ކްލިންޓަންގެ ދަރިއެއް ކަމަށް ދައުވާކުރާ ވިލިއަމްސްގެ އެކައުންޓް ޓްވިޓާ އިން ވެރިފައި ކޮށްފި
ވިލިއަމްގެ މަންމައަކީ ކުރިން އާކަންސަސްގެ ހަށިވިއްކާ މީހެއް
ޑެނީ ވިލިއަމްސް: އޭނާ ބުނާ ގޮތުން އޭނާއަކީ އެމެރިކާގެ ކުރީގެ ރައީސް ބިލް ކްލިންޓަންގެ ނަހަލާލު ދަރިއެއް
އެމެރިކާގެ ކުރީގެ ރައީސް ބިލް ކްލިންޓަންގެ ދަރިއެއް ކަމަށް އަމިއްލަ އަށް ބުނަމުން އަންނަ ޑެނީ ލީ ވިލިއަމްސްގެ އެކައުންޓް ޓްވިޓާ އިން ވެރިފައި ކޮށްފިއެވެ.
ވިލިއަމްސްގެ އެކައުންޓް ޓްވިޓާ އިން ވެރިފައިކުރުމާ އެކު ގިނަ ބައެއްގެ ފަޑުކިޔުންތައް ޓްވިޓާ އަށް ވަނީ އަމާޒުވެފައެވެ.
ވިލިއަމްސްގެ ވާހަކަ އެންމެ ބޮޑަށް ދެކެވެން ފެށީ މިދިޔަ އަހަރު އޮތް އެމެރިކާގެ ރިޔާސީ އިންތިޚާބުގައި ވާދަކުރެއްވި ކްލިންޓަންގެ އަނބިކަނބަލުން ހިލަރީ ކްލިންޓަންގެ ކެމްޕެއިން ދުވަސްވަރުއެވެ. އެ ދުވަސް ވިލިއަމްސް ވަނީ ސޯޝަލް މީޑިއާ މެދުވެރިކޮށް އޭނާއަކީ ކްލިންޓަންއަކީ އޭނާގެ ބައޮލޮޖިކަލް ބައްޕަ ކަމަށް ބުނެފައެވެ. އޭނާގެ މަންމައަކީ އާކަންސަންސްގައި ކުރިން ސެކްސް ވޯކާއެއް ނުވަތަ ހަށިވިއްކާ މީހެއްގެ ގޮތުގައި މަސައްކަތްކުރި މީހެކެވެ. ބުނެވޭ ގޮތުގައި އެ އަންހެން މީހާ އާއި ކްލިންޓަންއާ ދެމެދު ގުޅުމެއް ހިނގާފައި ވަނީ އާކަންސަސްގެ މޭޔަރަކަށް ކްލިންޓަން ހުންނެވި ދުވަސްވަރުއެވެ.
ވިލިއަމް ބުނާ ގޮތުން އޭނާއަކީ ކްލިންޓަންގެ ދަރިއެއް ކަމަށާއި އޭނާ އުފަންވުމުން އެކަން އެންގުމަށް އޭނާގެ ބޮޑު ދައިތަ ކްލިންޓަންގެ ގެއަށް ވެސް ދިޔަ ކަމަށެވެ. ނަމަވެސް ހިލަރީ އެ މީހުން ބޭރުކޮށްލީ ކަމަށާއި އެކަން ބަލައިގަންނަން އޭރު ދެކޮޅު ހެދީ ކަމަށެވެ. މީޑިއާތަކުން ވަނީ ވިލިއަމްސްގެ ފޮޓޯތަކާއި ކްލިންޓަންގެ ފޮޓޯތައް އަޅާ ކިޔައި އެ ދެ މީހުންގެ އެއްވައްތަރު ސިފަތައް ފާހަގަކޮށްފައެވެ. އަދި މިހާރުގެ ރައީސް ޑޮނާލްޑް ޓްރަމްޕްގެ ކެމްޕެއިން ހަރަކާތްތަކުގައި އިސްކޮށް އުޅުނު ފަރާތްތަކުން ވަނީ ވިލިއަމްސްގެ މި ވާހަކަތައް ހިތްވަރުދީ ކަމުގެ ހަގީގަތް ބެލުމަށް ގޮވާލާފައެވެ. އަދި ވިލިއަމް ވެސް ވަނީ ޑީއެންއޭ ޓެސްޓް ހެދުމަށް ގޮވާލައިފައެވެ. އަދި އެކަމުގެ ދައުވާ ތައްޔާރުވަމުން އަންނަ ކަމަށް މި އަހަރުގެ އޭޕްރީލް މަހު އޭނާ ބުނެފައި ވެއެވެ.
މިއަހަރުގެ މޭ މަހުގެ ތެރޭގައި ވިލިއަމްސް މަރުވެފައި އޮއްވާ ފެނުނު ކަމަށް ބުނެ ޚަބަރުތަކެއް ފެތުރިގެން ދިޔައެވެ. އެކަމާ ގުޅޭ ޚަބަރުތައް މީޑިއާގައި ޝާއިއުކޮށްފައި ވެސް ވެއެވެ.
ވިލިއަމްސް އާންމުކޮށްފައިވާ ވީޑިއޯއެއްގައި އޭނާ ބުނެފައި ވަނީ އޭނާ ބޭނުން ވަނީ ހަމައެކަނި އޭނާގެ ބައްޕައާ ސަލާމްކޮށްލުމަށް ކަމަށެވެ.
ވިލިއަމްސް ބުނީ ނިއު ޔޯކް ސެނެޓްގެ ގޮނޑިއަށް ކްލިންޓަންގެ ދަރި ޗެލްސީ ކްލިންޓަންއާ ދެކޮޅަށް އޭނާ ކުރިމަތިލުމަށް ސިޔާސީ ބައެއް ފަރާތްތަކުން ގޮވާލަމުން ދާ ކަމަށެވެ. އޭގެ ތެރޭގައި އެމެރިކާގެ މަޝްހޫރު ޕޮލިޓިކަލް ކޮންސަލްޓެންޓް އަދި ރައީސް ޓްރަމްޕްގެ ޕޮލިޓިކަލް އެޑްވައިޒަރު ކަމަށްވާ ރޮޖާ ސްޓޯން ހިމެނިވަޑައިގަންނަވައެވެ.
