އަފްޣާނިސްތާނުގެ އަންހެން ޓީވީ ޕްރެޒެންޓަރުން މޫނު ނިވާކުރުމަށް އަންގައިފި

އަފްޣާނިސްތާންގެ ޓީވީ ޕްރެޒެންޓަރުން މޫނު ނިވާކޮށްގެން ޕްރޮގްރާމްތައް ގެނެސްދިނުމަށް ޓީވީ ސްޓޭޝަންތަކަށް އަންގައިފިއެވެ.

ޓީވީ ސްޓޭޝަންތަަކަށް ތާލިބާނުން އެންގި އެންގުމުގައި ބުނެފައިވަނީ އަންހެން ޓީވީ ޕްރެޒެންޓަރުންގެ ޕްރޮގްރާމްތައް އެއަރ ކުރާއިރު އެމީހުން މޫނު ނިވާކޮށްގެން ޕްރޮގްރާމްތައް ހުށައަޅާދީފައިވާކަން ޔަޤީންކުރަން ޖެހޭނެ ކަމަށެވެ.

ދާދީ ފަހުން ތާލިބާނުން ވަނީ އަންހެނުން އާންމު ތަންތަނުގައި އުޅޭއިރު މޫނު ނިވާ ކޮށްގެން އުޅުންވެސް މަޖުބޫރު ކޮށްފައެވެ. މިނިސްޓްރީ ފޯރ ދަ ޕްރޮޕަގޭޝަން އޮފް ވާރޗޫ އެންޑް ޕްރޮވެންޝަން އޮފް ވައިސްގެ ތަރުޖަމާނު އާކިފް މުހާޖިރު އަލް ޖަޒީރާއަށް ވިދާޅުވީ، މިގޮތަށް ނިންމާފައިވަނީ ބުރާސްފަތި ދުވަހު ކަމަށެވެ. އަދި މިއީ މަޖުބޫރު ކަމެއް ކަމަށާއި، މިކަމާ ބެހޭ ގޮތުން އިތުރަށް މަޝްވަރާ ނުކުރެވޭނެ ކަމަށެވެ.

ބުރުގާ އެޅުމަކީ މުސްލިމް އަންހެނުންނަށް މަޖުބޫރު ކަމެއް ކަމަށާއި، ޓީވީ ޕްރެޒެންޓަރުން މޫނު ނިވާކުރުމަކީ ނަމޫނާއަކަށް ވާނެ ކަމެއް ކަމުގައިވެސް މުހާޖިރު ވިދާޅުވިއެވެ.

އައު ޤަވާއިދާއެކު އަފްޣާނިސްތާންގެ ބައެއް ސްޓޭޝަންތަކުން ވަނީ އެކަން ރަސްމީކޮށް އިއުލާންކޮށްފައެވެ.

ތާލިބާނުން 1996 - 2001ވަނަ އަހަރަށް އެ ޤައުމުގައި ވެރިކަން ކުރިއިރުވެސް އަންހެނުން މޫނު ނިވާކުރުން އޮތީ މަޖުބޫރުކޮށްފައެވެ.