މާލެ ސިޓީ ކައުންސިލްގެ ތުހުމަތުތައް ސީއެސްސީއަށް، ޙަޤީޤަތަކީ ކޮބާ؟
18 މެއި 2022 | ބުދަ 06:57މާލެ ސިޓީ ކައުންސިލުން ބުނީ މުވަައްޒަފުން ނެގުމުގައި ސީއެސްސީން ހުރަސް އަޅާ ކަމަށް
މާލެ ސިޓީ ކައުންސިލުން ބޭއްވި ނޫސްވެރިންގެ ބައްދަލުވުމުގައި މޭޔަރު ވާހަކަފުޅުދައްވަނީ
މާލެ ސިޓީ ކައުންސިލުގެ މި ދައުރަށް އަހަރެއް ވެފައިވާއިރު އެއް އަހަރު ފާހަގަކުރުމުގެ ގޮތުން ބޭއްވި ނޫސްވެރިންގެ ބައްދަލުވުމުގައި އަޑުއިވުނީ އެއް ވާހަކަތަކެކެވެ. ފިއްތުންތަކާ ހުރެ ކަންކަން ނުކުރެވޭ ކަމަށާއި މުވައްޒަފުންގެ ދަތިކަމުގެ ވާހަކައެވެ. ސިޓީ ކައުންސިލުގައި މުވައްޒަފުން މަދުވެ އާއްމުން ގުޅާލުމުން ފޯނު ނަގާނެ މީހަކުވެސް ނުވާ ވާހަކައެވެ. ކައުންސިލަކީ އާއްމުންނާ ގާތުން މަސައްކަތް ކުރަން ޖެހޭ ބަޔަކަށް ވާއިރު އެތަނުން ފޯނު ނުނަގާތީ ސޯޝަލް މީޑިއާގައި ވެސް އެތައް ބަޔަކު ވަނީ ކަންބޮޑުވުން ފާޅުކޮށްފައެވެ.
އަންގާރަ ދުވަހު މާލެ ސިޓީ ކައުންސިލުން ބޭއްވި ނޫސްވެރިންގެ ބައްދަލުވުމުގައި މޭޔަރު ޑރ. މުޙައްމަދު މުއިއްޒު އާއި ކައުންސިލުގައި ހިމެނޭ އެހެން މެމްބަރުން ވެސް ވިދާޅުވީ ކައުންސިލުގައި މުވައްޒަފުން މަދުވެ އެ ތާށިކަން އިހުސާސް ކުރެވޭ ކަމަށެވެ. އެކަމުގެ ޒިންމާ ނަގަން ޖެހޭނީ ސިވިލް ސާރވިސް ކޮމިޝަނުން ކަމަށާއި އެ ކޮމިޝަނުން މުވައްޒަފުން ނެގުމުގައި ހުރަސްތައް އަޅާ ކަމަށް ސިޓީ ކައުންސިލުން ބުނެއެވެ.
މި ތުހުމަތުތަކާ ގުޅޭގޮތުން ރާއްޖެ އެމްވީއިން ސިވިލް ސާރވިސް ކޮމިޝަނަށް ގުޅުމުން އެ ކޮމިޝަނުން ބުނީ އެފަދަ އެއްވެސް ހުރަހެއް އެއްވެސް މުއައްސަސާއަކަށް އަދި އިދާރާއަކަށް އަޅާފައިނުވާނެ ކަމަށެވެ. ނަމަވެސް ބައެއް ހާލަތްތަކުގައި ވަޒީފާއެއްގެ ހުށަހެޅުމުން އެ ވަޒީފާ ރިޖެކްޓް ކުރަން ޖެހޭ ކަމަށް ވެސް އެ ކޮމިޝަނުން ބުންޏެވެ. އަދި އޮނިގަނޑުގެ ތެރެއިން ސިޓީ ކައުންސިލުން ހުށަހެޅި ވަޒީފާތަކަށް ހުއްދަ ދީފައިވާނެ ކަމަށް ވެސް ސިވިލް ސާރވިސް ކޮމިޝަނުން ބުންޏެވެ.
ފާއިތުވި އެއް އަހަރު ދުވަހުގެ ތެރޭގައި މުވައްޒަފުން ހޯދަން ސިޓީ ކައުންސިލުން ހުށަހެޅި ވަޒީފާތަކުގެ ތެރޭގައި މައްސަލަތައް ހުރި ކަމަށް ވެސް ސިވިލް ސާރވިސް ކޮމިޝަނުން ބުންޏެވެ. އެގޮތުން، ކޮލިފިކޭޝަނާއި އެކަށީގެން ނުވާ ވަރުގެ މުސާރައެއް ކަނޑައެޅުމާއި އޮނިގަނޑުގައި ނުހިމެނޭ ވަޒީފާތައް ހިމެނޭ ކަމަށް އެކޮމިޝަނުން ފާހަގަކުރިއެވެ.
މައުލޫމާތު ލިބިފައިވާ ގޮތުގައި ސިޓީ ކައުންސިލުން ބައެއް ވަޒީފާތަކަށް އޯލެވެލް ފެންވަރުގައި 20،000 ރުފިޔާއަށް ވުރެ ބޮޑު މުސާރައެއްގައި މުވައްޒަފުން ނަގަން ހުށަހެޅިއެވެ. މީގެ ތެރޭގައި އޮނިގަނޑުގައި ހިމެނޭ ވަޒީފާތަކަށް ސިވިލް ސާރވިސް ކޮމިޝަނުން މުސާރަ ކުޑަކުރުމަށްފަހު ހުއްދަ ދީފައިވާ ކަމަށާއި އޮނިގަނޑުގައި ނެތް ވަޒީފާތައް ރިޖެކްޓް ކުރި ކަމަށް ވެއެވެ. ސިޓީ ކައުންސިލުގެ އޮނިގަނޑުގައި ނެތް މަޤާމަކަށް މީހަކު ނަގާނަމަ ސިވިލް ސާރވިސް ކޮމިޝަނަށް ފޮނުވަން ޖެހޭނީ އެ މަޤާމެއްގެ އޮނިގަނޑު ހެދުމަށްފަހުއެވެ.
ސިވިލް ސާރވިސް ވަޒީފާތަކުގައި ވަކި މަޤާމަކަށް، ވަކި ކޮލިފިކޭޝަނަކަށް، އަދި ވަކި ދާއިރާތަކަކަށް ޚާއްސަ މުސާރަ ރޭންޖުތަކެއް ކަނޑައަޅާފައި ހުރެއެވެ. އެއީ ވަޒީފާގައި ހަމަހަމަކަން ބެހެއްޓުމަށެވެ. އެ ކަނޑައަޅާފައިވާ ރޭންޖަށް ވުރެ ބޮޑު މުސާރައަކަށް ސިޓީ ކައުންސިލުން މުވައްޒަފަކު ނަގައިފިނަމަ އެހެން ކައުންސިލްތަކުން ވެސް އެގޮތް ބޭނުންވާނެއެވެ. މުސާރައިގެ އޮނިގަނޑަށް ބަލައި ސިވިލް ސާރވިސް ކޮމިޝަނުން ވަޒީފާތަކަށް ހުއްދަ ނުދޭން ނިންމަނީ މީގެ ސަބަބުން ކަމުގައި އެކޮމިޝަނުން ބުނެއެވެ.
ސިޓީ ކައުންސިލުން ދެން ފާހަގަކުރީ ފިނޭންސް މިނިސްޓްރީން ހުއްދަ ދޭއިރު ސިވިލް ސާރވިސް ކޮމިޝަނުން ހުއްދަ ދޭން ނުޖެހޭ ސަބަބެއް ނެތްކަމެވެ. ނަމަވެސް ދެ އިދާރާއިން ހުއްދަ ދިނުމުގައި ބަލާ މިންގަނޑުތައް ތަފާތެވެ. ފިނޭންސުން ހުއްދަ ދިނުމުގައި ބަލާނީ ހުއްދައަށް އެދޭ ވަޒީފާއަކީ ސަރުކާރުން ކައުންސިލަށް ކަނޑައަޅާފައިވާ ބަޖެޓުގެ ތެރެއިން ދޭ ވަޒީފާއެއް ކަމެވެ. އެއީ ބަޖެޓުގެ ތެރެއިން ހުޅުވާލާ ވަޒީފާއެއް ނަމަ ފިނޭންސުން އެ ވަޒީފާއަކަށް ހުއްދަ ދިނުމުން އިތުރު ހުއްދައަށް ހުށަހަޅަން ޖެހޭނީ ސިވިލް ސާރވިސް ކޮމިޝަނަށެވެ.
ސިވިލް ސާރވިސް ކޮމިޝަނުން ވަޒީފާއަށް މީހަކު ނަގަން ހުއްދަ ދޭނީ މަޤާމުގެ ޝަރުތާއި މުސާރަ ފަދަ ކަންކަމަށް ބަލައި އެ އޮންނަ އުސޫލުގެ ތެރެއިން ކަމަށް އެ ކޮމިޝަނުން މައުލޫމާތުދެއެވެ.
ރާއްޖެ އެމްވީއަށް މައުލޫމާތު ލިބިފައިވާ ގޮތުގައި މައްސަލަތައް ކުރިމަތިވަނީ ދަށް ކުއަލިފިކޭޝަނާއެކު ކައުންސިލްގެ ވަޒީފާތަކަށް މީހުން ނެގުމަށް ސިޓީ ކައުންސިލުން މަސައްކަތް ކުރުމުންނެވެ.
