މެމްބަރު ޝަހީމަށް ޗެޓް ލޮގްގެ ކޮޕީ ދިނުމަށް އާންމު ކޮމިޓީން ނިންމައިފި

ހެންވޭރު ދެކުނު ދާއިރާގެ މެންބަރު ޙުސައިން ޝަހީމް (އަނދުން ހުސެއިން) ހޯއްދަވަން އެދިވަޑައިގެންނެވި ޗެޓް ލޮގް މަޖިލީހުގެ އިދާރާއިން ދިނުމަށް އާންމު ކޮމިޓީން ނިންމައިފިއެވެ.

މި ގޮތަށް ނިންމީ، ރައްޔިތުންގެ މަޖިލީހުގެ ވަޓްސްއަޕް ގްރޫޕުގައި 8 މޭ 2022 ވަނަ ދުވަހުގެ 19:01 އިން 20:26 އަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ފޮނުއްވާފައިވާ އެންމެހައި މެސެޖްތަކުގެ ކޮޕީ ހޯއްދެވުމަށް އެދި ހެންވޭރު ދެކުނު ދާއިރާގެ މެންބަރު ޙުސައިން ޝަހީމް ފޮނުއްވާފައިވާ ސިޓީގެ މައްސަލައާ ގުޅޭގޮތުން އަމަލު ކުރަންވީ ގޮތުގެ ލަފަޔަކަށް އެދި ރައްޔިތުންގެ މަޖިލީހުގެ ރައީސް ފޮނުއްވާފައިވާ މައްސަލަ ދިރާސާކުރުމަށް ފަހުގައެވެ.

މި މައްސަލައަކީ، 6 މޭ 2021 ގައި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް ދީނީ ހަރުކަށި ފިކުރުގެ ބަޔަކު ކަމަށް ތުހުމަތުކުރެވޭ ބަޔަކު ދިން ބޮމުގެ ޙަމަލާގެ ފަހަތުގައި މެމްބަރު ޝަހީމްގެ ބައިވެރިވުމެއް އޮތް ކަމަށް ދޭހަވާގޮތަށް 8 މޭ 2022 ގައި ރައްޔިތުންގެ މަޖިލީހުގެ ވަޓްސްއެޕް ގުރޫޕުގައި ރައްޔިތުންގެ މަޖިލީހުގެ ރައީސް އެއްވެސް އަސާސެއް ނެތް ތުހުމަތުތަކެއް ކުރައްވާފައިވާ ކަމަށް ބުނެ، އެ މައްސަލަ ކަމާބެހޭ ފަރާތްތަކަށް ހުށައެޅުމަށްޓަކައި އެ ޗެޓް ލޮގްގެ ކޮޕީ ހޯއްދެވުމަށް ރައްޔިތުންގެ މަޖިލީހުގެ އިދާރާއަށް ފޮނުވުމުން އެކަމާ މެދު އާންމު ކޮމިޓީގެ ލަފައެއް ހޯއްދެވުމަށް މަޖިލީހުގެ ރައީސް ފޮނުއްވާފައިވާ މައްސަލައެކެވެ.

މި މައްސަލައާ ގުޅޭގޮތުން އަންގާރަ ދުވަހު ކުރިއަށް ދިޔަ ކޮމިޓީ ބައްދަލުވުމުގައި ކޮމިޓީގެ މުޤައްރިރު، ހެންވޭރު ހުޅަނގު ދާއިރާގެ މެމްބަރު ޙަސަން ލަތީފް ވިދާޅުވީ، އެފަދަ ގޮތަކަށް މަޖިލީހުގެ ވަޓްސްއަޕް ގްރޫޕަށް ފޮނުވާ މެސެޖަކާއި ގުޅިގެން މީގެ ކުރިން މައުލޫމާތު ދެވިފައިވޭތޯ އިދާރީ ގޮތުން ޗެކު ކުރައްވާފައިވާ ކަމަށެވެ. ނަމަވެސް މިފަދަ ވަޓްސްއަޕް ގްރޫޕެއް ފުރަތަމަ އުފައްދާފައިވަނީވެސް 19 ވަނަ މަޖިލީހުގައިކަމަށް މަޖިލީހުގެ އަމީންއާންމު މައުލޫމާތު ދެއްވާފައިވާކަމަށް އޭނާ ވިދާޅުވިއެވެ.

މިއީ ތިންވަނަ ފަރާތެއްގެ މަސްލަޙަތު ހިމެނޭ ކަމަކަށްވާތީ ތަހުގީގީ އިދާރާއަކުން އެދިއްޖެ ހާލަތެއްގައި އެ މެސެޖްތައް ދިނުން ރަނގަޅުކަމަށް ފެންނަކަމަށް އަންގާރަ ދުވަހުގެ ބައްދަލުވުމުގައި ވޯޓަށް އެހުމުން ފާސްވުމަށް ބޭނުންވާ ވަރަށް ވޯޓު ނުލިބުމުން އެ ހުށަހެޅުން ފާސްވެގެން ނުދިޔައެވެ.

ބުދަ ދުވަހުގެ ބައްދަލުވުމުގައި މައްސަލަ ދިރާސާ ކުރައްވަމުން މެމްބަރުން ވިދާޅުވީ، ގްރޫޕްގެ އެޑްމިންއަކަށް އެސްޖީވެސް އިންނެވުމުން އެއީ ރަސްމީ ގްރޫޕެއް ކަމަށް ބެލެވޭ ކަމަށެވެ. އެހެންކަމުން ގްރޫޕްގައި ދެކެވިފައި ހުރި ވާހަކަތަކުން މެމްބަރު ޝަހީމް އެދި ވަޑައިގަންނަވާ ޗެޓް ލޮގްގެ ކޮޕީ މަޖިލީހުގެ އިދާރާއިން ދިނުމަށް ކޮމިޓީން ވަނީ ފާސްކޮށްފައެވެ.

ރައްޔިތުންގެ މަޖިލީހުގެ ވަޓްސްއެޕް ގްރޫއްޕަށް ފޮނުއްވި މެސެޖްގައި ރައީސް ނަޝީދު ވިދާޅުވެފައިވަނީ އެމަނިކުފާނު އަވަހާރަކޮށްލަން ދިން ބޮމުގެ ހަމަލާއާއި ގުޅޭ ތަހުގީގަކީ ހަމައެކަނި މެންބަރު ހުސައިން ޝަހީމްގެ ކަމެއް ކަމަށް ދެކެވަޑައިނުގަންނަވާ ކަމަށެވެ. އަދި އެ ހުންނަވަނީ އެކަން ފޮރުވަން ކުރައްވާ މަސައްކަތުގެ ބައިވެރިއެއްގެ ގޮތުގައި ކަމަށް ރައީސް ނަޝީދު ވިދާޅުވެފައިވެއެވެ. މި ވާހަކައަށް ރައްދުދެއްވާ މެންބަރު ޝަހީމް ވިދާޅުވެފައިވަނީ މީހެއްގެ ބޮލުގައި ކަމެއް އަޅުވަން ހައްދެއް އޮންނަންވާނެ ކަމަށެވެ.