރައްވާ ފަރާތްތަކާއި، ޝަރުއީ އެކި ދާއިރާތަކުގެ އޮފިޝަލުންވެސް ބައިވެރިވެވަޑައިގަންނަވާފައިވެއެވެ.
މި ވޯކްޝޮޕްގައި އެންމެ ފުރަތަމަ މައުލޫމާތު ފޯރުކޮށްދީފައިވަނީ ޖޭއެސްސީންނެވެ. އެގޮތުން ޖޭއެސްސީގެ ފަރާތުން ޑައިރެކްޓަރ އޮފް ކޮމްޕްލެއިންސް އެންޑް އިންވެސްޓިގޭޝަން، ޙަސަން ޒަހީން ވަނީ ސެޝަން ނަންގަވާދެއްވާފައެވެ. ވަކިން ޚާއްސަކޮށް، ނޫސްވެރިން ޚަބަރުތައް ރިޕޯޓު ކުރުމާއި، ކޯޓުތަކާއި ފަނޑިޔާރުންނާއި ގުޅުންހުރި އެކި ވާހަކަތައް ރިޕޯޓު ކުރުމާއި ގުޅޭގޮތުން ޒަހީން ވަނީ ވާހަކަ ދައްކަވާފައެވެ. އަދި ކޯޓުތައް ބެހިގެންވާ ގޮތުގެ މައްޗަށްވެސް އޭނާ އަލިއަޅުވާލެއްވިއެވެ.
އެއަށްފަހު ބާ ކައުންސިލް އޮފް ދަ މޯލްޑިވްސްގެ ފަރާތުން ޖެނެރަލް ކައުންސެލް މުޙައްމަދު ނިޝާތު ވަނީ މި ވޯކްޝޮޕްގެ ބައިވެރިންނަށް ސެޝަނެއް ނަންގަވައިދެއްވާފައެވެ. އެގޮތުން ވަކީލުން ދައްކަވާ ވާހަކަތައް ރިޕޯޓު ކުރުމާއި، ނޫސްވެރިން ސަމާލުކަން ދޭން ޖެހޭކަމަށް ފެނިލައްވާ ކަންކަމުގެ މައްޗަށް އޭނާ ވަނީ އަލިއަޅުވާލައްވާފައެވެ.
ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުންވެސް ވަނީ ސެޝަން ނަންގަވައިދެއްވާފައެވެ. އެގޮތުން އެ އިދާރާގެ ފަރާތުން ލީގަލް އޮފިސަރ ފާތިމަތު އަލާނާއާއި، މަރިޔަމް އައްބާސް ވަނީ، ޑީޖޭއޭގެ ދަށުން ކޯޓުތައް ބެލެހެއްޓުމުގެ އިންތިޒާމު ހަމަޖެހިފައިވާ ގޮތާއި، ކޯޓުތަކުން ނޫސްވެރިންނަށް މައުލޫމާތު ފޯރުކޮށްދިނުމަށް ހަމަޖެހިފައިވާ އިންތިޒާމުތަކާއި ގުޅޭގޮތުން ވާހަކަ ދައްކަވާފައެވެ.
އޭގެ އިތުރުން، ޕްރޮސެކިއުޓަރ ޖެނެރަލް އޮފީހުގެ ފަރާތުން އެ އޮފީހުގެ ޕަބްލިކް ޕްރޮސެކިއުޓަރ އަހުމަދު ޝަފީއު ވާހަކަ ދައްކަވާފައިވާއިރު، ޝަފީއު ވަނީ މީޑިއާތަކުން ޚަބަރުތައް ގެނެސްދިނުމުގައި ސަމާލުކަން ދިނުމަށް އެދޭ ކަންކަމާއި، މީޑިއާތަކަށް ފޯރުކޮށްދޭ ޚަބަރުތައް ގިންތި ކުރެވިފައިވާ ގޮތާއި، ޚަބަރުތައް ފޯރުކޮށްދޭ މިންވަރުގައި އިސްކަންދެވޭ ކަންކަމުގެ މައްޗަށް މި ވޯކްޝޮޕްގައި އަލިއަޅުވާލައްވާފައެވެ.
އެއަށްފަހު ދެން ވާހަކަ ދެއްކެވީ ޕްރޮސެކިއުޓަރ ޖެނެރަލް ހުސައިން ޝަމީމެވެ. އެގޮތުން ޝަމީމް ވަނީ ޕީޖީ އޮފީހުގެ މަސައްކަތްތަކަށް މިހާރު އައިސްފައިވާ ބައެއް ބަދަލުތަކުގެ މައްޗަށް އަލިއަޅުވާލައްވައި، ނޫސްވެރިންގެ ވިސްނުން ބައްޓަން ކުރަން ޖެހިފައިވާ އައު ދާއިރާތަކުގެ މައްޗަށް އަލިއަޅުވާލައްވާފައެވެ. ޝަމީމް ވަނީ ކޯޓުތަކުގެ ޚަބަރުތައް ރިޕޯޓުކުރުން ފެށިގެން އައިގޮތާއި ގުޅޭގޮތުންވެސް މައުލޫމާތު ހިއްސާ ކުރައްވާފައެވެ.
ފަހު ސެޝަނެއްގެ ގޮތުގައި ކުރިއަށް ދިޔައީ ދިވެހި ފުލުހުންގެ ޚިދުމަތުގެ ފަރާތުން މައުލޫމާތު ފޯރުކޮށްދިނުމެވެ. އެގޮތުން އިންސްޕެކްޓަރ އޮފް ޕޮލިސް އާދިލް އަބްދުﷲ ވަނީ ނޫސްވެރިން ޚަބަރުތައް ގެނެސްދޭ ގޮތުގެ ސަބަބުން ތަހުގީގަށް ހުރަސްއެޅޭ ޙާލަތްތަކާއި، ވަކިން ޚާއްސަކޮށް ކުޑަކުދިންނާ ގުޅުންހުރި މައްސަލަތައް ރިޕޯޓު ކުރާއިރު، ނޫސްވެރިން ސަމާލުކަން ދޭންޖެހޭ ކަންކަމާއި، އެފަދަ ބައެއް މިސާލުތައްވެސް ހިއްސާ ކުރައްވާފައެވެ.
މިއިން ކޮންމެ ސެޝަނެއްވެސް ކުރިއަށްދިޔައީ ނޫސްވެރިންނަށް ސުވާލު ކުރުމުގެ ފުރުސަތު ހުޅުވާލައިގެންނެވެ. އަދި ސެޝަނަށްފަހު، ވޯކްޝޮޕްގެ ބައިވެރިންނަށް ވަނީ ހަނދާނީ ލިއުން ޙަވާލުކޮށްފައެވެ.
