ކުރިން ހީކުރެވުނު ގޮތާ ޚިލާފަށް ފޭސްބުކުން ހެކް ކޮށްފައި ވަނީ 30 މިލިއަން އެކައުންޓް ކަމަށް އެ ކުންފުނިން ބުނެފިއެވެ.
ހުކުރު ދުވަހު ފޭސްބުކުން ނެރުނު ބަޔާނުގައި ބުނީ 50 މިލިއަން އެކައުންޓް ހެކް ކުރި ކަމަށް ކުރިން ހީކުރެވުނު ނަމަވެސް ހެކް ކޮށްފައި ވަނީ 30 މިލިއަން އެކައުންޓް ކަމަށެވެ. ހެކަރުން އެކައުންޓްތައް ހެކް ކުރީ ޕްރޮފައިލް ފެންނަ ގޮތް ބެލުމަށް ތައްޔާރުކޮށްފައިވާ ނިޒާމް، 'ވިއު އެސް' ބޭނުން ކޮށްގެންނެވެ. ހެކަރުން ވަނީ އެ ނިޒާމުގެ ތެރެއިން އެހެން އެކައުންޓްތަކުގެ ސެކިއުރިޓީ ޓޯކަންސް ވަގަށް ދަމައިގަނެފައެވެ.
ސެކުރިޓީ ޓޯކަން އަކީ ފޭސްބުކް އަށް ލޮގިން ވުމަށް ފަހު، އަމިއްލައަށް ލޮގްއައުޓް ނުވާހާ ހިނދަކު ލޮގް އައުޓް ނުވާ ގޮތަށް ހެދުމަށް ބޭނުން ކުރާ ޓޯކަން އެކެވެ. އެހެން އެކައުންޓްތަކަށް، އެ ޓޯކަން ލިބިއްޖެ ނަމަ އެ ޓޯކަންގެ ވެރި ފަރާތުގެ އެކައުންޓަށް ވަދެވޭނެއެވެ.
އެމެރިކާގެ ސޯޝަލް މީޑިއާގެ އެ ކުންފުނިން ބުނީ އެކައުންޓްތައް ހެކް ކުރިކަން އެގުނީ އެއް ފަހަރާ އެތައް ބައެއްގެ އެކައުންޓްތަކުން ތަފާތު ސިގްނަލްތަކެއް ލިބުމުން އޮކްޓޯބަރު 25 ގައި އެކަން ތަހްގީގު ކުރުމުން ކަމަށެވެ. ފޭސްބުކުން މިހާރު ދަނީ އެފްބީއައި. އާ އެކު ހެކް ކުރީ ކޮންބައެއްތޯ ހޯދައި، އެ މައްސަލަ އިތުރަށް ތަހްގީގު ކުރަމުން ކަމަށް އެ ކުންފުނިން ބުނެއެވެ.
ފޭސްބުކުން ބުނީ ހެކަރުން އެ އެކައުންޓްތަކުން ދަމައިގަނެފައިވާ މައުލޫމާތުތަކަށް ބަލާއިރު، ހެކް ކުރެވުނު 30 މިލިއަން އެކައުންޓްގެ ތެރެއިން 15 މިލިއަން މީހުންގެ އެކައުންޓުން ދެ މައުލޫމާތެއް ދަމައިގަނެފައިވާ ކަމަށެވެ. އެއީ އެކައުންޓް ވެރިފަރާތުގެ ނަމާއި ކޮންޓެކްޓް މައުލޫމާތެވެ. ކޮންޓެކްޓް މައުލޫމާތުގެ ތެރޭގައި ފޯން ނަމްބަރާއި އީމެއިލް ހިމެނެއެވެ.
އެ މައުލޫމާތުތަކުގެ އިތުރުން 14 މިލިއަން މީހުންގެ އެކައުންޓުން އެ މީހުންގެ ޖިންސާއި ވާހަކަ ދައްކާ އުޅޭ ބަހާއި ރިލޭޝަންޝިޕް ސްޓޭޓަސް އާއި ދީނާއި ދާއިމީ އަދި ވަގުތީ އެޑްރެހާއި އުފަންދުވަހާއި ފޭސްބުކަށް ވަންނަ ޑިވައިސްތަކުގެ މައުލޫމާތާއި ކިޔަވާ އަދި މަސައްކަތް ކުރާ ތަނުގެ މައުލޫމާތާއި އެންމެ ފަހުން ޗެކިންވެފައިވާ 10 ތަނުގެ މައުލޫމާތުގެ އިތުރުން ފޭސްބުކް މެދުވެރިކޮށް ކޮށްފައިވާ އެންމެ ފަހުގެ 15 ސާޗް ހެކަރުން ވަގަށް ނަގާފައި ވެއެވެ.
ފޭސްބުކުން ބުނީ އެކައުންޓަތައް ހެކް ކުރި ނަމަވެސް އެކަމުގެ ސަބަބުން ފޭސްބުކުން ލޮގިން ވެފައިވާ އެޕްލިކޭޝަންތަކަށް އެއްވެސް ނުރައްކަލެއް ނެތް ކަމަށެވެ.
މިއީ ފަހުގެ ތާރީޚެއްގައި ފޭސްބުކަށް ދިމާވި އެންމެ ބޮޑު ސެކިއުރިޓީ މައްސަލައެވެ.
