ކައުންސިލްތަކުން ވިޔަފާރިކުރެވޭނެ ދާއިރާތައް ކަނޑައަޅައިފި
19 މެއި 2022 | ބުރާސްފަތި 09:57ވިޔަފާރިކުރުމުގެ ބާރު ކައުންސިލްތަކަށް މިހާރު ވަނީ ދީފައި
މާލެ ސިޓީ
ކައުންސިލްތަކުން ލޯކަލް އޮތޯރިޓީ ކުންފުނި އުފެއްދުމާއި، އަމިއްލަ ފަރާތްތަކާއެކު ވިޔަފާރި ކުރުމާބެހޭ ގަވާއިދަށް އެއްވަނަ އިސްލާހު ގެނެސްފިއެވެ.
މި ގަވާއިދަށް ގެނައި އިސްލާހު މިހާރު ވަނީ ސަރުކާރުގެ ގެޒެޓުގައި ޝާއިއުކޮށްފައެވެ.
އިދާރީ ދާއިރާތަކަށް ލާމަރުކަޒީ އުސޫލުން ހިންގުމަށްޓަކައި، ގާނޫނަށް އިސްލާހު ގެނެސް، ވިޔަފާރިކުރުމުގެ ބާރު ކައުންސިލްތަކަށް ވަނީ ދީފައެވެ. މި ބާރު ކައުންސިލްތަކަށް ދީފައިވާއިރު، އުފައްދާ ކުންފުނީގެ މަގުސަދު ހާސިލު ކުރުމަށްޓަކައި، ހިންގާ ވިޔަފާރި ހަރަކާތްތައް ބެހިގެންވަނީ 2 ބާވަތަކަށެވެ. އެއީ ހުއްދަ ވިޔަފާރިތަކާއި، އެ ރަށެއްގައި އަމިއްލަ ފަރާތްތަކުން، އެ ވިޔަފާރި ހަރަކާތެއް ނުވަތަ ވިޔަފާރި ހަރަކާތްތަކެއް ހިންގާ މިންވަރަށް ރިއާޔަތްކޮށް، ވިޔަފާރީގެ ވާދަވެރިކަމަށް ކުރާނެ އަސަރާއި، ރައްޔިތުންނަށް ލިބޭނެ ފައިދާ މިންކުރުމަށްފަހު ހުއްދަދޭ ވިޔަފާރި ހަރަކާތްތަކެވެ.
މި ގަވާއިދުގެ ދަށުން ހުއްދަ ދެވޭނީ އެ ސިޓީއެއް ނުވަތަ އެ ރަށެއް ނުވަތަ އެ އަތޮޅެއްގައި އަމިއްލަ ފަރާތްތަކުން ވިޔަފާރި ނުކުރާ ދާއިރާތަކަށެވެ. ހުއްދަ ދީފައިވާ ދާއިރާތަކުގެ ތެރޭގައި ހިމެނެނީ ކޮންވެންޝަން ސެންޓަރ، ތައުލީމު ދޭ ތަންތަން، ކްލިނިކް، ހޮސްޕިޓަލް، ރިނިއުވަބަލް އެނަރޖީ، ގެސްޓް ހައުސް ނުވަތަ ޓޫރިސްޓު ހޮޓެލް، އެއަރޕޯޓް ހިންގުން، ކުނި މެނޭޖްކުރުން، ދަނޑުވެރިކަން، މަސް ޕްރޮސެސްކުރުން، އައިސް ޕްލާންޓް ގާއިމްކުރުން، ސޯޝަލް ހައުސިން، ކޭބަލް ޓީވީގެ ޚިދުމަތް ދިނުން، ބޯޓު ޔާޑު ގާއިމްކުރުން، ފާރމަސީ ހިންގުމުގެ އިތުރުން އަސާސީ ތަކެތި ވިއްކާ ފިހާރަ ހިންގުމެވެ.
އެ ސިޓީއެއްގައި ނުވަތަ އެ ރަށެއްގައި ނުވަތަ އެ އަތޮޅެއްގައި އަމިއްލަ ފަރާތްތަކުން ވިޔަފާރިކުރާ ދާއިރާތައް ނުވަތަ އެ ސިޓީއެއްގައި ނުވަތަ އެ ރަށެއްގައި ނުވަތަ އެ އަތޮޅެއްގައި އަމިއްލަ ފަރާތްތަކުން ވިޔަފާރިކުރިނަމަވެސް، އެކަށީގެންވާ މިންވަރަށް މުދާ ނުވަތަ ޚިދުމަތް ފޯރުކޮށްނުދެވޭ ދާއިރާތަކަށްވެސް ހުއްދަ ދެވިގެންދާނެ ކަމަށް ގަވާއިދުގައި ވެއެވެ. މި ދާއިރާތަކުގެ ތެރޭގައި ހިމެނެނީ ތައުލީމު ދޭ ތަންތަން، ހޮސްޕިޓަލް، ކްލިނިކް، ރިނިއުވަބަލް އެނަރޖީ، ކުނި މެނޭޖްކުރުން، ދަނޑުވެރިކަން، މަސް ޕްރޮސެސްކުރުން އަދި އައިސް ޕްލާންޓް ޤާއިމުކުރުމުގެ އިތުރުން ބޯޓް ޔާޑު ގާއިމުކުރުމެވެ.
ގަވާއިދުގައި ފާހަގަކޮށްފައިނުވާ ވިޔަފާރި ހަރަކާތެއް ހިންގުމަށް އެދޭ ކައުންސިލަކުން، އެ ރަށެއްގައި ނުވަތަ އެ ދާއިރާއެއްގައި، އެ ވިޔަފާރި ހަރަކާތެއް ނުވަތަ ވިޔަފާރި ހަރަކާތްތަކެއް ހިންގާ މިންވަރަށް ރިޢާޔަތްކޮށް، ވިޔަފާރީގެ ވާދަވެރިކަމަށް ކުރާނެ އަސަރާއި، ރައްޔިތުންނަށް ލިބޭނެ ފައިދާ މިންކުރުމަށް ސަރުކާރުން ބޭނުންވާ މައުލޫމާތު ފޯރުކޮށްދިނުމަށްފަހު އެ ވިޔަފާރި ހަރަކާތް ހިންގުމުގެ ހުއްދަ އިކޮނޮމިކް މިނިސްޓްރީން ހޯދަންޖެހެއެވެ. އަދި މިނިސްޓްރީން ހުއްދަ ދޭއިރު، ލޯކަލް ގަވަރމަންޓް އޮތޯރިޓީގެ ލަފާ ހޯދަންޖެހެއެވެ.
މި ގަވާއިދުގެ ދަށުން ހުއްދަކޮށްފައިވާ ވިޔަފާރި ހަރަކާތް ފިޔަވައި، އެހެން ވިޔަފާރި ހަރަކާތެއް ހިންގާނަމަ، 10،000 ރުފިޔާއިން ޖޫރިމަނާކުރެވޭނެއެވެ.
