ލަންކާގެ ކެބިނެޓަށް އައު 9 ވަޒީރުން
20 މެއި 2022 | ހުކުރު 07:37ކެބިނެޓުގައި މިހާރު ތިބެނީ 25 މެމްބަރުން
ސްރީލަންކާ
ސްރީލަންކާގެ ސަރުކާރުގެ ކެބިނެޓަށް އަލަށް އައްޔަންކުރެއްވި 9 ވަޒީރުން, ވަޒީރުކަމުގެ ހުވާކުރައްވައިފިއެވެ.
މި 9 ވަޒީރުން ހުވާކުރެއްވީ ހުކުރު ދުވަހު ބޭއްވި ޚާއްސަ ރަސްމިއްޔާތެއްގައެވެ. ނިމުނު ހަފްތާގައި ވެސް ހަތަރު ވަޒީރަކު ވަނީ ހުވާކުރައްވާފައެވެ.
ލަންކާގެ މިހާރުގެ ހާލަތަށް ބަލައި އެ ޤައުމުގެ ކެބިނެޓް 25 މެމްބަރުންނަށް ވަނީ މަދުކޮށްފައެވެ. އެއީ ރައީސް ގޮޓަބަޔަ ރާޖަޕަކްސް އާއި ބޮޑުވަޒީރު ރަނިލް ވިކްރަމަސިންހަ ހިމެނޭ ގޮތަށެވެ.
އަލަށް ނެގި ވަޒީރުންގެ ތެރޭގައި ޕޯޓްސް ނޭވަލް އެންޑް އޭވިއޭޝަން ސާވިސަސް އާއި އެޑިއުކޭޝަނާއި ހެލްތާއި ޖަސްޓިސް، ޕްރިޒަން އެފެއާޒް، ކޮންސްޓިޓިއުޝަނަލް ރިފޯމްސް އާއި ޓުއަރިޒަމް އެންޑް ލޭންޑް އާއި ޕްލާންޓޭޝަން އިންޑަސްޓްރީސް އާއި ލޭބަރ އެންޑް ފޮރިން އެމްޕްލޯއިމަންޓާއި ޓްރޭޑް، ކޮމާސް އެންޑް ފުޑް ސެކިއުރިޓީ އާއި ޕަބްލިކް ސެކިއުރިޓީގެ ވަޒީރުން ހިމެނެއެވެ.
ލަންކާގެ އިޤްތިސާދީ ހާލަތު ދަށްވެ އެ ޤައުމުގައި މުޒާހަރާތައްކޮށް ހަމަނުޖެހުންތައް އުފެއްދުމުގެ ސަބަބުން އޭރު ބޮޑުވަޒީރުގެ މަޤާމުގައި ހުންނެވި މަހިންދަ ރާޖަޕަކްސަ ވަނީ އިސްތިއުފާ ދެއްވާފައެވެ. ބޮޑުވަޒީރު ކަމަށް ރަނިލް ވިކްރަމަސިންހަ އައްޔަން ކުރެއްވީ 2022 މެއި 12ވަނަ ދުވަހުއެވެ.
އެ ޤައުމުގައި އަދިވެސް މުޒާހަރާތައް ކުރަމުންދާއިރު މިހާރު މުޒާހަރާތައް ކުރަމުންދަނީ އެ ޤައުމުގެ ރައީސް ގޮޓަބަޔަ ރާޖަޕަކްސަ އިސްތިއުފާދެއްވުމަށް ގޮވާލައެވެ.
