ކޮންމެ އަހަރެއްގެ ވެސް އަޟްޙާ ޢީދާއި ގުޅިގެން ފީއަލީ ޑިވެލޮޕްމަންޓް ސޮސައިޓީ (އެފްޑީއެސް)ން ބާއްވަމުން އަންނަ އިންވިޓޭޝަން ވޮލީ ބޯޅަ މުބާރާތް ދެއަހަރުގެ މެދު ކެނޑުމަކަށްފަހު، "ގަދަކޮށް" މިއަހަރު ކުރިއަށް ގެންދަން ނިންމައި، ޝައުގުވެރިކަން ހުރި ޓީމުތަކަށް ނަން ހުށަހެޅުމުގެ ފުރުސަތު ހުޅުވާލައިފިއެވެ.

މި މުބާރާތަކީ 2017 ވަނަ އަހަރުން ފެށިގެން އެޖަމިއްޔާއިން ބާއްވަމުން އަންނަ މުބާރާތެކެވެ. ނަމަވެސް ކޮވިޑުގެ ސަބަބުން ކުޅިވަރަށް އައި ހުއްޓުމާއެކު، 2020 ވަނަ އަހަރާއި 2021 ވަނަ އަހަރު މިމުބާރާތް ނުބާއްވައެވެ.

މުބާރާތުގައި އެޖަމިއްޔާގެ ޓީމުތަކުގެ އިތުރުން، ޖަމިއްޔާއިން ދައުވަތު ދޭ ޓީމުތަށް ބައިވެރިކުރެއެވެ. އޭގެ ތެރޭގައި ރަށުން ބޭރު ޓީމުތައް ވެސް ހިމެނެއެވެ. މުބާރާތް އެންމެ ފުރަތަމަ ބޭއްވީ 2017 ވަނަ އަހަރުއެވެ.

އެފްޑީއެސްގެ ރައީސް އިބްރާހިމް ނަސީމް ވިދާޅުވީ މިއަހަރުގެ މުބާރަތް ބޭއްވުމަށް ހަމަޖެހިފައިވަނީ އަންހެން އަދި ފިރިހެން ޑިވިޝަން ހިމެނޭ ގޮތަށް "ގަދަކޮށް" މި ޝިއާރުގެ ދަށުން ކަމަށެވެ.

މުބާރާތުގައި ބައިވެރިވުމުގެ ޝައުގުވެރިކަން ހުރި ޓީމުތަކުން ނަން ހުށަހެޅުމަށް މިހާރު ވަނީ ހުޅުވާލާފައެވެ. މި މުބާރާތަކީ އިންވިޓޭޝަން މުބާރާތަކަށްވުމުން، ނަން ހުށަހަޅާ ޓީމުތަކުގެ ތެރެއިން މުބާރާތުގައި ކުޅޭނީ އެޖަމިއްޔާއިން އިންވިޓޭޝަން ފޮނުވާ ޓީމުތަކެވެ.

މި މުބާރާތުގައި މީގެ ކުރިން ވަނީ ރާއްޖެއިން ބޭރު ޤައުމުތަކުގެ ގައުމީ ޓީމުގެ ވަރުގަދަ ކުޅުންތެރިން ކުޅެފައެވެ.