ޔޫކްރެއިނާއި މާޖެހުމާ އޮތީ ކޮން ގުޅުމެއް؟

އެކި ފަރުމާތަކަށް މާޖަހާފައިވާ ފޭރާމަކީ ޔޫކްރެއިންގެ ރައްޔިތުންނަށް ޚާއްސަ އެއްޗެކެވެ. ހަނގުރާމައިގެ ސަބަބުން އިންތިހާއަށް މާޔޫސްކަމާއި ނުތަނަވަސްކަން ވެރިވެފައިވާ މި ދަނޑިވަޅުގައިވެސް މާޖެހި ފޭރާންތަކުން ޔޫކްރެއިންގެ ރައްޔިތުންގެ މޫނު މައްޗަށް އުފާވެރިކަން ގެނެސްދެއެވެ. މާޖެހި ފޭރާމަށް ޔޫކްރެއިންގައި އޮންނަ ޚާއްސަ ގަދަރެއްގެ ސަބަބުން، އެކަމަށް ޚާއްސަ ދުވަހެއްވެސް އެ ޤައުމުގައި ފާހަގަކުރެއެވެ. ކޮންމެ އަހަރެއްގެވެސް މެއި މަހުގެ 3 ވަނަ ބުރާސްފަތި ދުވަސް، ޔޫކްރެއިންގައި ފާހަގަކުރަނީ މާޖެހިފޭރާމުގެ ދުވަސް ނުވަތަ ވިޝީވަންކާ ދުވަހުގެ ގޮތުގައެވެ.

ވިޝީވަންކާއަކީ ޔޫކްރެއިންގެ ސަޤާފީ ހެދުމެކެވެ. ޤައުމިއްޔަތުގެ ރޫޙު ދިރުވަނިވި ހެދުމެކެވެ. ވިޝީވަންކާގެ މަޤުބޫލުކަން އަނެއްކާވެސް ގަދަވީ، 2014 ވަނަ އަހަރު ރަޝިއާއިން ކްރައިމިއާ ހިފި ދުވަސްވަރާ ވިދިގެންނެވެ. ވިޝީވަންކާ ދުވަސް ފާހަގަކުރަން ފެށުމުގެ ތާރީޚަށް ބަލާއިރު، އެކަން ފެށިގެން އައީ ޔުނިވާސިޓީގައި ތައުލީމު ހާސިލު ކުރަމުން ދިޔަ ޒުވާނަކު، އޭނާގެ އެކުވެރިންނާއެކު އެއްދުވަހެއްގައި ވިޝީވަންކާ ލާން ނިންމި ހިސާބުންނެވެ. އެ ހަރަކާތް ފުޅާވަމުން ގޮސް، މިއަދު، ދުނިޔޭގެ އެކި ކަންކޮޅުތަކުގައި ދިރިއުޅޭ ޔޫކްރެއިން ދަރިކޮޅުގެ މީހުންވެސް ވިޝީވަންކާ ދުވަސް ފާހަގަކުރެއެވެ. މި ދުވަސްވަރަކީ ހަނގުރާމައިގެ ތެރޭގައި ޤައުމު ބަނަވެފައި ދުވަސްވަރެއް ކަމުން ޤައުމިއްޔަތުގެ ރޫޙު ވަކިން ގަދައެވެ.

ވިޝީވަންކާ ދުވަސް ފާހަގަކުރުމުގެ ގޮތުން ވޮލަންޓިއަރުން ވަނީ، އެންމެ ގަދީމީ ގޮތަށް މާޖަހާފައިވާ ފޭރަންތައް ހިފައިގެން، އޮޑެއްސާގެ ހޮސްޕިޓަލަކަށް ޒިޔާރަތް ކޮށްފައެވެ. އޮޑެއްސާއަކީ ރަޝިއާގެ އުދުވާންތައް އެންމެ ވަރުގަދަވި ސަރަޙައްދުތަކުގެ ތެރޭގައި ހިމެނޭ ސަރަޙައްދެކެވެ. އޮޑެއްސާގެ ހޮސްޕިޓަލުގައި އަލަށް އުފަންވެފައި ތިބި ކުދިންނަށް، ވިޝީވަންކާ ދުވަސް ފާހަގަކުރުމުގެ ގޮތުން، ޚާއްސަ ހަދިޔާއެއް ދިނެވެ. އަންހެން ކުދިންނަށް ދިނީ ރަތާއި ހުދުކުލައިގެ މާޖެހި ހެދުމެވެ. ފިރިހެން ކުދިންނަށް ނުލެވެ.

އަމިއްލަ މީހަކު އިސްނަގައިގެން ހިންގި މި ޙަރަކާތުގައި ހަދިޔާ ލިބުނު އޮޑެއްސާ ރީޖަނަލް މެޓާނިޓީ ހޮސްޕިޓަލު ހުންނަނީ ރަޝިއާއިން މިހާރުވެސް އުދުވާނީ ހަމަލާތައް ދެމުންދާ ސަރަހައްދާ ދާދި ކައިރީގައެވެ. ކޮންމެ ދުވަހަކު އެތައް ފަހަރަކު ސައިރަންގެ އަޑު އިވެއެވެ. ފެބުރުއަރީ 24 ވަނަ ދުވަހު ރަޝިއާގެ އަސްކަރިއްޔާ، ޚާއްސަ އޮޕަރޭޝަނެއްގެ ނަމުގައި ޔޫކްރެއިނަށް އެރި ފަހުން، މެޓާނިޓީ ވޯޑްގައި 300 އަށް ވުރެ ގިނަ ކުދިން އުފަންވެފައިވާ ކަމަށް އޮޑެއްސާ ރީޖަނަލް މެޓާނިޓީ ހޮސްޕިޓަލުން ވަނީ ބުނެފައެވެ.