ލިވަޕޫލް ދޫކޮށް އޮރީގީ އޭސީ މިލާނަށް ބަދަލުވަނީ

އިނގިރޭސި ޕްރިމިއާ ލީގުގެ ލިވަޕޫލަށް ކުޅެމުން އަންނަ ބެލްޖިއަމްގެ ޑިވޮކް އޮރީގީ އެ ޓީމު ދޫކޮށް އިޓަލީގެ އޭސީ މިލާނަށް ބަދަލުވާން ނިންމައިފިއެވެ.

ހިލޭ ޓްރާންސްފާއެއްގައި ލިވަޕޫލް ދޫކޮށް އޭސީ މިލާނަށް ބަދަލުވުމަށް އޭނާ ނިންމާފައިވާއިރު، އޭނާގެ ނިންމުމާމެދު ލިވަޕޫލް ގަބޫލެވެ. މީގެ ކުރިން އޮރީގީ ވަނީ ލިވަޕޫލާއެކު ހަދާފައިވާ އެއްބަސްވުމުގެ މުއްދަތު ހަމަވުމުން އެއްބަސްވުން އައު ނުކުރަން ނިންމައިފައެވެ. އެއާއެކު އޭނާ ހޯދުމުގެ މަސައްކަތް އޭސީ މިލާނުން ފެށިއެވެ. އޭރު އޭސީ މިލާނުން ވަނީ ހިލޭ ޓްރާންސްފާއެއްގައި އޮރީގީ ހޯދުމަށް ޕްރޮޕޯސަލެއް ހަދާފައެވެ.

ކުޅިވަރު ނޫސްވެރިޔާ ފްބެރީޒިއޯ ރޮމާނޯ ބުނި ގޮތުގައި އޮރީގީ ދާން ނިންމާފައިވާ ޓީމާމެދު އެއްވެސް އޮޅުމެއް ނެތް ކަމަށެވެ. އަދި މިހާރު އޮރީގީ މަޑުކުރަނީ ކުރިއަށް އޮތް ހަފްތާތަކުގެ ތެރޭގައި މެޑިކަލް ޓެސްޓުތައް ހެދުމާއި، އޭސީ މިލާނާ ދެމެދު އެއްބަސްވުމުގައި ސޮއިކުރުމަށް ކަމަށެެވެ. ލިވަޕޫލާއެކު އޮރީގީ ހަދާފައިވާ އެއްބަސްވުމުގެ މުއްދަތު ޖޫން މަހުގެ ނިޔަލަށް ހަމަވާނެއެވެ.

ފްރާންސްގެ ލީލް އޮލިމްޕިކް ސްޕޯޓިން ކުލަބުން ސީނިއާ ކެރިއަރު ފެށި އޮރީގީ އެ ޓީމު ދޫކޮށް ލިވަޕޫލަށް ބަދަލުވީ 2014 ވަަނަ އަހަރުއެވެ. އޭގެ ފަހުން އޭނާ ވަނީ ލިވަޕޫލަށް 107 މެޗު ކުޅެދީ 22 ލަނޑު ޖަހައިދީފައެވެ. ލިވަޕޫލުގައި ހުރުމަށްފަހު އޭނާ ވަނީ ލޯނު އެއްބަސްވުމެއްގެ ދަށުން ދެ ކުލަބަކަށް ކުޅެފައެވެ. އޭގެ ތެރޭގައި އޭނާ ކުރިން ކުޅުނު ލީލް ހިމެނެއެވެ. ދެން އޭނާ ކުޅުނީ ވުލްވްސްބާގަށެވެ. މީގެ އިތުރުން އޮރީގީ އަކީ ބެލްޖިއަމްގެ ގައުމީ ޓީމަށް ވެސް ކުޅޭ ކުޅުންތެރިއެކެވެ. 2014 ވަނަ އަހަރު ގައުމީ ޓީމަށް ކުޅެން ފެށި ފަހުން މިހާތަނަށް އޭނާ ވަނީ ބެލްޖިއަމްއާއެކު 32 މެޗު ކުޅެފައެވެ.