އެމްޑީޕީގެ ޗެއަރޕަރސަން ކަމުގެ މަގާމަށް އިންތިޚާބުވެވަޑައިގަންނަވާފައިވާ އިކޮނޮމިކް މިނިސްޓަރ ފައްޔާޒު އިސްމާއީލާއެކު 2023 ކާމިޔާބުކުރުމަށް ރަނގަޅު މިސްރާބަށް ދަތުރުކުރާނެ ކަމުގެ ޔަގީންކަން އެބައޮތްކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.
ފައްޔާޒުއާ ބައްދަލުކުރައްވައި ނަންގަވާފައިވާ ފޮޓޯއަކާއެކު ރައީސް ކުރެއްވި ޓްވީޓުގައި ވަނީ، ފައްޔާޒަށް މަރުހަބާ ވިދާޅުވެފައެވެ. އަދި ފައްޔާޒުގެ ހިންގުމުގެ ތަޖުރިބާއާއެކު ޕާޓީއާއެކު ކުރިއަށްގޮސް، 2023 ކާމިޔާބުކުރުމަށް ރަނގަޅު މިސްރާބަށް ދަތުރުކުރާނެ ކަމުގެ ޔަގީންކަން އެބައޮތްކަމަށް އެމަނިކުފާނު ވިދާޅުވިއެވެ.
އެމްޑީޕީގެ ޗެއަރޕަރސަން އިންތިޚާބު ފައްޔާޒު ކާމިޔާބުކުރެއްވީ ވާދަވެރި އިންތިޚާބުގައި މާފަންނު އުތުރު ދާއިރާގެ މެމްބަރ އިމްތިޔާޒު ފަހުމީ(އިންތި)އާ ވާދަކުރައްވައިގެންނެވެ. ކެމްޕެއިން ތެރޭގައި ބަހުގެ ހޫނު ހަމަލާތަކެއް ބަދަލުކޮށްފައިވާއިރު، އިންތިޚާބަށްފަހު އެމްޑީޕީގެ ރައީސް، ރައީސް މުހައްމަދު ނަޝީދު ފައްޔާޒަށް މަރުހަބާ ވިދާޅުވެ ކުރެެއްވި ޓްވީޓެއްގައި ވިދާޅުވެފައިވަނީ، ފައްޔާޒް އިސްމާއީލް އެމްޑީޕީގެ ޗެއަރޕަރސަންގެ މަގާމުގައި ހުންނަވައި އެމްޑީޕީއަށް އިތުރު ކާމިޔާބީތައް ހޯދައިދެއްވާނެކަމާއިމެދު ޝައްކުނުކުރައްވާކަމަށެވެ.
ކެމްޕެއިން ތެރޭގައި ހިނގައިދިޔަ ކަންތައްތަކަކަށްފަހުވެސް ދެގޮތެއް ނުވެ އެމްޑީޕީ ކުރިޔަށްދާނެކަމަށް ފައްޔާޒު ވަނީ ވިދާޅުވެފައެވެ. އަދި ރައީސް ނަޝީދުއާއި އިންތިއާއެކު މަސައްކަތްކުރެއްވުމަށް ތައްޔާރަށް ހުންނެވިކަމަށް ވަނީ ވިދާޅުވެފައެވެ.
އިންތިޚާބަށް ފައްޔާޒަށް ނުކުންނެވީ 2023 ވަނަ އަހަރު ރައީސް ސޯލިހަށް ކާމިޔާބުކޮށްދިނުމަށް އެމްޑީޕީ "ހިންގާލުމުގެ" ނަމުގައެވެ.
މިމަހުގެ 14 ވަނަދުވަހު ބޭއްވި އެމްޑީޕީގެ ޗެއަރޕަރސަން އިންތިޚާބު ފައްޔާޒު ކާމިޔާބުކުރެއްވީ 27،163 ވޯޓުންނެވެ. އެމްޑީޕީން އާންމުކޮށްފައިވާ ވަގުތީ ނަތީޖާ ދައްކާގޮތުން އިންތިއަށް ލިބިވަޑައިގަތީ 19،980 ވޯޓެވެ. މި އިންތިޚާބުގައި ޖުމްލަ 48،107 މީހުން ވޯޓުލާފައިވެއެވެ.
